ന്യൂഡല്‍ഹി: പ്രധാനമന്ത്രി നരേന്ദ്രമോദിയുടെ രണ്ടുദിവസത്തെ ഇസ്‌റാഈല്‍ സന്ദര്‍ശനം ഇന്ന് തുടങ്ങാനിരിക്കെ, കേന്ദ്ര സര്‍ക്കാരിനെതിരേ രൂക്ഷവിമര്‍ശനവുമായി കോണ്‍ഗ്രസ്. ഫലസ്തീന്‍ വിഷയത്തില്‍ ഇന്ത്യയുടെ ദീര്‍ഘകാലമായുള്ള നിലപാടുകളില്‍ നിന്ന് മോദി സര്‍ക്കാര്‍ പിന്നോട്ട് പോയെന്നും ഫലസ്തീന്‍ ജനതയെ സര്‍ക്കാര്‍ പൂര്‍ണ്ണമായും കൈവിട്ടെന്നും കോണ്‍ഗ്രസ് ആരോപിച്ചു.

ഫലസ്തീന്‍ താല്‍പ്പര്യങ്ങളെ പിന്തുണയ്ക്കുന്നുവെന്ന് അവകാശപ്പെടുമ്പോഴും പ്രായോഗികമായി സര്‍ക്കാര്‍ അവരെ അവഗണിക്കുകയാണെന്ന് കോണ്‍ഗ്രസ് ജനറല്‍ സെക്രട്ടറി ജയറാം രമേഷ് കുറ്റപ്പെടുത്തി. ഗസ്സയിലെ സാധാരണക്കാര്‍ക്ക് നേരെ ക്രൂരമായ ആക്രമണങ്ങള്‍ തുടരുമ്പോഴാണ് നെതന്യാഹുവിനെ മോദി കെട്ടിപ്പിടിക്കാന്‍ പോകുന്നതെന്ന് അദ്ദേഹം പരിഹസിച്ചു. 1988 നവംബര്‍ 18ന് ഫലസ്തീന്‍ രാഷ്ട്രത്തെ ആദ്യമായി അംഗീകരിച്ച രാജ്യങ്ങളില്‍ ഒന്നാണ് ഇന്ത്യയെന്ന കാര്യം ജയറാം രമേഷ് ഓര്‍മ്മിപ്പിച്ചു. ഇപ്പോഴത്തെ നീക്കം ഇന്ത്യയുടെ വിദേശനയത്തിലെ വലിയ മാറ്റമാണെന്നും അദ്ദേഹം പറഞ്ഞു. 

ഇന്ന് ഇസ്‌റാഈലിലെത്തുന്ന മോദി, ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായും പ്രസിഡന്റ് ഐസക് ഹെര്‍സോഗുമായും കൂടിക്കാഴ്ച നടത്തും. ജുഡീഷ്യറിയുടെ സ്വതന്ത്ര്യം തകര്‍ക്കാന്‍ നെതന്യാഹു സര്‍ക്കാര്‍ ശ്രമിക്കുന്നുവെന്ന് ആരോപിച്ച് ഇസ്‌റാഈലിലെ പ്രതിപക്ഷം മോദിയുടെ നെസെറ്റ് പ്രസംഗം ബഹിഷ്‌കരിച്ചേക്കുമെന്ന് റിപ്പോര്‍ട്ടുകളുണ്ട്.