കൊച്ചി: എസ്.എന്‍.ഡി.പി യോഗം ജന. സെക്രട്ടറി സ്ഥാനത്ത് നിന്ന് വെള്ളാപ്പള്ളി നടേശനെ അയോഗ്യനാക്കി ഹൈക്കോടതി ഉത്തരവ്. വെള്ളാപ്പള്ളിയെയും മറ്റ് ബോര്‍ഡംഗങ്ങളെയും സ്ഥാനത്ത് നിന്ന് നീക്കം ചെയ്തുകൊണ്ടാണ് ഉത്തരവ്. മൈക്രോഫിനാന്‍സ് സാമ്പത്തിക തട്ടിപ്പ് അടക്കമുള്ള വിവിധ കേസുകള്‍ പരിഗണിച്ചാണ് നടപടി. പ്രഫ. സാനു മാസ്റ്റര്‍ അടക്കമുള്ളവര്‍ നല്‍കിയ പരാതിയിലാണ് നടപടി.

കമ്പനി നിയമപ്രകാരമുള്ള നടപടികള്‍ പാലിച്ചിട്ടില്ലെന്ന് കോടതി കണ്ടെത്തി. സംഘടനയിലെ ക്രമക്കേടുകളുടെ പശ്ചാത്തലത്തില്‍ വെള്ളാപ്പള്ളി നടേശനെ അയോഗ്യനാക്കണമെന്നും, ജനറല്‍ സെക്രട്ടറി പദവിയില്‍ നിന്നും നീക്കണമെന്നുമാണ് ഹരജിയില്‍ ആവശ്യപ്പെട്ടിരുന്നത്.

കമ്പനിനിയമപ്രകാരം രജിസ്റ്റര്‍ ചെയ്തിട്ടുള്ള എസ്.എന്‍.ഡി.പി യോഗം 2006 നുശേഷം കണക്കുകള്‍ ബോധിപ്പിച്ചിട്ടില്ല. അതിനാല്‍ ഭരണസമിതിക്ക് തുടരാന്‍ യോഗ്യതയില്ലെന്നും ഹരജിക്കാര്‍ ചൂണ്ടിക്കാട്ടിയിരുന്നു. ഹരജിയില്‍ വിശദമായ വാദം കേട്ടശേഷമാണ് വെള്ളാപ്പള്ളിയെ അയോഗ്യനാക്കിയുള്ള ജസ്റ്റിസ് ടി ആര്‍ രവിയുടെ ഉത്തരവ്.

വെള്ളാപ്പള്ളി നടേശനെ മാറ്റി, എസ്.എന്‍.ഡി.പി യോഗത്തിന്റെ ഭരണത്തിനായി അഡ്മിനിസ്ട്രേറ്ററെ നിയോഗിക്കണമെന്ന് എംകെ സാനു അടക്കമുള്ളവര്‍ ഹരജിയില്‍ ആവശ്യപ്പെട്ടിരുന്നു. വെള്ളാപ്പള്ളിയുടെ ഏകാധിപത്യമാണ് സംഘടനയില്‍ നടക്കുന്നത്. കൃത്യമായ കണക്കുകള്‍ സംഘടനയെ ബോധിപ്പിക്കുന്നില്ല. എസ്.എന്‍.ഡി.പിയോഗത്തില്‍ വലിയ ക്രമക്കേടുകളാണ് നടക്കുന്നതെന്നും ഹരജിയില്‍ ചൂണ്ടിക്കാട്ടുന്നു.

kerala high court disqualified vellappally natesan from the post of sndp yogam general secretary over alleged irregularities including microfinance financial fraud cases.