ദുബൈ: പ്രാദേശിക സംഘർഷങ്ങൾക്കിടയിലും ആഗോള വിപണിയിലെ ചലനങ്ങൾ പ്രതിഫലിപ്പിച്ച് യുഎഇയിൽ സ്വർണവിലയിൽ വൻ ഇടിവ്. ചൊവ്വാഴ്ച ഒറ്റദിവസം കൊണ്ട് ഗ്രാമിന് 35 ദിർഹമാണ് കുറഞ്ഞത്. സ്വർണം വാങ്ങാൻ കാത്തിരിക്കുന്നവർക്ക് ഇത് വലിയ ആശ്വാസമാകും. ആഗോളതലത്തിൽ സ്വർണ്ണവില ഔൺസിന് നാല് ശതമാനത്തിലധികം (ഏകദേശം 300 ഡോളർ) ഇടിഞ്ഞതാണ് പ്രാദേശിക വിപണിയിലും പ്രതിഫലിച്ചത്.

പുതുക്കിയ നിരക്കുകൾ ഇങ്ങനെ

24 കാരറ്റ് സ്വർണം (ഗ്രാമിന്): രാവിലെ വിപണി തുറക്കുമ്പോൾ 646.5 ദിർഹമായിരുന്ന വില വൈകുന്നേരത്തോടെ 611 ദിർഹമായി കുറഞ്ഞു.

ഇടിവ്: ഗ്രാമിന് ഏകദേശം 35.5 ദിർഹത്തിന്റെ കുറവാണ് രേഖപ്പെടുത്തിയത്.

വെള്ളിയുടെ വില: സ്വർണ്ണത്തിന് പിന്നാലെ വെള്ളി വിലയിലും വൻ ഇടിവുണ്ടായി. ഏകദേശം 10 ശതമാനത്തോളമാണ് വെള്ളിയുടെ വില കുറഞ്ഞത്.

ALSO READ: ഇന്നലെ രാവിലെ കുറഞ്ഞു, വൈകീട്ട് കൂടി, ഇന്ന് വീണ്ടും ഇടിവ്; സ്വര്‍ണ വിലയില്‍ ചാഞ്ചാട്ടം

വില കുറയാൻ കാരണം?

മേഖലയിലെ ഭൗമരാഷ്ട്രീയ സാഹചര്യങ്ങൾ നിലനിൽക്കുമ്പോഴും ആഗോള വിപണിയിലുണ്ടായ പെട്ടെന്നുള്ള മാറ്റങ്ങളാണ് വില ഇടിയാൻ കാരണമായതെന്ന് സാമ്പത്തിക വിദഗ്ധർ വിലയിരുത്തുന്നു. അന്താരാഷ്ട്ര തലത്തിൽ നിക്ഷേപകർ ലാഭമെടുപ്പ് നടത്തിയതും വിപണിയിലെ മറ്റ് സാമ്പത്തിക ഘടകങ്ങളും വിലയെ ബാധിച്ചു.

അടുത്ത ദിവസങ്ങളിൽ വില ഇനിയും താഴാൻ സാധ്യതയുണ്ടോ എന്ന് വിപണി നിരീക്ഷകർ ഉറ്റുനോക്കുകയാണ്. നിലവിലെ കുറഞ്ഞ നിരക്ക് സ്വർണം വാങ്ങുന്നവർക്കും നിക്ഷേപകർക്കും അനുകൂലമായ സാഹചര്യമാണ് ഒരുക്കിയിരിക്കുന്നത്.

gold prices in the uae plunged sharply, dropping by 35 dirhams per gram amid shifting global market trends. silver prices also recorded a significant decline. traders attribute the fall to international rate movements and fluctuating demand in regional markets today.