ദുബൈ: പശ്ചിമേഷ്യയില്‍ രൂപപ്പെട്ട സംഘര്‍ഷ സാഹചര്യം ശക്തമായതോടെ ആഗോള വിപണിയില്‍ എണ്ണവില കുതിച്ചുയരുന്നു. ഇത് യു.എ.ഇ ഉള്‍പ്പെടെയുള്ള രാജ്യങ്ങളില്‍ പലിശനിരക്ക് കുറയുമെന്ന പ്രതീക്ഷകള്‍ക്ക് മങ്ങലേല്‍പ്പിച്ചു. എണ്ണവിലയിലെ വര്‍ധനവ് പണപ്പെരുപ്പത്തിന് കാരണമാകുമെന്നതിനാല്‍, വായ്പാ പലിശനിരക്കുകള്‍ കുറയ്ക്കുന്നതിന് പകരം നിലവിലുള്ള ഉയര്‍ന്ന നിരക്കില്‍ തന്നെ തുടരാന്‍ സെന്‍ട്രല്‍ ബാങ്കുകള്‍ നിര്‍ബന്ധിതരായേക്കും.
ലോകത്തെ ക്രൂഡ് ഓയില്‍ വിതരണത്തിന്റെ 20 ശതമാനത്തോളം കടന്നുപോകുന്ന ഹോര്‍മുസ് കടലിടുക്കിലെ സുരക്ഷാ ഭീഷണിയും, അമേരിക്കയുടെയും ഇസ്‌റാഈലിന്റെയും ഇറാനെതിരായ ആക്രമണങ്ങളും വിപണിയെ വല്ലാതെ ഉലച്ചിട്ടുണ്ട്. ബ്രെന്റ് ക്രൂഡ് വില ഒരൊറ്റ സെഷനില്‍ 9 ശതമാനത്തിലധികമാണ് വര്‍ധിച്ചത്.

ഉപഭോക്താക്കളെ ബാധിക്കുന്നതിങ്ങനെ

യു.എ.ഇ ദിര്‍ഹം അമേരിക്കന്‍ ഡോളറുമായി ബന്ധിപ്പിച്ചിരിക്കുന്നതിനാല്‍, യു.എസ് ഫെഡറല്‍ റിസര്‍വ് എടുക്കുന്ന തീരുമാനങ്ങള്‍ യു.എ.ഇ സെന്‍ട്രല്‍ ബാങ്കും പിന്തുടരാറുണ്ട്. പലിശനിരക്ക് ഉയര്‍ന്ന നിലയില്‍ തുടരുന്നത് താഴെ പറയുന്ന മേഖലകളില്‍ പ്രതിഫലിക്കും:
* ഭവന വായ്പകള്‍: വായ്പാ തിരിച്ചടവ് തുക (EMI) കുറയുമെന്ന് പ്രതീക്ഷിച്ചിരുന്നവര്‍ക്ക് പലിശനിരക്ക് ഉയര്‍ന്നുനില്‍ക്കുന്നത് തിരിച്ചടിയാകും.
* വ്യക്തിഗത വായ്പകള്‍: പേഴ്‌സണല്‍ ലോണ്‍, ക്രെഡിറ്റ് കാര്‍ഡ് എന്നിവയുടെ പലിശഭാരം കുറയില്ല.
* ബിസിനസ് വായ്പകള്‍: കമ്പനികള്‍ക്ക് വായ്പയെടുക്കാനുള്ള സാഹചര്യം കടുപ്പമേറിയതായി തുടരും.

പണപ്പെരുപ്പ ഭീഷണിയും

എണ്ണവില ബാരലിന് 90 ഡോളറിന് മുകളിലേക്ക് ഉയര്‍ന്നാല്‍ അത് പണപ്പെരുപ്പത്തിന് ആക്കം കൂട്ടുമെന്ന് ദുബൈ ആസ്ഥാനമായുള്ള ഡിവിറെ ഗ്രൂപ്പ് ചീഫ് എക്‌സിക്യൂട്ടീവ് നൈജല്‍ ഗ്രീന്‍ മുന്നറിയിപ്പ് നല്‍കി. 2026 വരെ പലിശനിരക്കുകള്‍ ഉയര്‍ന്ന നിലയില്‍ തന്നെ തുടരാന്‍ ഇത് കാരണമായേക്കാം.
യു.എ.ഇയില്‍ ഇന്ധനവില പ്രതിമാസ അടിസ്ഥാനത്തില്‍ ആഗോള വിപണിക്കനുസരിച്ച് പരിഷ്‌കരിക്കാറുണ്ട്. എണ്ണവില വര്‍ധിച്ചാല്‍ പെട്രോള്‍, ഡീസല്‍ വിലയിലും അതിന്റെ പ്രതിഫലനമുണ്ടാകും. കൂടാതെ, ചരക്ക് നീക്കത്തിനുള്ള ചെലവ് വര്‍ധിക്കുന്നത് വിദേശത്തുനിന്ന് ഇറക്കുമതി ചെയ്യുന്ന ഭക്ഷ്യവസ്തുക്കളുടെയും മറ്റ് സാധനങ്ങളുടെയും വില വര്‍ധിക്കാനും ഇടയാക്കും.
നിലവിലെ സാഹചര്യത്തില്‍ മാര്‍ച്ചില്‍ കൂടുന്ന ഫെഡറല്‍ റിസര്‍വ് യോഗം പലിശനിരക്കില്‍ മാറ്റം വരുത്താന്‍ സാധ്യതയില്ലെന്നാണ് സാമ്പത്തിക വിദഗ്ധരുടെ വിലയിരുത്തല്‍. സംഘര്‍ഷം നീണ്ടുനിന്നാല്‍ ആഗോള സമ്പദ്‌വ്യവസ്ഥ വലിയ പ്രതിസന്ധിയിലേക്ക് നീങ്ങുമെന്നും ആശങ്കയുണ്ട്.

ALSO READ: പെരുന്നാള്‍ പ്രമാണിച്ച് ദുബൈയില്‍ സര്‍ക്കാര്‍ ജീവനക്കാര്‍ക്ക് ശമ്പളം നേരത്തെ; ഉത്തരവിട്ട് ശൈഖ് ഹംദാന്‍

English Summary: A sharp spike in oil prices following escalating hostilities involving Iran and Israel is complicating the outlook for interest rates, raising fresh questions for households and investors from the UAE to the US. The recent surge, which saw Brent crude spike more than 9% in a single session, followed US and Israeli strikes on Iran and Tehran’s retaliation. With reported threats to shipping through the Strait of Hormuz—a passage carrying roughly 20% of the world’s crude supply—global markets have been rattled, reigniting debates over whether central banks can proceed with anticipated rate cuts this year.