തിരുവനന്തപുരം: നിയമസഭാ തെരഞ്ഞെടുപ്പിൽ മത്സരിക്കില്ലെന്ന തന്റെ മുൻ നിലപാട് തിരുത്തി മുൻ ഡിജിപി ആർ. ശ്രീലേഖ. ബിജെപി നേതൃത്വം ആവശ്യപ്പെടുകയാണെങ്കിൽ താൻ സജീവ രാഷ്ട്രീയത്തിലേക്ക് ഇറങ്ങുമെന്നും വരാനിരിക്കുന്ന നിയമസഭാ തെരഞ്ഞെടുപ്പിൽ സ്ഥാനാർത്ഥിയാകുമെന്നും അവർ വ്യക്തമാക്കി. 'ഇനി കേരളം ബിജെപി ഭരിക്കണം, എങ്കിൽ മാത്രമേ ജനങ്ങൾക്ക് പൂർണ്ണമായി നീതി ലഭിക്കൂ' എന്ന തലക്കെട്ടിൽ പുറത്തുവിട്ട വീഡിയോയിലൂടെയാണ് ശ്രീലേഖ നിലപാട് വ്യക്തമാക്കിയത്.

രാഷ്ട്രീയ പ്രവേശനം ജനങ്ങൾക്കായി

നേരത്തെ സജീവ രാഷ്ട്രീയത്തിലേക്കില്ലെന്ന് അറിയിച്ചിരുന്നെങ്കിലും നിലവിലെ രാഷ്ട്രീയ സാഹചര്യങ്ങളും പിന്തുണയ്ക്കുന്നവരുടെ അഭ്യർത്ഥനയുമാണ് തീരുമാനത്തിന് പിന്നിലെന്ന് അവർ പറഞ്ഞു."ഒരു മുൻ ഡിജിപിയോട് പോലും പൊലിസ് ഇത്തരത്തിലാണ് പെരുമാറുന്നതെങ്കിൽ ഈ നാട്ടിലെ സാധാരണക്കാരുടെ അവസ്ഥ എന്താകും? നീതി ലഭിക്കാൻ ബിജെപി ഭരണം അനിവാര്യമാണ്." - ശ്രീലേഖ വീഡിയോയിൽ പറഞ്ഞു.

പോക്‌സോ കേസിനെതിരെ നിയമപോരാട്ടം

യൂട്യൂബ് വീഡിയോയിലൂടെ ഇരയുടെ പേര് വെളിപ്പെടുത്തി എന്നാരോപിച്ച് തനിക്കെതിരെ എടുത്ത പോക്‌സോ കേസിനെതിരെ ഹൈക്കോടതിയെ സമീപിക്കാനും ശ്രീലേഖ തീരുമാനിച്ചു. ഈ നടപടി തന്നെ മനഃപൂർവം വ്യക്തിഹത്യ ചെയ്യാനുള്ള നീക്കമാണെന്ന് അവർ ആരോപിക്കുന്നു.

ശ്രീലേഖ ഉയർത്തുന്ന പ്രധാന വാദങ്ങൾ:

പത്ത് വർഷം മുൻപുള്ള ബ്ലോഗിന്റെയും 2020-ലെ വീഡിയോയുടെയും പേരിലാണ് ഇപ്പോൾ കേസെടുത്തിരിക്കുന്നത്.ഭാരതീയ ന്യായ സംഹിത സെക്ഷൻ 514 പ്രകാരം, മൂന്ന് വർഷത്തിൽ താഴെ ശിക്ഷ ലഭിക്കാവുന്ന കുറ്റങ്ങളിൽ മൂന്ന് വർഷത്തിനകം കേസെടുക്കണമെന്നാണ് നിയമം. ഈ സമയപരിധി കഴിഞ്ഞ വിഷയത്തിൽ വിശദീകരണം പോലും ചോദിക്കാതെ എഫ്‌ഐആർ ഇട്ടത് നിയമവിരുദ്ധമാണ്.തെരഞ്ഞെടുപ്പ് അടുത്തിരിക്കെ തന്നെ തടയാനുള്ള രാഷ്ട്രീയ ഗൂഢാലോചനയാണ് ഈ കേസിന് പിന്നിലെന്ന് അവർ ആരോപിച്ചു.

തിരുവനന്തപുരം കോർപ്പറേഷൻ കൗൺസിലർ കൂടിയായ ശ്രീലേഖ, വട്ടിയൂർക്കാവ് ഉൾപ്പെടെയുള്ള ഏതെങ്കിലും പ്രമുഖ മണ്ഡലങ്ങളിൽ ബിജെപി സ്ഥാനാർത്ഥിയായേക്കുമെന്നാണ് സൂചനകൾ.