ന്യൂഡൽഹി: ടി20 ലോകകപ്പിൽ കാനഡയെ അഞ്ച് വിക്കറ്റിന് പരാജയപ്പെടുത്തി സൂപ്പർ 8 പ്രതീക്ഷകൾ സജീവമാക്കി യുഎഇ. ഡൽഹിയിലെ അരുൺ ജെയ്റ്റ്‌ലി സ്റ്റേഡിയത്തിൽ നടന്ന ആവേശകരമായ മത്സരത്തിൽ ആര്യൺഷ് ശർമ്മയുടെ തകർപ്പൻ ബാറ്റിംഗും (74*) ജുനൈദ് സിദ്ദിഖിന്റെ അഞ്ച് വിക്കറ്റ് നേട്ടവുമാണ് യുഎഇക്ക് ഉജ്ജ്വല വിജയം സമ്മാനിച്ചത്.

മത്സരം കൈവിട്ടുപോകുമെന്ന് തോന്നിച്ച ഘട്ടത്തിൽ ആറാം നമ്പറിൽ എത്തിയ സുഹൈബ് ഖാനാണ് കളിയുടെ ​ഗതി മാറ്റിയത്. ജയിക്കാൻ 45 പന്തിൽ 85 റൺസ് വേണമെന്നിരിക്കെ, സമ്മർദ്ദമില്ലാതെ ബാറ്റ് ചെയ്ത സൊഹൈബ് 29 പന്തിൽ 51 റൺസ് അടിച്ചുകൂട്ടി. ഇന്ത്യൻ ഇതിഹാസം എം.എസ്. ധോണിയുടെ ശൈലിയാണ് താൻ പിന്തുടർന്നതെന്ന് മത്സരശേഷം സുഹൈബ് പറഞ്ഞു.

"ധോണി പറയും പോലെ, സമ്മർദ്ദഘട്ടങ്ങളിൽ ശാന്തത പാലിക്കുക എന്നതായിരുന്നു എന്റെ തന്ത്രം. ആര്യൻഷുമായി ചേർന്ന് ഓരോ പന്തിലും പോസിറ്റീവായി ചിന്തിച്ചത് വിജയത്തിലേക്ക് നയിച്ചു." - സുഹൈബ് ഖാൻ പറഞ്ഞു.

സുഹൈബിനെ സംബന്ധിച്ചിടത്തോളം ഈ വിജയം ഇരട്ടി മധുരമുള്ളതായിരുന്നു. ഡൽഹിയിലെ ജാമിയ മില്ലിയ ഇസ്ലാമിയ യൂണിവേഴ്സിറ്റിയിൽ സോഷ്യോളജി വിദ്യാർത്ഥിയായിരിക്കെ ക്രിക്കറ്റ് യാത്ര തുടങ്ങിയ സുഹൈബ്, തന്റെ കരിയർ ആരംഭിച്ച മണ്ണിൽ തന്നെ ലോകകപ്പിലെ മികച്ച ഇന്നിംഗ്സ് കളിച്ചു. കോവിഡ് കാലത്ത് മെച്ചപ്പെട്ട അവസരങ്ങൾ തേടി യുഎഇയിലേക്ക് കുടിയേറിയ സുഹൈബ്, പകൽ സമയം ഫിനാൻഷ്യൽ കൺസൾട്ടന്റായി ജോലി ചെയ്തും രാത്രിയിൽ ക്രിക്കറ്റ് പരിശീലിച്ചുമാണ് അന്താരാഷ്ട്ര വേദിയിലേക്ക് എത്തിയത്.

നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ കാനഡയെ തകർത്തത് ജുനൈദ് സിദ്ദിഖിന്റെ ബൗളിംഗ് പ്രകടനമാണ്. 35 റൺസ് വഴങ്ങി 5 വിക്കറ്റുകൾ വീഴ്ത്തിയ സിദ്ദിഖ്, ടി20 ലോകകപ്പിൽ ഒരു യുഎഇ താരത്തിന്റെ ഏറ്റവും മികച്ച പ്രകടനം എന്ന റെക്കോർഡ് സ്വന്തമാക്കി. കാനഡയ്ക്ക് വേണ്ടി ഹാർഷ് താക്കർ (41), നവനീത് ധാലിവാൾ (34) എന്നിവർ പൊരുതിയെങ്കിലും 150 റൺസിൽ ഒതുങ്ങി.

ഗ്രൂപ്പ് ഡിയിൽ രണ്ട് പോയിന്റോടെ യുഎഇ ഇപ്പോൾ മൂന്നാം സ്ഥാനത്താണ്. എന്നാൽ സൂപ്പർ 8 റൗണ്ടിലേക്ക് യോഗ്യത നേടണമെങ്കിൽ അടുത്ത ആഴ്ച നടക്കുന്ന മത്സരങ്ങളിൽ ദക്ഷിണാഫ്രിക്കയെയും അഫ്ഗാനിസ്ഥാനെയും പരാജയപ്പെടുത്തേണ്ടി വരും. ഇതുവരെ ലോകകപ്പിൽ ഒരു പൂർണ്ണ അംഗരാജ്യത്തെയും പരാജയപ്പെടുത്തിയിട്ടില്ലാത്ത യുഎഇക്ക് കാനഡയ്‌ക്കെതിരായ ഈ വിജയം വലിയ ആത്മവിശ്വാസം നൽകുന്നതാണ്.

united arab emirates defeated canada by five wickets in a crucial t20 world cup clash, boosting their slim super 8 qualification hopes. a composed batting display sealed the chase and revived the associate nation’s campaign.