ദുബൈ: സാമൂഹിക പ്രതിബദ്ധതയ്ക്കും ജനക്ഷേമ പ്രവര്‍ത്തനങ്ങള്‍ക്കും നല്‍കി വരുന്ന ശക്തമായ പിന്തുണ ആവര്‍ത്തിച്ചുറപ്പിച്ച് ലോകത്തിലെ ഏറ്റവും വലിയ അഞ്ചാമത്തെ ജ്വല്ലറി റീടെയിലറായ മലബാര്‍ ഗോള്‍ഡ് ആന്‍ഡ് ഡയമണ്ട്‌സ് 2026ലെ റമദാന്‍ ജീവകാരുണ്യ പ്രവര്‍ത്തനങ്ങള്‍ക്കായി 2.3 ദശലക്ഷം ദിര്‍ഹം വകയിരുത്തി. ലോകത്തിന്റെ വിവിധ കോണുകളിലുള്ള കഷ്ടതയനുഭവിക്കുന്ന ജനവിഭാഗങ്ങള്‍ക്കായി വന്‍തോതിലുള്ള ഇഫ്താര്‍ ഭക്ഷണം വിതരണം ചെയ്യുന്നതിനാണ് ഈ തുക പ്രധാനമായും വിനിയോഗിക്കുന്നത്.

ഈ വര്‍ഷത്തെ റമദാന്‍ ജീവകാരുണ്യ പ്രവര്‍ത്തനങ്ങളുടെ ഭാഗമായി യു.എ.ഇ, സഊദി, ബഹ്‌റൈന്‍, ഖത്തര്‍, ഒമാന്‍, കുവൈത്ത് എന്നീ ജി.സി.സി രാജ്യങ്ങളിലും മലേഷ്യ, സിംഗപ്പൂര്‍, യു.എസ്.എ, യു.കെ, കാനഡ, ഓസ്‌ട്രേലിയ, ന്യൂസിലാന്‍ഡ് എന്നിവിടങ്ങളിലുമായി രണ്ടു ലക്ഷത്തിലധികം ഇഫ്താര്‍ ഭക്ഷണം വിതരണം ചെയ്യും. വിവിധ രാജ്യങ്ങളിലെ സര്‍ക്കാര്‍ സംവിധാനങ്ങള്‍, എംബസികള്‍, ജീവകാരുണ്യ സംഘടനകള്‍, എന്‍.ജി.ഒകള്‍ എന്നിവയുമായി സഹകരിച്ചാണ് ബൃഹത്തായ പദ്ധതി നടപ്പിലാക്കുന്നത്.
മലബാര്‍ ഗ്രൂപ്പിന്റെ വര്‍ഷം മുഴുവന്‍ നീണ്ടുനില്‍ക്കുന്ന ഇ.എസ്.ജി (എന്‍വയണ്‍മെന്റല്‍, സോഷ്യല്‍ & ഗവേണന്‍സ്) പ്രവര്‍ത്തനങ്ങളുടെ സുപ്രധാന ഭാഗമാണ് ഈ റമദാന്‍ സംരംഭങ്ങള്‍. എല്ലാവരെയും ഉള്‍ക്കൊള്ളുന്ന വളര്‍ച്ചയും സമൂഹത്തില്‍ അര്‍ഥവത്തായ മാറ്റങ്ങള്‍ കൊണ്ടുവരുന്ന സേവനങ്ങളും ഉറപ്പാക്കുക എന്നതാണ് ഇതിലൂടെ ലക്ഷ്യമിടുന്നത്.

യു.എ.ഇയിലെ സജാ, സോനാപൂര്‍, അജ്മാന്‍, അബൂദബി, അല്‍ഐന്‍, ഉമ്മുല്‍ഖുവൈന്‍, റാസല്‍ഖൈമ, ഫുജൈറ എന്നിവിടങ്ങളിലെ തൊഴിലാളി ക്യാംപുകളിലും അര്‍ഹരായ വ്യക്തികള്‍ക്കിടയിലും ഇഫ്താര്‍ ഭക്ഷണ വിതരണം നടത്തും. കെ.എം.സി.സി, ജി.ഡി.ആര്‍.എഫ്.എ, ഇന്ത്യന്‍ അസോസിയേഷന്‍ റാസല്‍ഖൈമ തുടങ്ങിയ സംഘടനകളുമായി സഹകരിച്ചാണ് പദ്ധതി നടപ്പിലാക്കുന്നത്.
'നമ്മള്‍ പ്രവര്‍ത്തിക്കുന്ന സമൂഹത്തിന്റെ ഉന്നമനത്തിനായി നിലകൊള്ളുമ്പോഴാണ് യഥാര്‍ഥ വിജയം നേടാന്‍ സാധിക്കുന്നത്' മലബാര്‍ ഗ്രൂപ്പ് ചെയര്‍മാന്‍ എം.പി അഹമ്മദ് പറഞ്ഞു. ദാനശീലം, അനുകമ്പ, പങ്കുവയ്ക്കല്‍ എന്നിവയുടെ മഹത്തായ സന്ദേശമാണ് റമദാന്‍ പകര്‍ന്നുനല്‍കുന്നത്. ഇഫ്താര്‍ വിതരണ പദ്ധതിയിലൂടെ ഈ പുണ്യ മാസത്തിന്റെ അനുഗ്രഹങ്ങള്‍ അര്‍ഥവത്തായ രീതിയില്‍ ആയിരക്കണക്കിന് വ്യക്തികളിലേക്കും കുടുംബങ്ങളിലേക്കും എത്തിക്കാനാണ് ഞങ്ങള്‍ ലക്ഷ്യമിടുന്നതെന്നും അദ്ദേഹം പറഞ്ഞു. വിശപ്പു രഹിത ലോകം (ഹംഗര്‍ ഫ്രീ വേള്‍ഡ്) എന്ന തങ്ങളുടെ ദീര്‍ഘകാല വിഷന്റെ ഭാഗമായി കരുത്തുറ്റ ഒരു സമൂഹത്തെ കെട്ടിപ്പടുക്കുന്നതിനുള്ള പരിശ്രമങ്ങളുടെ ഭാഗമാണ് ഈ സംരംഭമെന്നും അദ്ദേഹം അഭിപ്രായപ്പെട്ടു.

ഇത്തരം സേവനങ്ങള്‍ തങ്ങളുടെ കടമയായിട്ടാണ് കാണുന്നതെന്നും, ഈ ഉദ്യമത്തിനു കരുത്തുപകരുന്ന എല്ലാവര്‍ക്കും നന്ദി അറിയിക്കുന്നുവെന്നും മലബാര്‍ ഗ്രൂപ്പ് വൈസ് ചെയര്‍മാന്‍ കെ.പി അബ്ദുല്‍ സലാം പറഞ്ഞു. മാനുഷിക പ്രവര്‍ത്തനങ്ങളില്‍ കൂട്ടായ പങ്കാളിത്തം പ്രോത്സാഹിപ്പിച്ചുകൊണ്ട് സാമൂഹിക മൂല്യങ്ങള്‍ ശക്തിപ്പെടുത്താനും സാധിക്കുന്നുവെന്ന് മലബാര്‍ ഗോള്‍ഡ് ആന്‍ഡ് ഡയമണ്ട്‌സ് ഇന്റര്‍നാഷനല്‍ ഓപറേഷന്‍സ് എം.ഡി ഷംലാല്‍ അഹമ്മദ് അഭിപ്രായപ്പെട്ടു.
ഹംഗര്‍ ഫ്രീ വേള്‍ഡ് പദ്ധതിയുടെ ഭാഗമായി സാംബിയയിലെ മൂന്ന് സ്‌കൂളുകള്‍ ഉള്‍പ്പെടെ 119 കേന്ദ്രങ്ങളിലായി പ്രതിദിനം 115,000ത്തിലധികം പോഷക സമൃദ്ധമായ ഭക്ഷണം വിതരണം ചെയ്യുന്നുണ്ട്. ഇന്ത്യയില്‍ മാത്രം ഗ്രൂപ്പ് 1531 മൈക്രോ ലേണിങ് സെന്ററുകള്‍ സ്ഥാപിച്ചിട്ടുണ്ട്. സാമ്പത്തികമായി പിന്നാക്കം നില്‍ക്കുന്ന 61,000ത്തിലധികം കുട്ടികള്‍ക്ക് ഇതുവഴി തുടര്‍പഠന അവസരം ലഭിച്ചു. കൂടാതെ, വനിതാ ശാക്തീകരണ ഭാഗമായി 128,000ത്തിലധികം പെണ്‍കുട്ടികള്‍ക്ക് വിദ്യാഭ്യാസത്തിനായി സ്‌കോളര്‍ഷിപ്പും നല്‍കിയിട്ടുണ്ട്.
ഇതിനു പുറമെ നിരാലംബ സ്ത്രീകളെ പുനരധിവസിപ്പിക്കുന്ന ഗ്രാന്‍ഡ്മാ ഹോം എന്ന പദ്ധതിയും ഗ്രൂപ്പ് ആവിഷ്‌കരിച്ചിട്ടുണ്ട്. ബ്രാന്‍ഡിന്റെ വിജയം നിരവധി സാമൂഹിക ക്ഷേമ പ്രവര്‍ത്തനങ്ങളിലൂടെ അതാത് പ്രദേശങ്ങളിലെ ജനങ്ങള്‍ക്ക് കൂടി പ്രയോജനപ്പെടുന്നുണ്ടെന്ന് ബ്രാന്‍ഡ് ഉറപ്പുവരുത്തുന്നുണ്ട്.

ALSO READ: ഗള്‍ഫ് രാജ്യങ്ങളുമായി ഇന്ത്യ വമ്പന്‍ സ്വതന്ത്ര വ്യാപാര കരാറിന്: ചര്‍ച്ചകള്‍ക്ക് ഔദ്യോഗിക തുടക്കം; മന്‍മോഹന്‍ സിങ്ങിന്റെ കാലത്ത് തുടങ്ങിയ ആലോചന

Summary: Malabar Gold & Diamonds, the world’s fifth-largest jewelry retailer, has reaffirmed its commitment to social responsibility by allocating AED 2.3 million for its 2026 Ramadan charity initiatives. The funds will primarily focus on distributing Iftar meals to those in need across the globe.