കൊച്ചി: എച്ച്ഡിഎഫ്‌സി ബാങ്ക് ഉപഭോക്താക്കൾക്ക് ഇനി എടിഎം ഇടപാടുകളിൽ കൂടുതൽ ജാഗ്രത വേണ്ടിവരും. കാർഡ് ഇല്ലാതെ യുപിഐ (Google Pay, PhonePe തുടങ്ങിയവ) ഉപയോഗിച്ച് എടിഎമ്മുകളിൽ നിന്ന് പണം പിൻവലിക്കുന്ന രീതിക്കും ഇനി മുതൽ ബാങ്ക് നിയന്ത്രണം ഏർപ്പെടുത്തുന്നു. ഏപ്രിൽ 1 മുതൽ പ്രാബല്യത്തിൽ വരുന്ന പുതിയ നിയമപ്രകാരം, യുപിഐ വഴിയുള്ള പണം പിൻവലിക്കലും സാധാരണ എടിഎം ഇടപാടുകളുടെ ഗണത്തിൽ തന്നെ ഉൾപ്പെടുത്തും.

നിലവിൽ എടിഎം കാർഡ് ഉപയോഗിച്ച് പണമെടുക്കുന്നതിനാണ് ബാങ്കുകൾ 'സൗജന്യ പരിധി' നിശ്ചയിച്ചിരുന്നത്. എന്നാൽ പുതിയ പരിഷ്കാരത്തോടെ, യുപിഐ ഉപയോഗിച്ച് നടത്തുന്ന പണം പിൻവലിക്കലുകളും ഈ മാസത്തെ സൗജന്യ ഇടപാടുകളുടെ എണ്ണത്തിൽ കണക്കാക്കും.

സാധാരണയായി ഒരു ബാങ്ക് മാസത്തിൽ 3 മുതൽ 5 വരെ സൗജന്യ ഇടപാടുകളാണ് നൽകുന്നത്. ഉദാഹരണത്തിന്, നിങ്ങൾ 3 തവണ കാർഡ് ഉപയോഗിച്ചും 2 തവണ യുപിഐ വഴിയും പണമെടുത്താൽ നിങ്ങളുടെ ആ മാസത്തെ സൗജന്യ പരിധി അവസാനിക്കും.

സൗജന്യ പരിധി കഴിഞ്ഞാൽ നടത്തുന്ന ഓരോ ഇടപാടിനും 23 രൂപയും ജിഎസ്ടിയും ഉൾപ്പെടെ ഏകദേശം 27 രൂപയോളം ഉപഭോക്താവ് അധികമായി നൽകേണ്ടി വരും.

എന്താണ് ശ്രദ്ധിക്കേണ്ടത്?

പഴ്സിൽ കാർഡ് ഇല്ലാത്ത സമയങ്ങളിൽ ഫോൺ ഉപയോഗിച്ച് എളുപ്പത്തിൽ പണമെടുക്കാമെന്ന സൗകര്യം പലരും അമിതമായി ഉപയോഗിക്കാറുണ്ട്. എന്നാൽ ഏപ്രിൽ 1 മുതൽ ഇത്തരം ഓരോ പിൻവലിക്കലും നിങ്ങളുടെ ഫ്രീ ലിമിറ്റിനെ ബാധിക്കുമെന്ന കാര്യം മറക്കരുത്. എടിഎമ്മുകളിലും പണം നിക്ഷേപിക്കാനും പിൻവലിക്കാനും സൗകര്യമുള്ള സിആർഎം (CRM) മെഷീനുകളിലും ഈ നിയമം ബാധകമായിരിക്കും. അനാവശ്യമായ സർവീസ് ചാർജുകൾ ഒഴിവാക്കാൻ ഉപഭോക്താക്കൾ തങ്ങളുടെ മാസത്തെ എടിഎം ഇടപാടുകൾ കൃത്യമായി പ്ലാൻ ചെയ്യേണ്ടതുണ്ട്.

Starting April 1, HDFC Bank will treat cardless UPI cash withdrawals the same as regular ATM transactions. This means every time you use a QR code to withdraw cash via apps like Google Pay or PhonePe, it will count toward your monthly free limit (usually 3 to 5 transactions).