തെഹ്‌റാന്‍: ഇറാനിലെ ഭരണകൂടത്തെ അസ്ഥിരപ്പെടുത്താനായി കുര്‍ദിഷ് വിമത ഗ്രൂപ്പുകളെ ആയുധമണിയിക്കാന്‍ യു.എസ് നീക്കം. ചാരസംഘടനയായ സി.ഐ.എയാണ് ഇതുസംബന്ധിച്ച പദ്ധതി ആസൂത്രണംചെയ്യുന്നത്. ഇറാനിലെ ഭരണകൂടത്തിനെതിരേ ആഭ്യന്തര പ്രക്ഷോഭങ്ങള്‍ സംഘടിപ്പിക്കാന്‍ ലക്ഷ്യമിട്ട് കുര്‍ദ് ഗ്രൂപ്പുകളുമായി ട്രംപ് ഭരണകൂടം ചര്‍ച്ചകള്‍ നടത്തുന്നതായി സി.എന്‍.എന്‍ റിപ്പോര്‍ട്ട് ചെയ്തു.

ഡെമോക്രാറ്റിക് പാര്‍ട്ടി ഓഫ് ഇറാനിയന്‍ കുര്‍ദിസ്ഥാന്‍ (കെ.ഡി.പി.ഐ) നേതാവ് മുസ്തഫ ഹിജ്‌രിയുമായി ട്രംപ് സംസാരിച്ചതായും വരും ദിവസങ്ങളില്‍ ഇവര്‍ ഇറാനിലെ പടിഞ്ഞാറന്‍ മേഖലകളില്‍ കരയുദ്ധത്തിന് ഇറങ്ങിയേക്കുമെന്നും റിപ്പോര്‍ട്ടുകളുണ്ട്. കൂടാതെ ഇറാഖിലെ കുര്‍ദിഷ് നേതാക്കളായ മസൂദ് ബര്‍സാനി, ബാഫല്‍ തലാബാനി എന്നിവരുമായും ട്രംപ് ചര്‍ച്ച നടത്തി. കുര്‍ദിഷ് ഗ്രൂപ്പുകളെ അമേരിക്കയുമായി ബന്ധിപ്പിക്കുന്നതിനായി ഇസ്‌റാഈല്‍ ചാരസംഘടനയായ മൊസാദ് മാസങ്ങളായി സമ്മര്‍ദ്ദം ചെലുത്തിവരികയായിരുന്നു. ഇറാന്‍, ഇറാഖ്, സിറിയ എന്നിവിടങ്ങളിലെ കുര്‍ദിഷ് ഗ്രൂപ്പുകള്‍ക്കിടയില്‍ ഇസ്‌റാഈലിന് ശക്തമായ ചാര ശൃംഖലയുണ്ട്.

വടക്കന്‍ ഇറാന്റെ നിയന്ത്രണം കുര്‍ദുകളെ ഏല്‍പ്പിക്കുക വഴി ഇസ്‌റാഈലിന് സുരക്ഷിത മേഖല ഒരുക്കുക എന്നതും ഈ നീക്കത്തിന്റെ ലക്ഷ്യമാണ്. അതേസമയം, യു.എസിന്റെ ഈ പിന്തുണ എത്രത്തോളം വിശ്വസനീയമാണെന്ന കാര്യത്തില്‍ കുര്‍ദ് ഗ്രൂപ്പുകള്‍ക്കിടയില്‍ ആശങ്കയുണ്ടെന്നും, യുദ്ധം പാതിവഴിയില്‍ ഉപേക്ഷിച്ചു പോകാന്‍ അമേരിക്കയ്ക്ക് മടിയുണ്ടാകില്ലെന്നും നിരീക്ഷകര്‍ ചൂണ്ടിക്കാണിക്കുന്നു.

കുര്‍ദ് ഗ്രൂപ്പുകളെ ഉപയോഗിച്ച് ഇറാനില്‍ യു.എസ് കലാപത്തിന് നീക്കം നടക്കുന്നതായ വാര്‍ത്തകള്‍ക്കിടെ ഇറാഖിലെ ഇറാനിയന്‍ കുര്‍ദിഷ് പ്രതിപക്ഷ ഗ്രൂപ്പിന്റെ ആയുധശേഖരത്തിന് നേരെ ഡ്രോണ്‍ ആക്രമണം. ഇന്നലെ ദെകാലയില്‍ നടന്ന ആക്രമണത്തില്‍ രണ്ട് സായുധസേനാംഗങ്ങള്‍ക്ക് പരുക്കേറ്റു. ഇറാനെതിരേ ആക്രമണങ്ങള്‍ നടത്തുന്ന സായുധ സംഘങ്ങള്‍ക്ക് ഇറാഖിന്റെ വടക്കന്‍ സ്വയംഭരണ മേഖലയായ കുര്‍ദിസ്ഥാന്‍ അഭയം നല്‍കുന്നുവെന്ന് ഇറാന്‍ ദീര്‍ഘകാലമായി ആരോപിക്കുന്നുണ്ട്. ഇതിന് തിരിച്ചടിയായി ഇറാനിയന്‍ റെവല്യൂഷണറി ഗാര്‍ഡ്‌സ് ഈ മേഖലയിലെ വിമത താവളങ്ങളെ ലക്ഷ്യമിട്ട് നി.രന്തരം ആക്രമണങ്ങള്‍ നടത്താറുണ്ട്.