കണ്ണൂര്‍: ക്രമസമാധാനപാലനത്തിനായി കണ്ണൂരില്‍ പ്രത്യേക സായുധാധികാര നിയമം പ്രഖ്യാപിച്ച് സൈനികരെ വിന്യസിക്കണമെന്ന് ആവശ്യപ്പെട്ട്  ബി. ജെ.പി നേതാവ് ടി.ജി മോഹന്‍ദാസ് കേന്ദ്രആഭ്യന്തര മന്ത്രിക്ക് കത്തയച്ചു. രാഷ്ട്രീയ കൊലപാതകങ്ങള്‍ക്ക് കുപ്രസിദ്ധമായ കണ്ണൂരില്‍ ഇപ്പോള്‍ തീവ്രവാദവും രാജ്യവിരുദ്ധ പ്രവര്‍ത്തനങ്ങളും സജീവമാണെന്ന് കത്തില്‍ ആരോപിക്കുന്നു.
കേന്ദ്ര ക്രൈം റെക്കോര്‍ഡ്‌സ്ബ്യൂറോയുടെ കണക്കനുസരിച്ച് കഴിഞ്ഞ ഒരുവര്‍ഷം സംസ്ഥാനത്ത് ഏറ്റവും കൂടുതല്‍ കലാപങ്ങള്‍ അരങ്ങേറിയ ജില്ലയാണ് കണ്ണൂര്‍. തീവ്രവാദക്യാംപുകള്‍ വരെ സ്ഥാപിക്കപ്പെട്ട ജില്ലയില്‍ കഴിഞ്ഞ മൂന്ന് മാസത്തിനിടെ മാത്രം പതിനൊന്ന് കള്ള നോട്ടുകേസുകളെടുത്തിട്ടുണ്ടെണ്ടന്നും ജില്ലയില്‍ വ്യാപിച്ചുവരുന്ന കലാപങ്ങള്‍ തടയുന്നതില്‍ ഉന്നതപൊലിസ് ഉദ്യോഗസ്ഥര്‍ തങ്ങളുടെ നിസഹായാവസ്ഥ തുറന്നു സമ്മതിച്ചതാണെന്നും കത്തില്‍ പറയുന്നു.