ദുബൈ: റമദാനും ഈദും കുടുംബത്തോടൊപ്പം ആഘോഷിക്കാന്‍ നാട്ടിലേക്ക് വിമാനം കയറാനിരുന്ന കണ്ണൂര്‍ സ്വദേശിയായ യുവാവ് ദുബൈയില്‍ അന്തരിച്ചു. കണ്ണൂര്‍ നീര്‍ച്ചാല്‍ പള്ളിക്ക് സമീപം 'അസ്മാസി'ല്‍ താമസിക്കുന്ന ഫവാസ് ചമ്പന്‍ (39) ആണ് മരിച്ചത്. ഹൃദയാഘാതമാണ് മരണകാരണമെന്ന് ഡോക്ടര്‍മാര്‍ സ്ഥിരീകരിച്ചു.

ഞായറാഴ്ച ഇഫ്താറിന് ശേഷം നാട്ടിലേക്ക് പോകാനുള്ള ബാഗുകള്‍ പാക്ക് ചെയ്യുന്നതിനിടെ ഫവാസ് പെട്ടെന്ന് കുഴഞ്ഞുവീഴുകയായിരുന്നു. ഉടന്‍ തന്നെ സുഹൃത്തുക്കള്‍ ആംബുലന്‍സ് വിളിക്കുകയും പ്രഥമശുശ്രൂഷ നല്‍കുകയും ചെയ്‌തെങ്കിലും ജീവന്‍ രക്ഷിക്കാനായില്ല. തിങ്കളാഴ്ച പുലര്‍ച്ചെ 3 മണിക്കുള്ള വിമാനത്തില്‍ നാട്ടിലേക്ക് പോകാനിരിക്കെയാണ് ഈ വിയോഗം.
കഴിഞ്ഞ ഫെബ്രുവരി 1ന് 39 വയസ്സ് പൂര്‍ത്തിയായ ഫവാസും കുടുംബവും തമ്മില്‍ വലിയ ആത്മബന്ധമായിരുന്നു. നേരത്തെ സൂപ്പര്‍ മാര്‍ക്കറ്റ് ശൃംഖലയില്‍ ജോലി ചെയ്തിരുന്ന അദ്ദേഹം, പുതിയ ജോലി ലഭിച്ചതിനെ തുടര്‍ന്ന് വിസ മാറ്റുകയായിരുന്നു. നാട്ടിലുള്ള മാതാവിന് സുഖമില്ലാത്തതിനാലും റമദാന്‍ കുടുംബത്തോടൊപ്പം ചെലവഴിക്കാനും വേണ്ടിയാണ് അദ്ദേഹം യാത്ര തീരുമാനിച്ചിരുന്നത്.

പ്രവാസി ജീവിതത്തിന്റെ ദുരിതങ്ങള്‍ പറഞ്ഞ 'പത്തേമാരി' എന്ന സിനിമയുടെ ക്ലൈമാക്‌സിന് സമാനമായ രീതിയിലാണ് ഫവാസിന്റെ മരണമെന്ന് ബന്ധുവായ അഡ്വ. ഹാഷിക് തൈക്കണ്ടി അനുസ്മരിച്ചു. ചൊവ്വാഴ്ച പുലര്‍ച്ചെ 1.50നുള്ള വിമാനത്തില്‍ ഫവാസിന്റെ മൃതദേഹം നാട്ടിലേക്ക് കൊണ്ടുപോയി. നീര്‍ച്ചാല്‍ ജുമാ മസ്ജിദ് ഖബര്‍സ്ഥാനില്‍ ഇന്ന് മറവ് ചെയ്യും.

ഇബ്രാഹിം - സുബൈദ ദമ്പതികളുടെ മകനാണ്. ഭാര്യയും നാല് വയസ്സുകാരനായ മകനുമുണ്ട്.

Fawaz Champan, a native of Neerchal, Kannur City, passed away in Dubai yesterday. He was scheduled to travel back to his hometown today. Fawaz was the son of Ibrahim and Subaida and resided at 'Asmas' near the Neerchal mosque. He is survived by his siblings, Faisal and Faisa.