ചെന്നൈ: തമിഴ്‌നാട്ടില്‍ നിയമസഭാ തെരഞ്ഞെടുപ്പിന് മുന്നോടിയായി വാഗ്ദാനപ്പോരിലേക്ക് കടന്ന് രാഷ്ട്രീയ കക്ഷികള്‍. അധികാരത്തിലെത്തിയാല്‍ ഓരോ കുടുംബത്തിനും 10,000 രൂപ ധനസഹായം പ്രഖ്യാപിച്ച് രംഗത്തെത്തിയിരിക്കുകയാണ് അണ്ണാ ഡിഎംകെ. നേരത്തെ സ്റ്റാലിന്‍ സര്‍ക്കാര്‍ പ്രഖ്യാപിച്ച 5,000 രൂപയ്ക്ക് ബദലായാണ് അണ്ണാ ഡിഎംകെയുടെ പുതിയ പ്രഖ്യാപനം.  വമ്പന്‍ വാഗ്ദാനങ്ങളുമായി എന്‍ഡിഎ ചേരിയിലുള്ള അണ്ണാ ഡിഎംകെ രംഗത്തെത്തിയത്. 

വിലക്കയറ്റത്തില്‍ പൊറുതിമുട്ടുന്ന ജനങ്ങള്‍ക്ക് ആശ്വാസം എത്തിക്കുകയെന്ന ലക്ഷ്യത്തോടെയാണ് ധനസഹായം നല്‍കാന്‍ പാര്‍ട്ടി തീരുമാനിച്ചതെന്ന് അണ്ണാ ഡിഎംകെ ജനറല്‍ സെക്രട്ടറി എടപ്പാടി പളനിസ്വാമി വാര്‍ത്താ സമ്മേളനത്തില്‍ പറഞ്ഞു. ഇതിന് പുറമെ എംപ്ലോയ്‌മെന്റ് എക്‌സ്‌ചേഞ്ചില്‍ രജിസ്റ്റര്‍ ചെയ്ത് തൊഴില്‍ ലഭിക്കാത്തവര്‍ക്ക് 2000 രൂപ പ്രതിമാസം വിതരണം ചെയ്യുമെന്നും പ്രകട പത്രികയിലുണ്ട്. ഇതില്‍ പ്ലസ്ടു പാസായവര്‍ക്ക് 1000 രൂപ നല്‍കുമെന്നും വാഗ്ദാനമുണ്ട്. ട്രോളിങ് നിരോധന കാലയളവില്‍ മത്സ്യത്തൊഴിലാളികള്‍ക്ക് നിലവില്‍ സര്‍ക്കാര്‍ നല്‍കിവരുന്ന 8000 രൂപ വര്‍ധിപ്പിച്ച് 10,000 രൂപയാക്കുമെന്നും, നെയ്ത്തുകാര്‍ക്കും, മറ്റ് തൊഴില്‍ വിഭാഗക്കാര്‍ക്കും പ്രത്യേക പാക്കേജുകള്‍ പ്രഖ്യാപിക്കുമെന്നും പത്രികയില്‍ പരാമര്‍ശമുണ്ട്. 

ALSO READ: യുപിയിൽ കൊട്ടിഘോഷിച്ച് ഉദ്‌ഘാടനം ചെയ്ത വിമാനത്താവളങ്ങളിൽ ഏഴിൽ ആറും പൂട്ടിക്കെട്ടി; വെള്ളത്തിലായത് കോടികൾ 

ദ്രാവിഡ കക്ഷികള്‍ പരസ്പരം പോരാടി ജയിച്ച തമിഴ് മണ്ണില്‍ ഇത്തവണ ആര് ഭരണം പിടിക്കുമെന്ന് ഉറ്റുനോക്കുകയാണ് രാജ്യം. ഏറെ നാളത്തെ പരിശ്രമങ്ങള്‍ക്കിപ്പുറവും തമിഴ്‌നാട് പിടിച്ചെടുക്കാന്‍ സാധിക്കാത്ത ബിജെപി അണ്ണാ ഡിഎംകെയെ കൂട്ടുപിടിച്ച് ഭരണം നേടാനാണ് ശ്രമിക്കുന്നത്. മറുപക്ഷത്ത് സ്റ്റാലിന്റെ നേതൃത്വത്തില്‍ ഡിഎംകെ ശക്തമായ പ്രചരണ പരിപാടികളുമായി മുന്നോട്ട് പോവുകയാണ്. ഇവര്‍ക്ക് രണ്ടുപേര്‍ക്കും വെല്ലുവിളി ഉയര്‍ത്തി കന്നിയങ്കത്തിന് ഇറങ്ങുന്ന വിജയ്‌യുടെ ടിവികെയും തെരഞ്ഞെടുപ്പിനെ പ്രതീക്ഷയോടെയാണ് കാണുന്നത്. 

അതേസമയം രാഷ്ട്രീയ കക്ഷികളുടെ വാഗ്ദാനപ്പോര് സംസ്ഥാന ഖജനാവിന് വലിയ സാമ്പത്തിക പ്രതിസന്ധി ഉണ്ടാക്കുമെന്നാണ് സാമ്പത്തിക വിദഗ്ദര്‍ നല്‍കുന്ന മുന്നറിയിപ്പ്.