ലഖ്‌നൗ: ഉത്തർപ്രദേശിലെ സർക്കാർ സ്കൂളിൽ ഉച്ചഭക്ഷണ പദ്ധതിയുടെ (Mid-day Meal) ഭാഗമായി കുട്ടികൾക്ക് നൽകുന്ന ഭക്ഷണത്തിൽ ഗുരുതരമായ വീഴ്ച. മഹോബ ജില്ലയിലെ ഒരു പ്രൈമറി സ്കൂളിൽ മുക്കാൽ ബക്കറ്റ് കലങ്ങിയ മലിനജലത്തിലേക്ക് വെറും രണ്ട് കവർ പാൽ ഒഴിച്ച് നേർപ്പിച്ച് കുട്ടികൾക്ക് നൽകുന്ന വീഡിയോയാണ് ഇപ്പോൾ പുറത്തുവന്നിരിക്കുന്നത്. സംഭവത്തിൽ വ്യാപക പ്രതിഷേധം ഉയർന്നതോടെ സ്കൂളിലെ ടീച്ചർ ഇൻ ചാർജിനെ സസ്പെൻഡ് ചെയ്തു.

നിയമങ്ങൾ കാറ്റിൽ പറത്തി അധികൃതർ

മഹോബ ജില്ലയിലെ കബ്രായ് ബ്ലോക്കിലെ ദിക്വാഹ ഗ്രാമത്തിലെ സ്കൂളിലാണ് മനുഷ്യമനസാക്ഷിയെ ഞെട്ടിക്കുന്ന സംഭവം നടന്നത്. സർക്കാർ മാനദണ്ഡപ്രകാരം ഓരോ കുട്ടിക്കും 200 മില്ലി ശുദ്ധമായ പാലും പോഷകഗുണമുള്ള ഭക്ഷണവും നൽകണമെന്നാണ് നിയമം. എന്നാൽ ഈ സ്കൂളിലെ 50 ഓളം വിദ്യാർത്ഥികൾക്ക് ലഭിച്ചത് അങ്ങേയറ്റം മലിനമായ പാനീയമാണ്.

വീഡിയോയിലെ ഞെട്ടിക്കുന്ന ദൃശ്യങ്ങൾ

'യുപി ഉച്ചഭക്ഷണത്തിലേക്ക് സ്വാഗതം' എന്ന പരിഹാസരൂപേണയുള്ള കുറിപ്പോടെയാണ് വീഡിയോ സമൂഹമാധ്യമങ്ങളിൽ പ്രചരിക്കുന്നത്. വീഡിയോയിലെ പ്രധാന കാര്യങ്ങൾ ഇവയാണ്:

"Welcome to the UP mid-day meal." 🤡

"2 packet milk poured in bucket of water." 🚨

The video is from UP's Mahoba, where school staff are playing with children's health.

It's not milk mixed with water. It's water with a splash of milk. How will kids be healthy? pic.twitter.com/TRDspfFEEc

— Suraj Kumar Bauddh (@SurajKrBauddh) February 13, 2026

ഒരു സ്റ്റീൽ ബക്കറ്റിൽ നിറയെ കലങ്ങിയ മലിനജലം ഇരിക്കുന്നു.അതിലേക്ക് വെറും രണ്ട് കവർ അമുൽ പാൽ പൊട്ടിച്ച് ഒഴിക്കുന്നു.ഇത് തിളപ്പിക്കുക പോലും ചെയ്യാതെ പാത്രങ്ങളിലാക്കി കുട്ടികൾക്ക് വിതരണം ചെയ്യുന്നു.പാലിൽ വെള്ളം ചേർക്കുകയല്ല, മറിച്ച് വെള്ളത്തിൽ പാൽ തളിക്കുകയാണ് ഇവർ ചെയ്തതെന്നാണ് വീഡിയോ പങ്കുവെച്ചവർ കുറിച്ചത്.

പ്രതിഷേധം ശക്തം; ഭാവി തലമുറയോടുള്ള ക്രൂരത

വീഡിയോ വൈറലായതോടെ വൻ പ്രതിഷേധമാണ് ഉയരുന്നത്. ഇത് കേവലം അഴിമതിയല്ല, മറിച്ച് രാജ്യത്തിന്റെ ഭാവി തലമുറയ്ക്ക് നേരെയുള്ള അക്രമമാണെന്ന് പലരും പ്രതികരിച്ചു. പിന്നോക്ക വിഭാഗങ്ങളിൽ നിന്നുള്ള കുട്ടികൾ പഠിക്കുന്ന സ്കൂളുകളിൽ ഇത്തരം വിവേചനവും വെറുപ്പും കാണിക്കുന്നത് ഭയാനകമാണെന്ന് സോഷ്യൽ മീഡിയയിൽ വിമർശനങ്ങൾ ഉയർന്നു. കുട്ടികളെ ശാരീരികമായും മാനസികമായും തളർത്തുന്ന ഇത്തരം പ്രവണതകൾക്കെതിരെ കർശന നടപടി വേണമെന്നാണ് ആവശ്യം.

നടപടിയുമായി വിദ്യാഭ്യാസ വകുപ്പ്

ദൃശ്യങ്ങൾ ശ്രദ്ധയിൽപ്പെട്ടതിനെ തുടർന്ന് മഹോബ ബേസിക് ശിക്ഷാ അധികാരി രാഹുൽ മിശ്ര അന്വേഷണത്തിന് ഉത്തരവിട്ടു. പ്രാഥമിക അന്വേഷണത്തിന് പിന്നാലെ സ്കൂളിലെ ടീച്ചർ ഇൻ ചാർജ് ആയ മോണികാ സോണിയെ സസ്പെൻഡ് ചെയ്തതായി അദ്ദേഹം അറിയിച്ചു.