കൊച്ചി: സംസ്ഥാന ഇന്റര്‍ ക്ലബ് അത്‌ലറ്റിക്ക് മീറ്റില്‍ തിരുവനന്തപുരം സായ് ജേതാക്കളായി. 336 പോയിന്റുകള്‍ നേടിയാണ് സായ് വിജയ കിരീടം ചൂടിയത്. 286.5 പോയിന്റുകള്‍ നേടിയ എം എ കോളജ് കോതമംഗലമാണ് രണ്ടാം സ്ഥാനത്ത്. പാല ആല്‍ഫോണ്‍സ കോളജ് 205 പോയിന്റു നേടി മൂന്നാം സ്ഥാനത്തെത്തി. ചങ്ങനാശേരി അസംപ്ഷന്‍ കോളജ്, പാലക്കാട് പറളി എച്ച്.എസ്.എസ്  ടീമുകള്‍ നാലും അഞ്ചും സ്ഥാനങ്ങള്‍ പങ്കിട്ടു.
മീറ്റിന്റെ അവസാന ദിവസമായ ഇന്നലെ പതിമൂന്നു പുതിയ റെക്കോര്‍ഡുകള്‍ കൂടി പിറന്നു. പതിനാറ് വയസിനു താഴെ പ്രായമുളള പെണ്‍കുട്ടികളുടെ 200 മീറ്ററില്‍ തിരുവനന്തപുരം സായിലെ മിന്നു പി റോയ് പുതിയ മീറ്റ് റെക്കോര്‍ഡോടെ സ്വര്‍ണം നേടി. 2015 ല്‍ പാലക്കാട് പറളി സ്‌കൂളിലെ ശോഭ വി.വി സ്ഥാപിച്ച റെക്കോര്‍ഡാണ് മിന്നു മറികടന്നത്. പതിനെട്ട്് വയസിനു താഴെ പ്രായമുളള പെണ്‍കുട്ടികളുടെ 1500 മീറ്റര്‍ ഓട്ടത്തില്‍ പാലക്കാട് മുണ്ടൂര്‍ എച്ച്.എസ്.എസിലെ ശ്രുതി സി.എസ് പുതിയ മീറ്റ് റെക്കോര്‍ഡിന് ഉടമയായി. വനിതകളുടെ 400 മീറ്റര്‍ ഓട്ടത്തില്‍ അസംപ്ഷ്ന്‍ കോളജ്് ചങ്ങനാശേരിയുടെ വിസ്മയ വി.കെ മീറ്റില്‍ പുതിയ റെക്കോര്‍ഡിന് ഉടമയായി. 2010ല്‍ ഉഷാ സ്‌കൂള്‍ ഓഫ് അതല്റ്റിക്‌സിലെ അശ്വതി മോഹനന്‍ സ്ഥാപിച്ച റെക്കോര്‍ഡാണ് വിസ്മയ തകര്‍ത്തത്.
ഇരുപത് വയസിനു താഴെ പ്രായമുളള വനിതകളുടെ 1500 മീറ്ററില്‍ സി ബബിത നിലവിലെ റെക്കോര്‍ഡ് തിരുത്തിയെഴുതി. 2015 ല്‍ മേഴ്‌സിക്കുട്ടന്‍ അക്കാദമിയുടെ ഒലിവിയ ആന്‍ മറിയ തോമസ് സൃഷ്ടിച്ച റെക്കോര്‍ഡാണ് ബബിത തിരുത്തിയത്. വനിതകളുടെ 1500  മീറ്റര്‍ ഓട്ടത്തില്‍2011 ല്‍ അല്‍ഫോണ്‍സ കോളജിലെ നീതു എം.വി സ്ഥാപിച്ച റെക്കോര്‍ഡ് പാലക്കാട് മുണ്ടൂര്‍ എച്ച് എസ് എസ്സിലെ പി.യു ചിത്ര തിരുത്തിയെഴുതി. വനിതകളുടെ നൂറു മീറ്റര്‍ ഹര്‍ഡില്‍സില്‍ തൃശൂര്‍ വിമല കോളജിലെ സുജിന എം പുതിയ മീറ്റ് റെക്കോര്‍ഡ് കുറിച്ചു.
 ജാവലിന്‍ ത്രോയില്‍ തൃശൂര്‍ ക്രൈസ്റ്റ് കോളജിലെ പ്രജിത സി.കെ പുതിയ റെക്കോര്‍ഡിന് ഉടമയായി. 200 മീറ്ററില്‍ എറണാകുളം മാര്‍ ബേസില്‍ വിദ്യാര്‍ഥി ആദര്‍ശ് ഗോപി പുതിയ റെക്കോര്‍ഡിന് ഉടമയായി. 10000 മീറ്റര്‍ നടത്ത മത്സരത്തില്‍ പാലക്കാട് പറളി എച്ച്.എസ്.എസിലെ മനു കെ.എം പുതിയ റെക്കോര്‍ഡ് സൃഷ്ടിച്ചു. പതിനെട്ട് വയസിനു താഴെ പ്രായമുളള ആണ്‍കുട്ടികളുടെ ഡെക്കാത്തലണില്‍ ആലപ്പുഴ ഡി വി അത്‌ലറ്റിക്ക് ക്ലബിലെ ആകാശ് പി പുതിയ റെക്കോര്‍ഡിന് ഉടമയായി.
എറണാകുളം മഹാരാജാസ് ഗ്രൗണ്ടില്‍ മൂന്നു ദിവസമായി നടന്ന മേള ഇന്നലെ സമാപിച്ചു.
സംസ്ഥാനത്തെ നൂറോളം ക്ലബുകളില്‍ നിന്നായി അയിരത്തിയഞ്ഞൂറോളം കായിക താരങ്ങളാണ് പങ്കെടുത്തത്. വിജയികള്‍ക്ക് സര്‍ട്ടിഫിക്കറ്റുകളും ക്യാഷ് അവാര്‍ഡുകളും വിതരണം ചെയ്തു.