ന്യൂഡല്‍ഹി: പ്രധാനമന്ത്രി നരേന്ദ്രമോദിയുടെ ഇസ്‌റാഈല്‍ സന്ദര്‍ശനത്തില്‍ രൂക്ഷ പ്രതികരണവുമായി കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധി. ഇസ്‌റാഈല്‍ സെനറ്റിനെ അഭിസംബോധന ചെയ്യുമ്പോള്‍ ഗസ്സയിലെ വംശഹത്യയെ കുറിച്ച് പരാമര്‍ശിക്കുമെന്നാണ് ഞങ്ങള്‍ പ്രതീക്ഷിക്കുന്നത്. ഗസ്സന്‍ ജനതയുടെ നീതിക്കായി ആവശ്യപ്പെടുമെന്നും ഞങ്ങള്‍ കരുതുന്നു- അവര്‍ എക്‌സില്‍ കുറിച്ചു. 

ബഹുമാനപ്പെട്ട പ്രധാനമന്ത്രി ജി..വരാനിരിക്കുന്ന ഇസ്‌റാഈല്‍ യാത്രയില്‍ നെസെറ്റിനെ അഭിസംബോധന ചെയ്യുന്നതിനിടെ ഗസ്സയില്‍ ആയിരക്കണക്കിന് നിരപരാധികളായ പുരുഷന്മാരുടെയും സ്ത്രീകളുടെയും കുട്ടികളുടെയും വംശഹത്യയെക്കുറിച്ച് പരാമര്‍ശിക്കുമെന്നും അവര്‍ക്ക് നീതി ആവശ്യപ്പെടുകയും ചെയ്യുമെന്ന് ഞാന്‍ പ്രതീക്ഷിക്കുന്നു. ഒരു സ്വതന്ത്ര രാഷ്ട്രമെന്ന നിലയില്‍ നമ്മുടെ ചരിത്രത്തിലുടനീളം ഇന്ത്യ ശരിയായ കാര്യങ്ങള്‍ക്കുവേണ്ടി നിലകൊണ്ടിട്ടുണ്ട്, സത്യത്തിന്റെയും സമാധാനത്തിന്റെയും നീതിയുടെയും വെളിച്ചം ലോകത്തിന് കാണിച്ചുകൊടുക്കുന്നത് നാം തുടരണം' - അവര്‍ എക്‌സില്‍ കുറിച്ചു.

രണ്ടുദിവസത്തെ ഇസ്റാഈല്‍ സന്ദര്‍ശനത്തിനായാണ് ഇന്ന് പ്രദാനമന്ത്രി ഇസ്‌റാഈലിലേക്ക് തിരിക്കുന്നത്. ഇസ്റാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായും പ്രസിഡന്റ് ഐസക് ഹെര്‍സോഗുമായും മോദി കൂടിക്കാഴ്ച നടത്തും. അതേസമയം, ജുഡീഷ്യറിയുടെ സ്വതന്ത്ര്യം തകര്‍ക്കാന്‍ നെതന്യാഹു സര്‍ക്കാര്‍ ശ്രമിക്കുന്നുവെന്ന് ആരോപിച്ച് ഇസ്റാഈലിലെ പ്രതിപക്ഷം മോദിയുടെ നെസെറ്റ് പ്രസംഗം ബഹിഷ്‌കരിച്ചേക്കുമെന്ന് റിപ്പോര്‍ട്ടുകളുണ്ട്.

ALSO READ: മോദി ഇന്ന് ഇസ്‌റാഈലിലേക്ക്; കേന്ദ്രസര്‍ക്കാര്‍ ഫലസ്തീന്‍ ജനതയെ കൈവിട്ടെന്ന് കോണ്‍ഗ്രസ്

മോദിയുടെ ഇസ്‌റാഈല്‍ സന്ദര്‍ശനത്തില്‍ കേന്ദ്ര സര്‍ക്കാരിനെതിരേ രൂക്ഷവിമര്‍ശനവുമായി കോണ്‍ഗ്രസ് നേരത്തെ രംഗത്തു വന്നിരുന്നു. ഫലസ്തീന്‍ വിഷയത്തില്‍ ഇന്ത്യയുടെ ദീര്‍ഘകാലമായുള്ള നിലപാടുകളില്‍ നിന്ന് മോദി സര്‍ക്കാര്‍ പിന്നോട്ട് പോയെന്നും ഫലസ്തീന്‍ ജനതയെ സര്‍ക്കാര്‍ പൂര്‍ണ്ണമായും കൈവിട്ടെന്നും കോണ്‍ഗ്രസ് തുറന്നടിച്ചു. 

ഫലസ്തീന്‍ താല്‍പ്പര്യങ്ങളെ പിന്തുണയ്ക്കുന്നുവെന്ന് അവകാശപ്പെടുമ്പോഴും പ്രായോഗികമായി സര്‍ക്കാര്‍ അവരെ അവഗണിക്കുകയാണെന്ന് കോണ്‍ഗ്രസ് ജനറല്‍ സെക്രട്ടറി ജയറാം രമേഷ് കുറ്റപ്പെടുത്തി. ഗസ്സയിലെ സാധാരണക്കാര്‍ക്ക് നേരെ ക്രൂരമായ ആക്രമണങ്ങള്‍ തുടരുമ്പോഴാണ് നെതന്യാഹുവിനെ മോദി കെട്ടിപ്പിടിക്കാന്‍ പോകുന്നതെന്ന് അദ്ദേഹം പരിഹസിച്ചു. 1988 നവംബര്‍ 18ന് ഫലസ്തീന്‍ രാഷ്ട്രത്തെ ആദ്യമായി അംഗീകരിച്ച രാജ്യങ്ങളില്‍ ഒന്നാണ് ഇന്ത്യയെന്ന കാര്യം ഓര്‍മിച്ച ജയറാം രമേഷ് ഇപ്പോഴത്തെ നീക്കം ഇന്ത്യയുടെ വിദേശനയത്തിലെ വലിയ മാറ്റമാണെന്നും കൂട്ടിച്ചേര്‍ത്തു. 

priyanka gandhi criticises pm narendra modi’s israel visit, urging him to raise the issue of gaza during his address to the knesset. congress also accuses the centre of shifting india’s traditional stance on palestine.