ആലപ്പുഴ: തൃക്കുന്നപ്പുഴ പൊലിസ് സ്റ്റേഷനിലെ ഗ്രേഡ് എസ്‌ഐ ഹരികുമാറിനെ (55) വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. ആലപ്പുഴ കരുമാടിയിലെ സ്വന്തം വസതിയിലാണ് അദ്ദേഹത്തെ മരിച്ച നിലയിൽ കണ്ടെത്തിയത്. ഡ്യൂട്ടിക്കിടയുണ്ടായ വീഴ്ചയുമായി ബന്ധപ്പെട്ട് വകുപ്പുതല നടപടി നേരിടുന്നതിനിടെയാണ് മരണം സംഭവിച്ചത്.

സംഭവം ഇങ്ങനെ 

തൃക്കുന്നപ്പുഴ ക്ഷേത്രോത്സവത്തിനിടെ ഉണ്ടായ ഒരു സുരക്ഷാ വീഴ്ചയെ ചൊല്ലിയുള്ള മാനസിക വിഷമമാണ് മരണത്തിന് പിന്നിലെന്ന് കരുതപ്പെടുന്നു.കഴിഞ്ഞ ദിവസം തൃക്കുന്നപ്പുഴ ക്ഷേത്രത്തിലെ ഉത്സവത്തിനിടെ ചില ഗുണ്ടകൾ പൊലിസിന് നേരെ തോക്ക് ചൂണ്ടിയിരുന്നു. ഈ സംഭവത്തിൽ പ്രതികളെ പിടികൂടുന്നതിലോ സാഹചര്യം കൈകാര്യം ചെയ്യുന്നതിലോ പൊലിസിന്റെ ഭാഗത്ത് വീഴ്ചയുണ്ടായെന്ന് ആക്ഷേപം ഉയർന്നു.

ഡ്യൂട്ടിയിലുണ്ടായിരുന്ന ഹരികുമാറിന് ഈ സംഭവവുമായി ബന്ധപ്പെട്ട് ഉന്നത ഉദ്യോഗസ്ഥരിൽ നിന്നും മെമോ ലഭിച്ചിരുന്നു. ഔദ്യോഗിക നടപടികൾ നേരിടേണ്ടി വന്നതിലുള്ള കടുത്ത മാനസിക സമ്മർദ്ദമാണ് ആത്മഹത്യയിലേക്ക് നയിച്ചതെന്നാണ് പ്രാഥമിക നിഗമനം.

അന്വേഷണം ആരംഭിച്ചു

സംഭവമറിഞ്ഞ് മുതിർന്ന പൊലിസ് ഉദ്യോഗസ്ഥർ സ്ഥലത്തെത്തി പരിശോധന നടത്തി. മൃതദേഹം ഇൻക്വസ്റ്റ് നടപടികൾക്ക് ശേഷം പോസ്റ്റ്‌മോർട്ടത്തിനായി മാറ്റി. സഹപ്രവർത്തകർക്കിടയിൽ മാന്യമായ പെരുമാറ്റത്തിന് ഉടമയായിരുന്ന ഹരികുമാറിന്റെ മരണം പൊലിസ് സേനയെ ഒന്നടങ്കം ദുഃഖത്തിലാഴ്ത്തിയിരിക്കുകയാണ്. അസ്വാഭാവിക മരണത്തിന് കേസ് രജിസ്റ്റർ ചെയ്ത തൃക്കുന്നപ്പുഴ പൊലിസ് കൂടുതൽ അന്വേഷണം നടത്തിവരികയാണ്.