അബുദബി: വിശുദ്ധ റമദാൻ മാസത്തിന്റെ പശ്ചാത്തലത്തിൽ യുഎഇയിലെ വിവിധ ഇമാറാത്തുകളിലെ ഭരണാധികാരികളെ സ്വീകരിച്ച് പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാൻ. അബുദബിയിലെ ഖസർ അൽ ബഹറിൽ നടന്ന പ്രൗഢമായ ചടങ്ങിൽ യുഎഇയുടെ വികസനവും ഭാവി പദ്ധതികളും ഭരണാധികാരികൾ ചർച്ച ചെയ്തു. സന്ദർശനാർത്ഥം രാജ്യത്തെത്തിയ ഇന്തോനേഷ്യൻ പ്രസിഡന്റ് പ്രബോവോ സുബിയാന്റോയും ചടങ്ങിൽ വിശിഷ്ടാതിഥിയായി പങ്കെടുത്തു.

യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം, ഷാർജ ഭരണാധികാരി ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി, ഫുജൈറ ഭരണാധികാരി ശൈഖ് ഹമദ് ബിൻ മുഹമ്മദ് അൽ ഷർഖി, ഉമ്മുൽ ഖുവൈൻ ഭരണാധികാരി ശൈഖ് സൗദ് ബിൻ റാഷിദ് അൽ മുഅല്ല, റാസൽഖൈമ ഭരണാധികാരി ശൈഖ് സൗദ് ബിൻ സഖർ അൽ ഖാസിമി എന്നിവർക്ക് ശൈഖ് മുഹമ്മദ് ബിൻ സായിദ് ആതിഥേയത്വം വഹിച്ചു. വൈസ് പ്രസിഡന്റും ഉപപ്രധാനമന്ത്രിയുമായ ശൈഖ് മൻസൂർ ബിൻ സായിദ് അൽ നഹ്യാനും ചടങ്ങിൽ സന്നിഹിതനായിരുന്നു.

ALSO READ: ദുബൈ വേൾഡ് ട്രേഡ് സെന്റർ റൗണ്ട്എബൗട്ടിൽ പുതിയ പാലം തുറന്നു; യാത്രാസമയം 6 മിനിറ്റിൽ നിന്ന് ഒരു മിനിറ്റായി കുറയും 

യുഎഇയുടെ സ്ഥാപക പിതാവ് പരേതനായ ശൈഖ് സായിദ് ബിൻ സുൽത്താൻ അൽ നഹ്യാന്റെ നേതൃത്വത്തിൽ 1971-ൽ രാജ്യം സ്ഥാപിതമായതിന്റെ ചരിത്രപരമായ സാക്ഷ്യങ്ങൾ ഉൾക്കൊള്ളുന്ന ഡോക്യുമെന്ററി ഭരണാധികാരികൾ ഒരുമിച്ച് കണ്ടു. രാജ്യത്തിന്റെ ഇതുവരെയുള്ള നേട്ടങ്ങളെക്കുറിച്ചും ഭാവിയിലെ വികസന കാഴ്ചപ്പാടുകളെക്കുറിച്ചും ഭരണാധികാരികൾ ആശയവിനിമയം നടത്തിയതായി ഔദ്യോഗിക വാർത്താ ഏജൻസിയായ 'വാം' റിപ്പോർട്ട് ചെയ്തു.

ഇന്തോനേഷ്യൻ പ്രസിഡന്റ് പ്രബോവോ സുബിയാന്റോയുമായി ശൈഖ് മുഹമ്മദ് ബിൻ സായിദ് ഉഭയകക്ഷി ചർച്ചകൾ നടത്തി. സാമ്പത്തികം, വ്യാപാരം, പുനരുപയോഗ ഊർജ്ജം, കൃത്രിമബുദ്ധി (AI), ഭക്ഷ്യസുരക്ഷ, സംസ്കാരം തുടങ്ങിയ മേഖലകളിൽ ഇരുരാജ്യങ്ങളും തമ്മിലുള്ള സഹകരണം വർദ്ധിപ്പിക്കുന്നതിനെക്കുറിച്ച് നേതാക്കൾ സംസാരിച്ചു.

ഭരണാധികാരികൾ, കിരീടാവകാശികൾ, ഡെപ്യൂട്ടി ഭരണാധികാരികൾ എന്നിവർക്കായി പ്രസിഡന്റ് ഒരുക്കിയ ഇഫ്താർ വിരുന്നിൽ നേതാക്കൾ ഒരുമിച്ച് മഗ്‌രിബ് നിസ്കരിച്ചു. രാജ്യത്തിന്റെ പുരോഗതിക്കും ലോകസമാധാനത്തിനുമായി പ്രത്യേക പ്രാർത്ഥനകളും ചടങ്ങിൽ നടന്നു.

uae president sheikh mohamed bin zayed hosted a special iftar banquet for the rulers of the emirates, with indonesian president prabowo subianto attending as a distinguished guest. the gathering highlighted strong bilateral ties and growing cooperation between the uae and indonesia.