അബുദബി/ജനീവ: മധ്യപൂർവ്വേഷ്യയിൽ യുദ്ധസമാനമായ സാഹചര്യം നിലനിൽക്കെ, ഇറാനെതിരായ സൈനിക നീക്കങ്ങൾക്കായി തങ്ങളുടെ പ്രദേശം ഉപയോഗിക്കാൻ അനുവദിക്കില്ലെന്ന് യുഎഇ. രാജ്യത്തെ സിവിലിയൻ കേന്ദ്രങ്ങൾക്ക് നേരെ ഇറാനിൽ നിന്ന് ആക്രമണങ്ങൾ ഉണ്ടായ പശ്ചാത്തലത്തിലും, മേഖലയിലെ സംഘർഷം ലഘൂകരിക്കാനാണ് തങ്ങൾ ആഗ്രഹിക്കുന്നതെന്ന് യുഎഇ അറിയിച്ചു.

താവളങ്ങൾ വിട്ടുനൽകില്ലെന്ന് ഔദ്യോഗിക സ്ഥിരീകരണം

ജനീവയിലെ ഐക്യരാഷ്ട്രസഭയുടെയും മറ്റ് അന്താരാഷ്ട്ര സംഘടനകളുടെയും യുഎഇ സ്ഥിരം പ്രതിനിധി ജമാൽ അൽ മുഷാറഖ് ആണ് രാജ്യത്തിന്റെ നിലപാട് വ്യക്തമാക്കിയത്. ഇറാനെതിരെയുള്ള പ്രവർത്തനങ്ങൾക്കായി ഇമാറാത്തി സൈനിക താവളങ്ങൾ ഉപയോഗിക്കുന്നുണ്ടെന്ന വാർത്തകൾ അദ്ദേഹം പൂർണ്ണമായും നിഷേധിച്ചു.

"ഇറാനെ ആക്രമിക്കാൻ ഞങ്ങളുടെ താവളങ്ങൾ ഉപയോഗിക്കുന്നില്ല. അത്തരമൊരു സംഘർഷത്തിൽ യുഎഇ പങ്കാളികളാകില്ലെന്ന് നിലവിലെ സംഭവങ്ങൾക്ക് മുൻപ് തന്നെ ഞങ്ങൾ വളരെ വ്യക്തമാക്കിയതാണ്," ജമാൽ അൽ മുഷാറഖ് പറഞ്ഞു.

ALSO READ: കെട്ടിടങ്ങളുടെ ഗുണനിലവാരവും സുരക്ഷയും വർധിപ്പിക്കാൻ ലക്ഷ്യമിട്ട് ദുബൈയിൽ പുതിയ നിയമം; ഉത്തരവിറക്കി ശൈഖ് മുഹമ്മദ് ബിൻ റാശിദ്

സംഘർഷം കുറയ്ക്കണമെന്ന നിലപാടിൽ ഉറച്ച് യുഎഇ

അമേരിക്കയും ഇസ്റാഈലും ഒരു വശത്തും ഇറാൻ മറുവശത്തുമായി നിൽക്കുന്ന നിലവിലെ സാഹചര്യം ചർച്ചകളിലൂടെ പരിഹരിക്കണമെന്ന് യുഎഇ ആവർത്തിച്ചു. "സംഘർഷം കുറയ്ക്കുക എന്നത് മാത്രമാണ് ഞങ്ങളുടെ നിലപാട്. ഇതിനായി ഞങ്ങൾ വാദിച്ചുകൊണ്ടേയിരിക്കും," അദ്ദേഹം കൂട്ടിച്ചേർത്തു.

ആക്രമണങ്ങൾ അസ്വീകാര്യം; പ്രതിരോധിക്കാൻ സജ്ജം

യുഎഇയിലെ ഊർജ്ജ നിലയങ്ങൾ, ശുദ്ധജല പ്ലാന്റുകൾ തുടങ്ങിയ സിവിലിയൻ അടിസ്ഥാന സൗകര്യങ്ങൾ ലക്ഷ്യമിട്ടുള്ള ഇറാനിയൻ ആക്രമണങ്ങൾ അസ്വീകാര്യമാണെന്നും അദ്ദേഹം ചൂണ്ടിക്കാട്ടി. ഇത്തരം നീക്കങ്ങൾ അയൽപക്ക മര്യാദകളുടെ ലംഘനമാണ്. എങ്കിലും ഇത്തരം വെല്ലുവിളികളെ നേരിടാനും രാജ്യത്തെ സുപ്രധാന കേന്ദ്രങ്ങളെ പ്രതിരോധിക്കാനും യുഎഇ പൂർണ്ണ സജ്ജമാണെന്നും അദ്ദേഹം വ്യക്തമാക്കി.

the uae reaffirmed that its territory will not be used for any military action against iran and urged all sides to exercise restraint. the country emphasized dialogue, de-escalation, and diplomatic solutions to maintain stability and peace in the region.