പത്തനംതിട്ട: തുമ്പമൺ പഞ്ചായത്ത് ഓഫീസിന് സമീപം യുവതിക്ക് നേരെ ആൺസുഹൃത്തിന്റെ ക്രൂരമായ ആക്രമണം. കിളിമാനൂർ സ്വദേശിനി ബിന്ദുവിനാണ് തലയ്ക്ക് വെട്ടേറ്റത്. സംഭവത്തിൽ ആലപ്പുഴ സ്വദേശിയായ സുമേഷിനെ പൊലിസ് അറസ്റ്റ് ചെയ്തു.

സംഭവം ഇങ്ങനെ:

തിങ്കളാഴ്ച ഉച്ചയോടെയാണ് സംഭവം നടന്നത്. നടുറോഡിൽ വെച്ച് സുമേഷ് ബിന്ദുവിനെ തടഞ്ഞുനിർത്തുകയും കയ്യിലുണ്ടായിരുന്ന ആയുധം ഉപയോഗിച്ച് തലയ്ക്ക് വെട്ടുകയുമായിരുന്നു.

ALSO READ: 200-ലേറെ സാക്ഷികൾ, സ്പെഷ്യൽ പ്രോസിക്യൂട്ടർ; ഇലന്തൂർ നരബലി കേസിൽ നിർണ്ണായക വിചാരണ നടപടികൾക്ക് തുടക്കം

ആക്രമണത്തിൽ പരിക്കേറ്റ ബിന്ദുവിനെ ഉടൻ തന്നെ അടൂർ ഗവൺമെന്റ് ആശുപത്രിയിൽ പ്രവേശിപ്പിച്ചു. ബിന്ദുവിന്റെ പരിക്ക് അതീവ ഗുരുതരമല്ലെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.

സുമേഷും ബിന്ദുവും തമ്മിൽ ദീർഘകാലമായി സൗഹൃദത്തിലായിരുന്നു. എന്നാൽ അടുത്തിടെ ഇവർ തമ്മിൽ അകന്നതായും ഇതിലുള്ള വൈരാഗ്യമാണ് ആക്രമണത്തിന് പ്രേരിപ്പിച്ചതെന്നും പോലീസ് കരുതുന്നു.

പൊലിസ് നടപടി:

ആക്രമണത്തിന് ശേഷം ഒളിവിൽ പോകാൻ ശ്രമിച്ച സുമേഷിനെ നാട്ടുകാരുടെ സഹായത്തോടെ പൊലിസ് വേഗത്തിൽ പിടികൂടി. ഇയാൾക്കെതിരെ വധശ്രമത്തിന് കേസെടുത്തിട്ടുണ്ട്. സംഭവസ്ഥലത്ത് പൊലിസ് പരിശോധന നടത്തി തെളിവുകൾ ശേഖരിച്ചു.