കുവൈത്ത് സിറ്റി: അതിർത്തികൾക്കും ദേശീയതകൾക്കുമപ്പുറം യുദ്ധം വിതയ്ക്കുന്ന ദുരന്തത്തിന്റെ പ്രതീകമായി മാറിയിരിക്കുകയാണ് 11 വയസ്സുകാരി എൽന അബ്ദുല്ല ഹുസൈൻ നിയ. ഇറാൻ-അമേരിക്ക-ഇസ്റാഈൽ സംഘർഷങ്ങൾക്കിടെ കുവൈത്തിലെ ജനവാസ മേഖലയിൽ മിസൈൽ അവശിഷ്ടങ്ങൾ തകർന്നു വീണുണ്ടായ അപകടത്തിലാണ് ഈ കൊച്ചുപെൺകുട്ടിക്ക് ജീവൻ നഷ്ടമായത്. മാർച്ച് 4-ന് പുലർച്ചെ 12 മണിയോടെ കുവൈത്ത് സിറ്റിയിലായിരുന്നു നാടിനെ നടുക്കിയ സംഭവം.

തന്റെ കുരുന്നുമകളുടെ വേർപാടിൽ തകർന്നുപോയ പിതാവ്, ആ കറുത്ത രാത്രിയിലെ ഓർമ്മകൾ പ്രാദേശിക മാധ്യമങ്ങളോട് പങ്കുവെച്ചു. "അവൾ എനിക്ക് ദൈവം നൽകിയ അനുഗ്രഹമായിരുന്നു, അവളെയവൻ തിരികെ വിളിച്ചു. എല്ലാത്തിനും അൽഹംദുലില്ലാഹ്," വിറയ്ക്കുന്ന ശബ്ദത്തോടെ അദ്ദേഹം പറഞ്ഞു. കുവൈത്തിൽ ജനിച്ച എൽന, അപകടസമയത്ത് തന്റെ അനുജത്തിക്കൊപ്പം മുറിയിൽ ഉറങ്ങുകയായിരുന്നു. വീടിന് മുകളിലേക്ക് മിസൈൽ അവശിഷ്ടങ്ങൾ തകർന്നു വീണപ്പോൾ എൽനയ്ക്ക് മാരകമായി പരുക്കേറ്റു. ഉടൻ തന്നെ മെഡിക്കൽ സംഘമെത്തി പുനരുജ്ജീവന ശ്രമങ്ങൾ നടത്തിയെങ്കിലും ജീവൻ രക്ഷിക്കാനായില്ല. എൽനയുടെ സഹോദരി നിസാര പരുക്കുകളോടെ രക്ഷപ്പെട്ടു.

ALSO READ: സോഷ്യൽ മീഡിയ ദുരുപയോഗം; കുവൈത്തിൽ മൂന്നുപേർ പിടിയിൽ

'സ്വർഗത്തിലെ പക്ഷി': ആദരാഞ്ജലികളുമായി കുവൈത്ത്

എൽനയുടെ വിയോഗത്തിൽ കുവൈത്ത് സമൂഹത്തിൽ നിന്ന് വലിയ തോതിലുള്ള പിന്തുണയും ആശ്വാസവുമാണ് കുടുംബത്തിന് ലഭിക്കുന്നത്. മുൻ നാഷണൽ അസംബ്ലി സ്പീക്കർ മർസൂഖ് അൽ-ഗാനിം എൽനയുടെ പിതാവിനെ സന്ദർശിക്കുകയും അനുശോചനം അറിയിക്കുകയും ചെയ്തു.

"സ്വന്തം വീടിന്റെ സുരക്ഷിതത്വത്തിനുള്ളിൽ അണഞ്ഞുപോയ ആ ചെറിയ ആത്മാവ്, ലോകത്തിന്റെ ഭാരങ്ങളൊന്നും അറിയാത്തവളായിരുന്നു. കുവൈത്തിൽ താമസിക്കുന്ന എല്ലാവരെയും ഞങ്ങൾ ഞങ്ങളിലൊരാളായി തന്നെയാണ് കാണുന്നത്. അവൾ സ്വർഗത്തിലെ ഒരു പക്ഷിയായിരിക്കട്ടെ," അൽ-ഗാനിം പറഞ്ഞു.

ഈ ദുഷ്‌കരമായ സമയത്ത് കുവൈത്ത് സർക്കാരും ജനങ്ങളും നൽകുന്ന പിന്തുണയ്ക്ക് എൽനയുടെ പിതാവ് നന്ദി രേഖപ്പെടുത്തി. മാർച്ച് 4-ന് ഇഷാ പ്രാർത്ഥനയ്ക്ക് ശേഷം കുവൈത്തിലെ സുലൈബിഖാത്ത് ഖബർസ്ഥാനിൽ നൂറുകണക്കിന് ആളുകളുടെ സാന്നിധ്യത്തിൽ എൽനയുടെ മൃതശരീരം ഖബറടക്കി. പ്രായഭേദമന്യേ നിരപരാധികളെ ബാധിക്കുന്ന യുദ്ധത്തിന്റെ ഭീകരതയാണ് എൽനയുടെ മരണം വീണ്ടും ലോകത്തിന് മുന്നിൽ തുറന്നുകാട്ടുന്നത്.

an 11 year old girl, elna, was killed after missile debris fell in kuwait amid regional tensions. her father shared emotional memories of his daughter, highlighting the human cost of conflict and the grief faced by families.