ന്യൂഡല്‍ഹി: മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ ഇംപീച്ച്‌മെന്റ് നീക്കവുമായി ഇന്‍ഡ്യ സഖ്യം. പാര്‍ലമെന്റിലെ ഇരുസഭകളിലുമായി 193 എംപിമാര്‍ ഒപ്പുവെച്ച നോട്ടീസ് പ്രതിപക്ഷം തയ്യാറാക്കിയതായി റിപ്പോര്‍ട്ട്. ലോക്‌സഭയിലെ 130 എംപിമാരും, രാജ്യസഭയിലെ 63 എംപിമാരും നോട്ടീസില്‍ ഒപ്പുവെച്ചു. പാര്‍ലമെന്റിന്റെ ഏതെങ്കിലും ഒരുസഭയില്‍ നോട്ടീസ് സമര്‍പ്പിക്കാനാണ് നീക്കം. ചരിത്രത്തില്‍ ഇതാദ്യമായാണ് മുഖ്യതെരഞ്ഞെടുപ്പ് കമ്മീഷണര്‍ക്കെതിരെ അവിശ്വാസം ചര്‍ച്ചക്ക് വരുന്നത്. 

ഔദ്യോഗിക പദവിയിലെ പക്ഷപാതപരമായ സമീപനം, വോട്ടര്‍മാരെ കൂട്ടത്തോടെ ഒഴിവാക്കല്‍, തെരഞ്ഞെടുപ്പ് ക്രമക്കേടുകള്‍ പരിശോധിക്കുന്നതിലെ കാലതാമസം തുടങ്ങി ഏഴ് പ്രധാന ആരോപണങ്ങളാണ് ഗ്യാനേഷ് കുമാറിനെതിരെ പ്രതിപക്ഷം ഉയര്‍ത്തിയത്. ചട്ടപ്രകാരം ലോക്‌സഭയില്‍ കുറഞ്ഞത് 100 എംപിമാരും, രാജ്യസഭയില്‍ 50 എംപിമാരും നോട്ടീസില്‍ ഒപ്പുവെച്ചാല്‍ അവിശ്വാസപ്രമേയം അവതരിപ്പിക്കാമെന്നാണ് വ്യവസ്ഥ. 

ALSO READ: സവര്‍ക്കറെ അധിക്ഷേപിച്ചെന്ന ആരോപണം; രാഹുല്‍ ഗാന്ധിക്കെതിരായ അപകീര്‍ത്തിക്കേസ് കോടതി റദ്ദാക്കി  

ഇന്‍ഡ്യ മുന്നണിയിലെ എല്ലാ കക്ഷികളും, മുന്നണിയുടെ ഭാഗമല്ലാത്ത ആം ആദ്മി പാര്‍ട്ടിയും നോട്ടീസില്‍ ഒപ്പുവെച്ചിട്ടുണ്ട്. പശ്ചിമ ബംഗാള്‍, കേരളം, ഗുജറാത്ത്, ബിഹാര്‍ തുടങ്ങി രാജ്യത്തെ വിവിധ സംസ്ഥാനങ്ങളില്‍ എസ്.ഐ.ആറിനെതിരെ പ്രതിഷേധം കനക്കുന്ന സാഹചര്യത്തിലാണ് ഇംപീച്ച് നടപടിയുമായി പ്രതിപക്ഷം രംഗത്തെത്തുന്നത്. അവിശ്വാസം പാസാവണമെങ്കില്‍ ഇരുസഭകളിലും ഏറ്റവും കൂടുതല്‍ എംപിമാര്‍ പിന്തുണയ്ക്കണം. ലോക്‌സഭയിലും, രാജ്യസഭയിലും നിലവില്‍ എന്‍ഡിഎ മുന്നണിക്ക് വ്യക്തമായ ഭൂരിപക്ഷമുള്ളതിനാല്‍ പ്രതിപക്ഷ നീക്കം വിജയിക്കാനുള്ള സാധ്യത കുറവാണ്.

the india alliance has started an impeachment move against chief election commissioner gyanesh kumar.