ദുബൈ: ഐസിസിയുടെ ഏറ്റവും പുതിയ ടി20 റാങ്കിംഗിൽ നേട്ടമുണ്ടാക്കി ഇന്ത്യൻ താരങ്ങൾ. ബാറ്റർമാരിൽ അഭിഷേക് ശർമ ഒന്നാം സ്ഥാനത്ത് തുടരുമ്പോൾ പാകിസ്ഥാന്റെ സഹിബ്‌സാദ ഫർഹാൻ രണ്ടാം സ്ഥാനത്തെത്തി. ഫിൽ സാൾട്ട്, ഇഷാൻ കിഷൻ, പതും നിസങ്ക എന്നിവരാണ് യഥാക്രമം ആദ്യ അഞ്ച് സ്ഥാനങ്ങളിലുള്ളത്. അതേസമയം, തിലക് വർമ ആറാം സ്ഥാനത്തും, ഇന്ത്യൻ നായകൻ സൂര്യകുമാർ യാദവ് ഏഴാം സ്ഥാനത്തുമുണ്ട്.

അതേസമയം, ടി20 റാങ്കിംഗിൽ വൻ കുതിപ്പ് നടത്തിയിരിക്കുകയാണ് മലയാളി താരം സഞ്ജു സാംസൺ. നിലവിലെ പട്ടികയിൽ 25 സ്ഥാനങ്ങൾ മെച്ചപ്പെടുത്തിയ സഞ്ജു, 40-ാം സ്ഥാനത്താണ്. വെസ്റ്റ് ഇൻഡീസിനെതിരായ നിർണ്ണായക മത്സരത്തിൽ പുറത്താകാതെ നേടിയ 97 റൺസാണ് സഞ്ജുവിനെ റാങ്കിംഗിൽ മുന്നിലെത്തിച്ചത്. ഇന്ത്യയെ സെമി ഫൈനലിൽ എത്തിക്കുന്നതിലും ഈ പ്രകടനം വലിയ പങ്കുവഹിച്ചു. 

ടി20 ലോകകപ്പിൽ മികച്ച പ്രകടനം പുറത്തെടുക്കാനായിട്ടില്ലെങ്കിലും 877 റേറ്റിംഗോടെ അഭിഷേക് ശർമ ബാറ്റർമാരുടെ പട്ടികയിൽ ഒന്നാം സ്ഥാനത്ത് തുടരുന്നു. തൊട്ടുപിന്നാലെയുള്ള പാകിസ്ഥാൻ താരം സാഹിബ്സാദ ഫർഹാന് 848 പോയിന്റാണുള്ളത്. 

അതേസമയം, ബൗളർമാരുടെ പട്ടികയിൽ വരുൺ ചക്രവർത്തി ഒന്നാമനായി തുടരുകയാണ്. 771 റേറ്റിംഗാണ് വരുണിനുള്ളത്. അഫ്ഗാനിസ്ഥാന്റെ റാഷിദ് ഖാൻ രണ്ടാം സ്ഥാനത്തുള്ള പട്ടികയിൽ, അബ്രാർ അഹമ്മദ് മൂന്നാമതും, കോർബിൻ ബോഷ് നാലാമതും, ആദിൽ റഷീദ് അഞ്ചാം സ്ഥാനത്തുമാണ്. 

ഓൾറൗണ്ടർമാരുടെ പട്ടികയിൽ സിംബാബ്വേ താരം സിക്കന്ദർ റാസയാണ് ഒന്നാത്. 328 റേറ്റിംഗാണ് റാസക്കുള്ളത്. പട്ടികയിൽ ഹാർദിക് പാണ്ഡ്യ രണ്ടാമതും, പാകിസ്ഥാന്റെ സയിം അയൂബ് മൂന്നാം സ്ഥാനത്തുമാണ്. നേപ്പാളിന്റെ ദീപേന്ദ്ര സിം​ഗ് ഐറി, അഫ്​ഗാനിസ്ഥാന്റെ അസ്മത്തുള്ള ഒമർസസായി എന്നിവരാണ് യഥാക്രമം നാലും അഞ്ചും സ്ഥാനങ്ങളിൽ.

Abhishek Sharma retains top spot in ICC T20I batting rankings, while Sahibzada Farhan jumps to second place. Ishan Kishan and Phil Salt also feature in top five, with Tilak Varma at sixth and Suryakumar Yadav at seventh.