ചേകാടി: മൂന്ന് വശവും നിബിഡവനവും ഒരുവശത്ത് കബനിനദിയുമായി ഒറ്റപ്പെട്ടുകിടക്കുന്ന ചേകാടിയെന്ന കുഗ്രാമത്തിലെ ജനങ്ങളുടെ സ്വപ്നമായിരുന്നു കബനിനദിക്ക് കുറുകെ ഒരു പാലമെന്നത്. കഴിഞ്ഞ ഇടതുപക്ഷ സര്‍ക്കാരിന്റെ കാലത്താണ് ചേകാടിക്കാരുടെ സ്വപനം യാഥാര്‍ഥ്യമായത്. അന്നത്തെ (ഇന്നും) സംസ്ഥാന ധനകാര്യവകുപ്പ് മന്ത്രിയായിരുന്ന തോമസ് ഐസക്കായിരുന്നു പാലത്തിന്റെ ശിലാസ്ഥാപനകര്‍മം നിര്‍വഹിച്ചത്. പിന്നീടുളള ഇടതു സര്‍ക്കാരിന്റെ കാലത്ത് പാലത്തിന്റെ നിര്‍മാണ പ്രവര്‍ത്തികള്‍ അതിവേഗം നടന്നു. എന്നാല്‍ നദിക്കു കുറുകെ പാലം പണിതതല്ലാതെ പാലത്തിലേക്ക് കയറുവാനുളള റോഡുമാത്രം പണിതില്ല. ഈ അവസ്ഥയിലും കഴിഞ്ഞ തെരഞ്ഞെടുപ്പിനു തൊട്ടുമുമ്പായി പാലത്തിന്റെ ഉദ്ഘാടനം നടത്തുവാന്‍ ചിലര്‍ ശ്രമിച്ചെങ്കിലും പാലത്തിന്റെ അപ്രോച്ച് റോഡിന്റെ പണികൂടി കഴിക്കാതെ ഉദ്ഘാടനം വേണ്ടെന്ന കര്‍ശന നിലപാട് നാട്ടുകാര്‍ എടുത്തതോടെ പാതിവഴിക്കുള്ള ഉദ്ഘാടനം നടന്നില്ല. ഇപ്പോള്‍ ചേകാടിപാലം ആകാശത്ത് ഉയര്‍ന്നു നില്‍ക്കുകയാണ്. മുമ്പ് പാലത്തിന് ശിലാസ്ഥാപനം നടത്തിയ മന്ത്രിതന്നെ വീണ്ടും സംസ്ഥാന ധനകാര്യവകുപ്പ് മന്ത്രിയായതോടെ അപ്രോച്ച് റോഡുകീടി നിര്‍മിച്ച് പാലം ജനങ്ങള്‍ക്ക് ഉപകാരപ്രദമാക്കുമെന്ന വിശ്വാസത്തിലാണ് ജനങ്ങള്‍.