ഐപിഎല്ലില്‍ ഡല്‍ഹി കാപ്പിറ്റല്‍സിനെതിരെ കൊല്‍ക്കത്ത നൈറ്റ്‌റൈഡേഴ്‌സിന് വമ്പന്‍ ജയം. ഇതോടെ കളിച്ച മൂന്ന് മത്സരങ്ങളും വിജയിച്ച് 6 പോയിന്റുമായി രാജസ്ഥാനെ മറികടന്ന് കൊല്‍ക്കത്ത പോയിന്റ് പട്ടികയില്‍ ഒന്നാമതെത്തി. ഐപിഎല്ലില്‍ റണ്‍മഴ കണ്ട മല്‍സരത്തില്‍ ശ്രേയസ് അയ്യരും സംഘവും 106 റണ്‍സിനാണ് ഡിസിയെ തകര്‍ത്തത്. ഇതോടെ നെറ്റ് റണ്‍റേറ്റിലും കെകെആറിന് വന്‍ മുന്നേറ്റം ലഭിച്ചു.

റോയല്‍സിനു ശേഷം ഈ സീസണില്‍ കളിച്ച മുഴുവന്‍ മല്‍സരങ്ങളിലും ജയിച്ച ടീമായും കെകെആര്‍ മാറി. ടി20 യുടെ ചരിത്രത്തില്‍ ഇന്നേവരെ ഒരു ടീമും ചേസ് ചെയ്യാത്ത 273 റണ്‍സെന്ന റെക്കോര്‍ഡ് വിജയലക്ഷ്യമാണ് ഡിസിക്കു കെകെആര്‍ നല്‍കിയത്. റിഷഭും (55) ട്രിസ്റ്റണ്‍ സ്റ്റബ്‌സും (54) ഫിഫ്റ്റികള്‍ നേടിയെങ്കിലും ഡിസി 17.2 ഓവറില്‍ 166 റണ്‍സിനു ഓള്‍ഔട്ടായി. ഡിസി ബാറ്റിങ് ലൈനപ്പില്‍ മറ്റാരും വിജയത്തിനായി കളിച്ചില്ല.

അതേസമയം കെകെആറിനു വേണ്ടി തിളങ്ങിയത് വെസ്റ്റിന്റീസ് താരം സുനില്‍ നരെയ്‌നായിരുന്നു. വെറും 39 ബോളില്‍ നരെയ്ന്‍ 85 റണ്‍സെടുത്തു. ഏഴു വീതം ഫോറും സിക്‌സറുമടിച്ചു. ഒപ്പം മൂന്നാം നമ്പറില്‍ ഇറങ്ങിയ അന്‍ക്രിഷ് രഘുവംശിയും(54)  പിന്നീടുവന്ന ആന്ദ്രെ റസ്സലും (41), റിങ്കു സിങും (26) നല്ല സംഭാവനകള്‍ നല്‍കി. സീസണില്‍ ആദ്യമായി സ്റ്റാര്‍ക്കിന് വിക്കറ്റ് കിട്ടിയ മത്സരവുമായിരുന്നു ഇത്. ഏപ്രില്‍ 8 ന് ചെന്നൈക്കെതിരെയാണ് കെകെആറിന്റെ അടുത്ത മത്സരം. ഡല്‍ഹി അടുത്ത മത്സരത്തില്‍ നേരിടുന്നത് മുംബൈയെ ആണ്.