ന്യൂഡൽഹി: ഇന്ത്യൻ വാഹന വിപണിയിൽ വിപ്ലവകരമായ മാറ്റത്തിനൊരുങ്ങി ജെഎസ്ഡബ്ല്യു എംജി മോട്ടോർ ഇന്ത്യ (JSW MG Motor India). നിലവിൽ ആഡംബര കാറുകളിൽ മാത്രം കണ്ടുവരുന്ന പ്ലഗ്-ഇൻ ഹൈബ്രിഡ് (PHEV) സാങ്കേതികവിദ്യ സാധാരണക്കാർക്കും പ്രാപ്യമാകുന്ന 'മാസ് മാർക്കറ്റ്' വിഭാഗത്തിലേക്ക് എത്തിക്കാനാണ് കമ്പനിയുടെ നീക്കം. ഈ പുതിയ എസ്‌യുവി ഈ വർഷം ഒക്ടോബറിൽ വിപണിയിലെത്തും.

എന്താണ് ഈ പ്ലഗ്-ഇൻ ഹൈബ്രിഡ്?

ബാറ്ററി തീർന്നാൽ പെട്രോളിൽ ഓടിക്കാം എന്നതാണ് ഇതിന്റെ പ്രധാന പ്രത്യേകത. അന്താരാഷ്ട്ര വിപണിയിലെ വുളിംഗ് സ്റ്റാർലൈറ്റ് 560 (Wuling Starlight 560) എന്ന മോഡലിനെ അടിസ്ഥാനമാക്കിയാണ് ഇത് നിർമ്മിക്കുന്നത്. '520' എന്ന കോഡ് നാമത്തിൽ അറിയപ്പെടുന്ന വാഹനമാണിത്.   പ്ലഗ്-ഇൻ ഹൈബ്രിഡ്, ഫുൾ ഇലക്ട്രിക് (EV) എന്നീ രണ്ട് പതിപ്പുകളിലാണ് വിപണിയിൽ ലഭ്യമാകുക.

ALSO READ: പുതിയ കാറിൽ ഇനി സ്റ്റെപ്പിനി വേണ്ട; കേന്ദ്ര സർക്കാരിന്റെ പുതിയ ഭേദഗതി ഗുണമോ ദോഷമോ?

കരുത്തും പ്രകടനവും

എഞ്ചിൻ: 1.5 ലിറ്റർ പെട്രോൾ എഞ്ചിൻ + 20.5 kWh ബാറ്ററി പാക്ക്.

പവർ: 197 hp കരുത്തും 230 Nm ടോർക്കും.

വേഗത: പൂജ്യത്തിൽ നിന്ന് 100 കിലോമീറ്റർ വേഗതയിലെത്താൻ വെറും 9.7 സെക്കൻഡ് മതി. പരമാവധി വേഗത മണിക്കൂറിൽ 170 കി.മീ.

റെക്കോർഡ് റേഞ്ച്

ഇലക്ട്രിക് മോഡിൽ മാത്രം ഏകദേശം 100 കിലോമീറ്റർ സഞ്ചരിക്കാൻ ഈ എസ്‌യുവിക്ക് സാധിക്കും. പെട്രോൾ എഞ്ചിൻ കൂടി ചേരുന്നതോടെ ആകെ റേഞ്ച് 1,100 കിലോമീറ്റർ വരെയായി ഉയരും. 52 ലിറ്ററാണ് ഇതിന്റെ ഫ്യുവൽ ടാങ്ക് ശേഷി. അതിനാൽ ദീർഘദൂര യാത്രകളിൽ ചാർജിംഗ് സൗകര്യമില്ലെങ്കിലും യാത്ര മുടങ്ങുമെന്ന പേടി വേണ്ട.

4,745 മില്ലിമീറ്റർ നീളവും 2,810 മില്ലിമീറ്റർ വീൽബേസുമുള്ള ഈ വാഹനം വലിപ്പത്തിന്റെ കാര്യത്തിൽ മഹീന്ദ്ര XUV 7XO-യെക്കാൾ മുന്നിലാണ്. 5-സീറ്റർ, 7-സീറ്റർ ഓപ്ഷനുകളിൽ ഇത് ലഭ്യമാകാൻ സാധ്യതയുണ്ട്.

 

 

വാഹനത്തിന്റെ പുറത്തിറങ്ങുന്ന ഇലക്ട്രിക് പതിപ്പ് മഹീന്ദ്ര XEV 9S-നോടായിരിക്കും മത്സരിക്കുക. ഏകദേശം 500 കിലോമീറ്റർ റേഞ്ച് പ്രതീക്ഷിക്കുന്ന ഈ ഇവി, ഫാസ്റ്റ് ചാർജിംഗ് വഴി 20 മിനിറ്റിനുള്ളിൽ 80% വരെ ചാർജ് ചെയ്യാനാകും.

2026-27 കാലയളവിൽ ആറ് പുതിയ മോഡലുകൾ പുറത്തിറക്കാനാണ് എംജി ലക്ഷ്യമിടുന്നത്. ഇലക്ട്രിക് വാഹനങ്ങളിലേക്ക് മാറാൻ മടിക്കുന്നവരെ പ്ലഗ്-ഇൻ ഹൈബ്രിഡ് സാങ്കേതികവിദ്യയിലൂടെ ആകർഷിക്കാനാണ് കമ്പനിയുടെ നീക്കം. ആഡംബര ബ്രാൻഡുകൾ മാത്രം നൽകിയിരുന്ന ഈ സൗകര്യം സാധാരണക്കാരിലേക്ക് എത്തുന്നതോടെ ഇന്ത്യൻ എസ്‌യുവി വിപണിയിൽ ശക്തമായ പോരാട്ടം ഉറപ്പായിക്കഴിഞ്ഞു.

JSW MG Motor India is set to launch a new Plug-in Hybrid (PHEV) SUV, expected to be based on the Wuling Starlight 560 (codenamed '520'). This SUV is designed to offer the best of both worlds: electric efficiency for city commutes and petrol power for long journeys.