ന്യൂഡല്‍ഹി: ഇന്ത്യന്‍ കമ്പനികള്‍ക്ക് റഷ്യന്‍ എണ്ണ വാങ്ങാന്‍ യു.എസ് താല്‍ക്കാലിക അനുമതി നല്‍കിയ വിഷയത്തില്‍ കേന്ദ്രത്തിനെതിരെ രൂക്ഷ വിമര്‍ശനവും പരിഹാസവുമായി കോണ്‍ഗ്രസ് എം.പി ജയറാം രമേശ്. അമേരിക്കയുടെ ഈ ബ്ലാക്ക് മെയില്‍ എത്രകാലം തുടരുമെന്നാണ് അദ്ദേഹത്തിന്റെ ചോദ്യം. 

'ട്രംപിന്റെ പുതിയ കളി. പുടിന്റെ കയ്യില്‍ നിന്ന് എണ്ണ വാങ്ങാമെന്ന് ഡല്‍ഹിയിലെ ചങ്ങാതിക്ക് അനുമതി നല്‍കിയിരിക്കുകയാണ്. എത്രകാലം അമേരിക്കയുടെ ഈ ബ്ലാക്ക് മെയില്‍ തുടരും' അദ്ദേഹം എക്‌സില്‍ കുറിച്ചു. യു.എസ് ട്രഷറി സെക്രട്ടറി സ്‌കോട്ട് ബെസ്സന്റിന്റെ എക്‌സ് പോസ്റ്റ് പങ്കുവെച്ചാണ് ജയറാം രമേശിന്റെ പരിഹാസം. 

റഷ്യയില്‍ നിന്ന് എണ്ണ  വാങ്ങാന്‍ 30 ദിവസത്തെ ഇളവാണ് അമേരിക്കന്‍ ട്രഷറി വകുപ്പ് ഇന്ത്യക്ക് നല്‍കിയത്. കടലില്‍ കുടുങ്ങികിടക്കുന്ന റഷ്യന്‍ കപ്പലുകളില്‍നിന്ന് എണ്ണ വാങ്ങുന്നതിനാണ് ഇളവെന്നും രാജ്യാന്തര വിപണിയിലേക്ക് തടസ്സമില്ലാതെ എണ്ണ ലഭ്യത ഉറപ്പാക്കുകയാണ് ലക്ഷ്യമെന്നും ഇതിന് വിശദീകരണമായി യു.എസ് ട്രഷറി സെക്രട്ടറി സ്‌കോട്ട് ബെസ്സന്റ് അറിയിച്ചിട്ടുണ്ട്. 

ALSO READ: ആശ്വാസം; റഷ്യന്‍ എണ്ണ വാങ്ങാന്‍ ഇന്ത്യന്‍ കമ്പനികള്‍ക്ക് അമേരിക്ക അനുമതി നല്‍കി, ഇളവ് 30 ദിവസത്തേക്ക് 

യു.എസുമായുള്ള വ്യാപാര കരാറിനെതിരെ തന്നെ നേരത്തെ പ്രതിപക്ഷ പാര്‍ട്ടികള്‍ രംഗത്തെത്തിയിരുന്നു. അമേരിക്കക്ക് മുന്നില്‍ ഇന്ത്യ കീഴടങ്ങിയെന്നാണ് അവര്‍ ആരോപിച്ചത്. ഇന്ത്യയുടെയും കര്‍ഷകരുടെയും താല്‍പര്യങ്ങള്‍ക്ക് വിരുദ്ധമാണ് കരാറെന്നും ട്രംപിന്റെ ഭീഷണിക്കു മുന്നില്‍ കീഴടങ്ങുകയാണ് ഇന്ത്യ ചെയ്തിരിക്കുന്നതെന്നും പ്രതിപക്ഷം ചൂണ്ടിക്കാട്ടിയ റഷ്യയില്‍നിന്നുള്ള എണ്ണ ഇറക്കുമതി കുറക്കാം എന്ന വ്യവസ്ഥയിലാണ് ഇന്ത്യക്കുള്ള ഇറക്കുമതി തീരുവയില്‍ ഇളവ് വരുത്താന്‍ യു.എസ് തീരുമാനിച്ചത്.

ഇതിന് പിന്നാലെ ഘട്ടംഘട്ടമായി റഷ്യയില്‍നിന്നുള്ള എണ്ണ ഇറക്കുമതി ഇന്ത്യ കുറച്ചുകൊണ്ടുവരികയാണ് എന്ത്യ. അതേസമയം, റഷ്യന്‍ എണ്ണ വാങ്ങുന്നത് നിര്‍ത്തുമോ എന്ന ചോദ്യത്തോട് കേന്ദ്ര സര്‍ക്കാര്‍ പരസ്യമായി പ്രതികരിക്കാന്‍ ഇതുവരെ തയാറായിട്ടില്ല.  രാജ്യത്ത് ആവശ്യമുള്ള എണ്ണയുടെ 88 ശതമാനത്തോളം ഇറക്കുമതിയാണ്.ഇറാന്‍ ഹോര്‍മുസ് കടലിടുക്ക് കപ്പല്‍പാത അടച്ചതോടെ എണ്ണ ലഭ്യതയുടെ കാര്യത്തില്‍ രാജ്യം കടുത്ത പ്രതിസന്ധിയാണ് മുന്നില്‍ കാണുന്നത്. 

ALSO READ: 'ആദ്യം ഇറാന്‍ പിന്നെ ക്യൂബ...എപ്പോഴെന്ന് മാത്രമേ അറിയാനുള്ളൂ'  ഭീഷണിയുമായി ട്രംപ് 

രാജ്യത്ത് ആവശ്യമുള്ളതിന്റെ 50 ശതമാനത്തോളം എണ്ണയും  ഹോര്‍മുസ് കടലിടുക്ക് വഴിയാണ് എത്തുന്നത്. എണ്ണ വരവ് തടസ്സപ്പെട്ടത് രാജ്യത്ത് വിലക്കയറ്റ ആശങ്ക ഉയര്‍ത്തിയിരുന്നു.താല്‍ക്കാലികമായെങ്കിലും റഷ്യന്‍ എണ്ണ ഏറ്റെടുക്കാന്‍ അനുമതി ലഭിച്ചത് ഇന്ത്യക്ക് വലിയ ആശ്വാസമാകും.

congress leader jairam ramesh criticized the united states after it granted india a temporary 30-day approval to continue buying russian oil, questioning how long such pressure tactics would continue.