വാഷിങ്ടൺ: ഇറാനെതിരെയുള്ള സൈനിക നടപടികളുമായി മുന്നോട്ട് പോകാൻ പ്രസിഡന്റ് ഡൊണാൾഡ് ട്രംപിന് യുഎസ് സെനറ്റിന്റെ അംഗീകാരം. യുദ്ധം അവസാനിപ്പിക്കുക എന്ന ലക്ഷ്യത്തോടെ ഡെമോക്രാറ്റ് അംഗം ടിം കെയ്ൻ അവതരിപ്പിച്ച 'വാർ പവേഴ്‌സ് പ്രമേയം' (War Powers Resolution) സെനറ്റിൽ പരാജയപ്പെട്ടു. 100 അംഗ സെനറ്റിൽ 53 പേർ പ്രമേയത്തെ എതിർത്ത് വോട്ട് ചെയ്തതോടെ ട്രംപിന്റെ യുദ്ധാധികാരങ്ങൾ നിയന്ത്രിക്കാനുള്ള നീക്കം പാളി. 47 പേർ മാത്രമാണ് പ്രമേയത്തെ അനുകൂലിച്ചത്.

കോൺഗ്രസിന്റെ മുൻകൂർ അനുമതിയില്ലാതെ ഇറാനെതിരെ തുടർ സൈനിക നടപടികൾ പാടില്ലെന്നായിരുന്നു പ്രമേയത്തിലെ പ്രധാന ആവശ്യം. വോട്ടെടുപ്പിൽ കക്ഷിരാഷ്ട്രീയത്തിന് അതീതമായ ചില നീക്കങ്ങളും ശ്രദ്ധേയമായി. റിപ്പബ്ലിക്കൻ സെനറ്ററായ റാൻഡ് പോൾ പ്രമേയത്തെ അനുകൂലിച്ചപ്പോൾ, ഡെമോക്രാറ്റിക് സെനറ്ററായ ജോൺ ഫെറ്റർമാൻ പ്രമേയത്തെ എതിർത്ത് വോട്ട് ചെയ്തത് രാഷ്ട്രീയ കേന്ദ്രങ്ങളിൽ ചർച്ചയായിട്ടുണ്ട്.

'മാഗ' സഖ്യത്തിൽ വിള്ളൽ; ട്രംപിനെതിരെ ഉറ്റവർ

ട്രംപിന്റെ ഏറ്റവും വലിയ ശക്തികേന്ദ്രമായ 'മാഗ' (Make America Great Again) പ്രസ്ഥാനത്തിനുള്ളിൽ തന്നെ ഇറാൻ യുദ്ധത്തെച്ചൊല്ലി വലിയ രീതിയിലുള്ള ഭിന്നത രൂപപ്പെട്ടിരിക്കുകയാണ്. ട്രംപിന്റെ വിശ്വസ്തരും തീവ്ര വലതുപക്ഷ പ്രചാരകരുമായ ടക്കർ കാൾസൺ, മെഗിൻ കെല്ലി, മാറ്റ് വാൾഷ് എന്നിവർ പരസ്യമായി രംഗത്തെത്തി.

ടക്കർ കാൾസൺ: ഇസ്റാഈലിന്റെ സമ്മർദ്ദത്തിന് വഴങ്ങിയാണ് ട്രംപ് യുദ്ധത്തിനിറങ്ങിയതെന്നും ഇത് "വെറുപ്പുളവാക്കുന്നതാണെന്നും" അദ്ദേഹം വിമർശിച്ചു. തീരുമാനങ്ങൾ എടുക്കുന്നത് അമേരിക്കയല്ല, മറിച്ച് ബെഞ്ചമിൻ നെതന്യാഹുവാണെന്നും കാൾസൺ കുറ്റപ്പെടുത്തി.

മെഗിൻ കെല്ലി: വിദേശ രാജ്യങ്ങൾക്ക് വേണ്ടി അമേരിക്കൻ സൈനികർ മരിക്കേണ്ട കാര്യമില്ലെന്ന് കെല്ലി വ്യക്തമാക്കി. അമേരിക്കൻ സൈനികർ മരിക്കുന്നത് ഇറാനോ ഇസ്റാഈലിനോ വേണ്ടിയാണെന്നും അവർ കൂട്ടിച്ചേർത്തു.

യുദ്ധം നീളുമെന്ന് സൂചന; ആശങ്കയോടെ നാറ്റോ

യുദ്ധം കുറഞ്ഞത് എട്ടാഴ്ചയെങ്കിലും നീണ്ടുനിന്നേക്കാമെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് കഴിഞ്ഞ ദിവസം സൂചിപ്പിച്ചിരുന്നു. കൃത്യമായൊരു 'എക്സിറ്റ് പ്ലാൻ' (Exit Strategy) ഇല്ലാതെയാണ് ട്രംപ് ഭരണകൂടം യുദ്ധത്തിലേക്ക് ചാടിയതെന്ന വിമർശനം ശക്തമാണ്. അമേരിക്കൻ സൈനികരുടെ ജീവൻ അപകടത്തിലാക്കുന്ന നടപടിക്കെതിരെ രാജ്യത്തിനകത്തും പ്രതിഷേധം ഉയരുന്നുണ്ട്.

അതിനിടെ, തുർക്കിയുടെ വ്യോമാതിർത്തി ലംഘിച്ച ഇറാനിയൻ ബാലിസ്റ്റിക് മിസൈൽ നാറ്റോ (NATO) സഖ്യസേന തകർത്തു. നാറ്റോ അംഗമായ തുർക്കിക്ക് നേരെയുണ്ടായ ഈ നീക്കം സംഘർഷം ആഗോളതലത്തിലേക്ക് വ്യാപിക്കുമോ എന്ന ആശങ്ക വർധിപ്പിച്ചിട്ടുണ്ട്. നിലവിലെ സാഹചര്യങ്ങൾ സൂക്ഷ്മമായി നിരീക്ഷിച്ചു വരികയാണെന്ന് നാറ്റോ വൃത്തങ്ങൾ അറിയിച്ചു.