തിരുവനന്തപുരം: നേതൃത്വത്തെ വിമര്‍ശിച്ച് പാര്‍ട്ടിയില്‍ നിന്ന് വിട്ടുനില്‍ക്കുന്ന മുതിര്‍ന്ന നേതാവ് ജി.സുധാകരനെ അനുനയിപ്പിക്കാന്‍ സിപിഎം ശ്രമം. പാര്‍ട്ടി സംസ്ഥാന സെക്രട്ടറി എം.വി.ഗോവിന്ദന്‍ ജി.സുധാകരനെ ഫോണില്‍ വിളിച്ചു. സുധാകരനെ താന്‍ പരിഹസിച്ചിട്ടില്ലെന്നും മാധ്യമങ്ങളുടെ ചോദ്യം കേട്ടാണ് ചിരിച്ചതെന്നും വിശദീകരിച്ചു. അംഗത്വം പുതുക്കണമെന്നും ആവശ്യപ്പെട്ടു. 

അദ്ദേഹത്തിന് പരിഭവം ഉണ്ടെന്ന് സമ്മതിച്ച് സിപിഎം ജനറല്‍ സെക്രട്ടറി എം.എ ബേബി.  ജി.സുധാകരനില്‍നിന്ന് സിപിഎമ്മിനോ ഇടതുപക്ഷത്തിനോ പ്രയാസമുണ്ടാക്കുന്ന യാതൊന്നും ഉണ്ടാകില്ലെന്നും അദ്ദേഹം വ്യക്തമാക്കി. കഴിഞ്ഞ ദിവസത്തെ സുധാകരന്റെ ഫെയ്സ്ബുക്ക് പോസ്റ്റ് ചില പ്രയോഗങ്ങളിലെ പരിഭവം പങ്കുവെച്ചതാണെന്നും ബേബി പറഞ്ഞു. സുധാകരനെ സിപിഎം നേതാക്കള്‍ ബന്ധപ്പെടുന്നുണ്ടെന്നും ബേബി കൂട്ടിച്ചേര്‍ത്തു.

അതേസമയം പാര്‍ട്ടിയില്‍ നിന്ന് വിട്ടുനില്‍ക്കുകയാണെന്ന് നിലപാടില്‍ ഉറച്ചുനില്‍ക്കുകയാണ് ജി.സുധാകരന്‍. കഴിഞ്ഞ നിയമസഭാ തെരഞ്ഞെടുപ്പില്‍ പാര്‍ട്ടി മാനദണ്ഡപ്രകാരം മാറ്റിനിര്‍ത്തിയതില്‍ അദ്ദേഹം അതൃപ്തനായിരുന്നു. 75 വയസ്സായതോടെ 2022-ല്‍ പാര്‍ട്ടി സംസ്ഥാന കമ്മിറ്റിയില്‍നിന്ന് ഒഴിവാക്കി. ജില്ലാ കമ്മിറ്റി ഓഫീസിനു കീഴിലുള്ള ബ്രാഞ്ചിലാണ് ഇപ്പോള്‍ പ്രവര്‍ത്തനം. ഇത്തവണ മത്സരിക്കാന്‍ താത്പര്യമുണ്ടെന്ന് പരസ്യമായി അദ്ദേഹം പറഞ്ഞിരുന്നു.

കഴിഞ്ഞയാഴ്ച ചേര്‍ന്ന ജില്ലാ സെക്രട്ടേറിയറ്റില്‍ അദ്ദേഹത്തിന്റെ പേര് അമ്പലപ്പുഴ മണ്ഡലത്തില്‍ പരിഗണനയ്ക്കു വന്നിരുന്നു. എന്നാല്‍, മാനദണ്ഡപ്രകാരം മാറ്റിനിര്‍ത്തിയവരെക്കുറിച്ച് ചര്‍ച്ച വേണ്ടെന്ന് യോഗത്തില്‍ പങ്കെടുത്ത എം.വി. ഗോവിന്ദന്‍ പറഞ്ഞു. സുധാകരന്റെ കാര്യത്തില്‍ പരിഗണനയുണ്ടോയെന്ന ചോദ്യത്തിന് ഒരു പരിഗണനയുമില്ലെന്നായിരുന്നു മാധ്യമങ്ങളോട് ഗോവിന്ദന്റെ പ്രതികരണം. ഇതിന് പിന്നാലെയായിരുന്നു ഗോവിന്ദന്‍ പരിഹസിച്ചു എന്നടക്കം ചൂണ്ടിക്കാട്ടിയുള്ള സുധാകരന്റെ പോസ്റ്റ്.