ഊണിനൊപ്പം അല്‍പം എരിവും പുളിയുമുള്ള അച്ചാര്‍ ഉണ്ടെങ്കില്‍ പിന്നെ വേറെ ഒന്നും വേണ്ട. പ്രത്യേകിച്ച് പച്ചമുളകിന്റെ എരിവും ഇഞ്ചിയുടെ ഔഷധഗുണവും ചേരുമ്പോള്‍ അത് ആരോഗ്യത്തിനും രുചിക്കും ഒരുപോലെ മികച്ചതാണ്. എന്നാല്‍ പലപ്പോഴും നമ്മള്‍ വീട്ടിലുണ്ടാക്കുന്ന അച്ചാറുകള്‍ പെട്ടെന്ന് കേടായിപ്പോകാറുണ്ട്. അച്ചാറിന്റെ തനിമ നിലനിര്‍ത്തിക്കൊണ്ട് മാസങ്ങളോളം കേടുകൂടാതെ സൂക്ഷിക്കാന്‍ സഹായിക്കുന്ന ചില പ്രധാന നുറുങ്ങുകള്‍ ഇതാ. 

ആവശ്യമായ സാധനങ്ങള്‍

പച്ചമുളക്: 100 ഗ്രാം (വട്ടത്തില്‍ അരിഞ്ഞത്)

ഇഞ്ചി: 100 ഗ്രാം (ചെറുതായി അരിഞ്ഞത്)

കടുകെണ്ണ/നല്ലെണ്ണ: 4-5 ടേബിള്‍ സ്പൂണ്‍

കടുക്: 1 ടീസ്പൂണ്‍

ഉലുവ പൊടി: ½ ടീസ്പൂണ്‍

കായം പൊടി: ½ ടീസ്പൂണ്‍

മഞ്ഞള്‍പ്പൊടി: ½ ടീസ്പൂണ്‍

 

 

കശ്മീരി മുളകുപൊടി: 1 ടേബിള്‍ സ്പൂണ്‍ (നിറത്തിന് വേണ്ടി)

വിനാഗിരി: 2-3 ടേബിള്‍ സ്പൂണ്‍

ഉപ്പ്: ആവശ്യത്തിന്

കറിവേപ്പില: 2 തണ്ട്

തയ്യാറാക്കുന്ന വിധം

കഴുകി ഈര്‍പ്പം പൂര്‍ണമായും ഉണക്കിയ പച്ചമുളകും ഇഞ്ചിയും ഒരേ വലിപ്പത്തിലുള്ള ചെറിയ കഷ്ണങ്ങളായി മുറിച്ചു വയ്ക്കുക.

ഒരു ചീനച്ചട്ടിയില്‍ എണ്ണ ഒഴിച്ച് നന്നായി ചൂടാക്കുക. എണ്ണ പുകഞ്ഞു വരുമ്പോള്‍ തീ കുറച്ച് കടുക് പൊട്ടിക്കുക. അതിലേക്ക് കറിവേപ്പില ചേര്‍ക്കുക.

അരിഞ്ഞു വച്ചിരിക്കുന്ന ഇഞ്ചിയും പച്ചമുളകും ചേര്‍ത്ത് 2-3 മിനിറ്റ് വഴറ്റുക. ഇവ അധികം വെന്തു കുഴയരുത്, ആ ഒരു മൊരിഞ്ഞ പരുവം മതിയാകും.

തീ ഓഫ് ചെയ്ത ശേഷം മഞ്ഞള്‍പ്പൊടി, മുളകുപൊടി, കായം പൊടി, ഉലുവ പൊടി എന്നിവ ചേര്‍ത്ത് നന്നായി ഇളക്കുക. ചട്ടിയുടെ ചൂടില്‍ തന്നെ മസാല മൂത്തു കിട്ടും.

 

 

ഇതിലേക്ക് ആവശ്യത്തിന് ഉപ്പും വിനാഗിരിയും ചേര്‍ത്ത് നന്നായി യോജിപ്പിക്കുക.

അച്ചാര്‍ നന്നായി തണുത്ത ശേഷം മാത്രം ഈര്‍പ്പമില്ലാത്ത ഗ്ലാസ് ഭരണികളിലേക്ക് മാറ്റുക.

Pro Tip

അച്ചാറിന് മുകളില്‍ എണ്ണ തെളിഞ്ഞു നില്‍ക്കുന്നത് അച്ചാര്‍ കേടാകാതിരിക്കാന്‍ സഹായിക്കും. എണ്ണ കുറവാണെന്ന് തോന്നുകയാണെങ്കില്‍ അല്‍പം കടുകെണ്ണ ചൂടാക്കി തണുപ്പിച്ച ശേഷം മുകളില്‍ ഒഴിച്ചു കൊടുക്കാം.

അച്ചാര്‍ കേടാകാതെ ഇരിക്കാന്‍ ശ്രദ്ധിക്കേണ്ടവ

നല്ല ഉറപ്പുള്ളതും ഫ്രഷുമായ പച്ചമുളകും ഇളം ഇഞ്ചിയും മാത്രം തിരഞ്ഞെടുക്കുക. കേടായ കഷണങ്ങള്‍ അച്ചാര്‍ വേഗത്തില്‍ ചീത്തയാകാന്‍ കാരണമാകും.

കഴുകി വൃത്തിയാക്കിയ ശേഷം മുളകും ഇഞ്ചിയും വെയിലത്തോ ഫാനിന് കീഴിലോ വച്ച് പൂര്‍ണമായും ഉണക്കണം. ഒരു തുള്ളി വെള്ളം പോലും അച്ചാറില്‍ ഉണ്ടാകാന്‍ പാടില്ല.

ഇഞ്ചിയും മുളകും ഒരേ വലുപ്പത്തില്‍ മുറിച്ചാല്‍ മസാലകള്‍ എല്ലാ ഭാഗത്തും ഒരേപോലെ പിടിക്കാന്‍ സഹായിക്കും.

അച്ചാറിന് നല്ല രുചി ലഭിക്കാന്‍ കടുകെണ്ണയാണ് ഏറ്റവും നല്ലത്. എണ്ണ നന്നായി ചൂടാക്കി പുക വന്ന ശേഷം തണുപ്പിച്ച് ഉപയോഗിച്ചാല്‍ പച്ചമണം മാറിക്കിട്ടും.

 ALSO READ: കൗതുകമുണര്‍ത്തുന്ന നീല ചീസ്: പൂപ്പല്‍ പിടിച്ച ഈ ഭക്ഷണം ആളുകള്‍ക്ക് പ്രിയപ്പെട്ടതാകുന്നത് എന്തുകൊണ്ട്..?

മഞ്ഞള്‍, ഉപ്പ്, കടുക്, പെരുംജീരകം എന്നിവ കൃത്യമായ അളവില്‍ ചേര്‍ക്കുക. ഇത് അച്ചാറിന് ഒരു പ്രത്യേക മണവും രുചിയും നല്‍കും.

വിനാഗിരിയോ നാരങ്ങാനീരോ ചേര്‍ക്കുന്നത് അച്ചാര്‍ കേടാകാതിരിക്കാനും നല്ല പുളിപ്പ് ലഭിക്കാനും സഹായിക്കും.

സൂക്ഷിച്ചു വയ്ക്കാനുള്ള ചില ട്രിക്കുകള്‍

പ്ലാസ്റ്റിക് പാത്രങ്ങള്‍ക്ക് പകരം കഴുകി ഉണക്കിയ ഗ്ലാസ് ജാറുകളോ ഭരണികളോ ഉപയോഗിക്കുക.

അച്ചാര്‍ എടുക്കാന്‍ എപ്പോഴും ഉണങ്ങിയ സ്പൂണ്‍ മാത്രം ഉപയോഗിക്കുക.

അച്ചാര്‍ ഇട്ട ശേഷം ആദ്യത്തെ കുറച്ചു ദിവസം വെയിലത്ത് വെക്കുന്നത് അത് നന്നായി പാകമാകാന്‍ സഹായിക്കും.

ഉപയോഗത്തിന് ശേഷം മൂടി നന്നായി മുറുക്കി അടച്ച് തണുപ്പും ഈര്‍പ്പവുമില്ലാത്ത സ്ഥലത്ത് സൂക്ഷിക്കുക.

 

This easy recipe for green chili and ginger pickle combines spicy heat with medicinal benefits, using simple preservation techniques like vinegar and oil to keep it fresh for months.