പത്തനംതിട്ട: തെരഞ്ഞെടുപ്പ് പ്രചരണത്തിന്റെ ഭാഗമായി മുഖ്യമന്ത്രിയുടെ ഓഫിസ് നടത്തിയ ഡാറ്റ ലീക്കിങ്ങിന്റെ നിര്‍ണായക വിവരങ്ങള്‍ പുറത്തുവിട്ട് രമേശ് ചെന്നിത്തല. കെ.സ്മാര്‍ട്ട് ആപ്ലിക്കേഷനില്‍ നിന്ന് ഉദ്യോഗസ്ഥരുടെ സമ്പൂര്‍ണ വിവരങ്ങള്‍ പി.ആര്‍.ഡിക്ക് കൈമാറണമെന്ന് ആവശ്യപ്പെട്ട് കത്ത് നല്‍കിയത് മുഖ്യമന്ത്രിയുടെ ഓഫിസര്‍ ഓണ്‍ സ്പെഷല്‍ ഡ്യൂട്ടി സീറാം സാംബശിവറാവു ആണെന്ന് അദ്ദേഹം ചൂണ്ടിക്കാട്ടി. ഈ ആവശ്യമുന്നയിച്ച് സാംബശിവ റാവു 2025 ഡിസംബറില്‍ ചീഫ് മിഷന്‍ ഡയറക്ടര്‍ക്ക് അയച്ച കത്തും ചെന്നിത്തല പുറത്തുവിട്ടു.

കെ-സ്മാര്‍ട്ട് ആപ്ലിക്കേഷന്‍ നിന്ന് ഉദ്യോഗസ്ഥരുടെ സമ്പൂര്‍ണ വിവരങ്ങള്‍ പിആര്‍ഡിക്ക് കൈമാറണം എന്നാണ് കത്തില്‍ ആവശ്യപ്പെടുന്നത്. സര്‍ക്കാര്‍ ഉദ്യോസ്ഥര്‍ക്ക് പുറമെ കെ-സ്മാര്‍ട്ട് വഴി പൊതുജനങ്ങളുടെ വിവരങ്ങളും പിആര്‍ഡിക്ക് കൈമാറാന്‍ മുഖ്യമന്ത്രിയുടെ ഓഫിസ് ആവശ്യപ്പെട്ടെന്നും അദ്ദേഹം ആരോപിക്കുന്നു.

 2026 ഫെബ്രുവരി മാസത്തിന് മുമ്പ് ഉദ്യോഗസ്ഥരുടെ വിവരങ്ങള്‍ നല്‍കണമെന്നാണ് കത്തില്‍ ആവശ്യപ്പെടുന്നത്. പേര്, ഫോണ്‍ നമ്പര്‍,വയസ്, പ്രായം, ലിംഗം, ജില്ലാ,താലൂക്,വാര്‍ഡ് ഉള്‍പ്പെടെയുള്ള ഉദ്യോഗസ്ഥരുടെ എല്ലാ വ്യക്തി വിവരങ്ങളും ചോദിക്കുന്നുണ്ട്. വ്യക്തിപരമായി വിവരങ്ങള്‍ ശേഖരിക്കുകയാണെന്നാണ് കത്തില്‍ പറയുന്നത്. വിവരങ്ങള്‍ പിആര്‍ഡി ഡയറക്ടര്‍ക്ക് ഈ മാസം 12ന് മുമ്പ് കൈമാറണമെന്നും കത്തില്‍ ആവശ്യപ്പെടുന്നു. കഴിഞ്ഞ വര്‍ഷം ഡിസംബറിലാണ് സര്‍ക്കാര്‍ ജീവനക്കാരുടെ വ്യക്തി വിവരങ്ങള്‍ ആവശ്യപ്പെട്ടുകൊണ്ട് കത്ത് അയച്ചിരിക്കുന്നത്.

മുഖ്യമന്ത്രി അറിയാതെ മുഖ്യമന്ത്രിയുടെ ഒ.എസ്.ഡി ഇങ്ങനെ ഒരു കത്ത് അയക്കുമോ എന്ന് രമേശ് ചെന്നിത്തല ചോദിക്കുന്നു. മുഖ്യമന്ത്രിയുടെ നേരിട്ടുള്ള നിര്‍ദേശത്തിനടിസ്ഥാനത്തിലാണ് ഈ കത്ത് എന്നും അദേഹം ആരോപിച്ചു.

 സി.പി.എമ്മിന്റെ തെരഞ്ഞെടുപ്പ് പ്രചരണത്തിനു വേണ്ടി സര്‍ക്കാര്‍ ഡേറ്റ ദുരുപയോഗം ചെയ്യുന്നത് നിയമവിരുദ്ധമാണെന്നും അദേഹം കൂട്ടിച്ചേര്‍ത്തു. വ്യക്തിവിവരങ്ങള്‍ ശേഖരിച്ച് തെരഞ്ഞെടുപ്പ് പ്രചരണത്തിന് ഉപയോഗിക്കുന്നുവെന്ന് ചൂണ്ടിക്കാട്ടിയ അദ്ദേഹം ഒരു വ്യക്തിയുടെ സ്വകാര്യതയിലേക്ക് കടന്നു കയറി വിവരങ്ങള്‍ ശേഖരിക്കുന്നത് തെറ്റാണെന്ന് സുപ്രിംകോടതി പറഞ്ഞിട്ടുണ്ടെന്നും ഓര്‍മിപ്പിച്ചു. 

ramesh chennithala alleges that officials’ data from the k-smart application was shared with prd for election campaign purposes. he claims a letter was sent by cm office official seeram sambasiva rao seeking complete details.