കാഠ്മണ്ഡു: നേപ്പാളിലെ ജെന്‍ സീ പ്രക്ഷോഭത്തില്‍ അന്വേഷണ സമിതി റിപ്പോര്‍ട്ട് സമര്‍പ്പിച്ചു. അന്നത്തെ കെപി ശര്‍മ ഒലി സര്‍ക്കാരിനെതിരെ ഗുരുതര ആരോപണങ്ങളാണ് റിപ്പോര്‍ട്ടിലുള്ളത്. കഴിഞ്ഞ സെപ്റ്റംബറിലുണ്ടായ പ്രക്ഷോഭത്തില്‍ ഇരുപതിന് മുകളില്‍ പൗരന്‍മാര്‍ കൊല്ലപ്പെട്ടെന്നാണ് കണക്ക്.

ഇടക്കാല പ്രധാനമന്ത്രി സുശീല കര്‍ക്കിക്കാണ് സമിതി റിപ്പോര്‍ട്ട് സമര്‍പ്പിച്ചത്. സുപ്രീം കോടതി മുന്‍ ജസ്റ്റിസ് ഗൗരി ബഹദൂര്‍ കര്‍ക്കി അധ്യക്ഷയായ സമിതിയാണ് അന്വേഷണം നടത്തിയത്. പ്രക്ഷോഭകാരികളുടെ മരണത്തിന് ഇടയാക്കിയ വെടിവെപ്പിന് ഉത്തരവാദികളായവരെ പേരുവിവരങ്ങള്‍ സര്‍ക്കാര്‍ പുറത്തുവിട്ടിട്ടില്ല. 22 യുവാക്കള്‍ സെപ്റ്റംബര്‍ എട്ടിലെ വെടിവെപ്പിലാണ് കൊല്ലപ്പെട്ടത്. ആകെ 76 പേര്‍ പ്രക്ഷോഭത്തിനിടെ കൊല്ലപ്പെട്ടെന്നാണ് കണക്ക്. 

ALSO READ: കൊല്ലം തീരത്ത് ബോട്ടില്‍ കപ്പലിടിച്ചുണ്ടായ അപകടം; മരിച്ച രണ്ട് മത്സ്യത്തൊഴിലാളികളുടെ മൃതദേഹം കണ്ടെത്തി

സമൂഹമാധ്യങ്ങള്‍ക്ക് നിരോധനം ഏര്‍പ്പെടുത്തിയ സര്‍ക്കാര്‍ നടപടിക്ക് പിന്നാലെയാണ് രാജ്യവ്യാപകമായ പ്രതിഷേധം ആളിക്കത്തിയത്. ശര്‍മ ഒലി സര്‍ക്കാരിനെതിരെ യുവാക്കള്‍ തെരുവിലിറങ്ങി. നഗര പ്രദേശങ്ങളില്‍ നിന്ന് ആരംഭിച്ച പ്രതിഷേധം പിന്നീട് രാജ്യമൊട്ടാകെ പടരുകയായിരുന്നു. അഴിമതി, തൊഴിലില്ലായ്മ, പട്ടിണി, രാഷ്ട്രീയക്കാരുടെ ധൂര്‍ത്ത് എന്നിവയ്‌ക്കെതിരെ ജനം തെരുവിലിറങ്ങി. സര്‍ക്കാരും പ്രതിഷേധക്കാരും തമ്മിലുള്ള ഏറ്റുമുട്ടലില്‍ നിരവധി പേര്‍ മരിച്ചു. അതില്‍ കൂടുതല്‍ പേര്‍ക്ക് പരിക്കേറ്റു. 

പ്രക്ഷോഭത്തിനൊടുവില്‍ സര്‍ക്കാര്‍ നിലംപൊത്തി. തുടര്‍ന്ന് നടത്തിയ പൊതുതിരഞ്ഞെടുപ്പില്‍ മുന്‍ റാപ്പര്‍ ബാലേന്ദ്ര ഷായുടെ നേതൃത്വത്തില്‍ പുതുതായി രൂപീകരിച്ച രാഷ്ട്രീയ പാര്‍ട്ടിയാണ് ലീഡ് നേടിയത്. നിലവില്‍ മുന്‍ സൂപ്രീംകോടതി ചീഫ് ജസ്റ്റിസായിരുന്ന സുശീല കര്‍ക്കിയുടെ നേതൃത്വത്തിലെ ഇടക്കാല സര്‍ക്കാരാണ് ഭരണത്തിലുള്ളത്. 35 കാരനായ ബാലേന്ദ്ര ഷാ അടുത്ത പ്രധാനമന്ത്രിയാകുമെന്നാണ് റിപ്പോര്‍ട്ട്.