കൽപ്പറ്റ: ഉരുൾപൊട്ടൽ ദുരന്തം തകർത്ത ചൂരൽമലയിലെയും മുണ്ടക്കൈയിലെയും വ്യാപാരികൾക്ക് കൈത്താങ്ങുമായി വയനാട് എംപി പ്രിയങ്ക ഗാന്ധി. ഇതുവരെ സർക്കാർ സഹായങ്ങൾ ലഭിക്കാത്ത 40 കച്ചവട സ്ഥാപന ഉടമകൾക്ക് അഞ്ച് ലക്ഷം രൂപ വീതം ധനസഹായം നൽകുമെന്ന് എംപി അറിയിച്ചു.

ദുരന്തത്തിൽ എല്ലാം നഷ്ടപ്പെട്ട വ്യാപാരികൾ നേരിട്ടെത്തി തങ്ങളുടെ സങ്കടം ബോധിപ്പിച്ചതിനെ തുടർന്നാണ് പ്രിയങ്ക ഗാന്ധി അടിയന്തരമായി ഈ സഹായം ഉറപ്പാക്കിയത്. കച്ചവടം പുനരാരംഭിക്കാനോ ജീവിതം കരുപിടിപ്പിക്കാനോ മാർഗമില്ലാതെ പ്രതിസന്ധിയിലായ കുടുംബങ്ങൾക്കാണ് ഈ തുക വലിയ ആശ്വാസമാകുന്നത്.

ALSO READ: മലപ്പുറത്ത് നിയന്ത്രണം വിട്ട മിനിലോറി ക്വാറിയിലേക്ക് മറിഞ്ഞു; ഒരാൾക്കായി തിരച്ചിൽ

 

പുനരധിവാസ ടൗൺഷിപ്പ് ഉദ്ഘാടനം ഫെബ്രുവരി 25-ന്

ദുരന്തബാധിതരുടെ പുനരധിവാസത്തിനായി സർക്കാർ ഒരുക്കുന്ന മാതൃകാ ടൗൺഷിപ്പിന്റെ ഒന്നാംഘട്ട ഉദ്ഘാടനം പ്രഖ്യാപിച്ചിട്ടുണ്ട്. ഫെബ്രുവരി 25-ന് വൈകുന്നേരം 4 മണിക്ക് എൽസ്റ്റൺ എസ്റ്റേറ്റിൽ നടക്കാനിരിക്കുന്ന ചടങ്ങിൽ മുഖ്യമന്ത്രി പിണറായി വിജയൻ ടൗൺഷിപ്പിന്റെ ഉദ്ഘാടനവും ഗുണഭോക്താക്കൾക്കുള്ള പട്ടയ വിതരണവും നിർവഹിക്കും. 

ഒന്നാം ഘട്ടത്തിൽ 178 വീടുകൾ പൂർത്തിയായി. ആകെ 410 വീടുകളാണ് പദ്ധതിയിലുള്ളത്. 1000 ചതുരശ്രയടിയിൽ പ്രകൃതി ദുരന്തങ്ങളെ അതിജീവിക്കുന്ന തരത്തിലാണ് നിർമ്മാണം. ഭാവിയിൽ രണ്ടാം നില പണിയാനുള്ള അടിത്തറയും ഇതിനുണ്ട്. ആരോഗ്യ കേന്ദ്രം, അങ്കണവാടി, പൊതുമാർക്കറ്റ്, കമ്മ്യൂണിറ്റി സെന്റർ, ലൈബ്രറി, കളിസ്ഥലം എന്നിവ ടൗൺഷിപ്പിന്റെ ഭാഗമായി ഒരുക്കും.

റവന്യു മന്ത്രി കെ. രാജൻ അധ്യക്ഷത വഹിക്കുന്ന ചടങ്ങിൽ പ്രിയങ്ക ഗാന്ധി എംപി, പ്രതിപക്ഷ നേതാവ് വി.ഡി. സതീശൻ, മന്ത്രിമാർ തുടങ്ങിയ പ്രമുഖർ പങ്കെടുക്കും. ദുരന്തം നടന്ന മാസങ്ങൾക്കുള്ളിൽ തന്നെ അതിവേഗത്തിൽ പുനരധിവാസം ഉറപ്പാക്കാൻ കഴിഞ്ഞത് സംസ്ഥാന സർക്കാരിന്റെയും വിവിധ ഏജൻസികളുടെയും ഏകോപിത പ്രവർത്തനത്തിന്റെ ഫലമാണെന്ന് വിലയിരുത്തപ്പെടുന്നു.

Wayanad MP Priyanka Gandhi has announced financial assistance of 5 lakh each for 40 shop owners in Chooralmala and Mundakkai who have not yet received government aid following the devastating landslides. The assistance was arranged after the traders personally met the MP to discuss their livelihood struggles.