ന്യൂഡല്‍ഹി: പശ്ചിമേഷ്യന്‍ സംഘര്‍ഷത്തെത്തുടര്‍ന്ന് രാജ്യം നേരിടുന്ന പാചകവാതക ക്ഷാമം പരിഹരിക്കാന്‍ കര്‍ശന നിയന്ത്രണങ്ങളുമായി കേന്ദ്ര സര്‍ക്കാര്‍. ഗ്രാമീണ മേഖലകളില്‍ സിലിണ്ടര്‍ ബുക്കിങ്ങിനുള്ള ഇടവേള നിലവിലെ 25 ദിവസത്തില്‍ നിന്നും 45 ദിവസമായി വര്‍ധിപ്പിച്ചു. വിതരണ ശൃംഖലയിലെ തടസ്സങ്ങള്‍ നീക്കുന്നതിനായി ആഭ്യന്തര എല്‍.പി.ജി ഉത്പാദനത്തില്‍ 28 ശതമാനം വര്‍ധനവ് വരുത്താനും തീരുമാനമായി.

പശ്ചിമേഷ്യന്‍ രാജ്യങ്ങളില്‍ നിന്നുള്ള ഇറക്കുമതിയിലുണ്ടായ കുറവ് നികത്താന്‍ അമേരിക്ക, നോര്‍വെ, കാനഡ, അള്‍ജീരിയ, റഷ്യ തുടങ്ങിയ രാജ്യങ്ങളില്‍ നിന്ന് കൂടുതല്‍ ഇന്ധനം എത്തിക്കാനുള്ള നടപടികള്‍ ഊര്‍ജ്ജിതമാക്കിയിട്ടുണ്ട്. ഇന്ധന സ്രോതസ്സുകള്‍ വൈവിധ്യവത്കരിക്കുന്നതിലൂടെ വിതരണത്തിലെ അനിശ്ചിതത്വം ഒഴിവാക്കാനാണ് സര്‍ക്കാര്‍ ലക്ഷ്യമിടുന്നത്.

 ALSO READ: മലബാര്‍ കാന്‍സര്‍ സെന്ററില്‍ നിരവധി ഒഴിവുകള്‍; 25,000 മുതല്‍ 80,000 വരെ ശമ്പളം വാങ്ങാം; മാര്‍ച്ച് 16ന് മുന്‍പ് അപേക്ഷിക്കണം

എണ്ണക്കമ്പനികള്‍ക്ക് ഉത്പാദനം കൂട്ടാന്‍ നല്‍കിയ നിര്‍ദേശത്തെത്തുടര്‍ന്ന് കഴിഞ്ഞ ദിവസം 25 ശതമാനം വര്‍ധിപ്പിച്ചിരുന്ന ഉത്പാദനം വ്യാഴാഴ്ചയോടെയാണ് 28 ശതമാനമായി ഉയര്‍ത്തിയത്. ഗാര്‍ഹിക ഉപഭോക്താക്കള്‍ക്ക് തടസ്സമില്ലാതെ സിലിണ്ടറുകള്‍ ലഭ്യമാക്കാന്‍ മുന്‍ഗണനാ പട്ടിക തയ്യാറാക്കാന്‍ സംസ്ഥാനങ്ങളോട് പെട്രോളിയം മന്ത്രാലയം ആവശ്യപ്പെട്ടു. പൂഴ്ത്തിവെപ്പും കരിഞ്ചന്തയും തടയാന്‍ കര്‍ശന നിരീക്ഷണം ഏര്‍പ്പെടുത്തും.

നിലവില്‍ രാജ്യത്ത് സിലിണ്ടറുകള്‍ക്ക് കുറവില്ലെന്നും ജനങ്ങള്‍ക്കിടയിലുള്ള അനാവശ്യ ഭീതി മൂലമാണ് ബുക്കിങ് വര്‍ധിക്കുന്നതെന്നും മന്ത്രാലയം വ്യക്തമാക്കി. നിലവില്‍ 25,000 വിതരണക്കാര്‍ വഴി പ്രതിദിനം 50 ലക്ഷം സിലിണ്ടറുകള്‍ വിതരണം ചെയ്യുന്നുണ്ട്. ആഗോള സാഹചര്യം കണക്കിലെടുത്ത് ഇന്ധനം മിതമായി ഉപയോഗിക്കാനും പരിഭ്രാന്തി ഒഴിവാക്കാനും കേന്ദ്ര സര്‍ക്കാര്‍ ഉപഭോക്താക്കളോട് അഭ്യര്‍ഥിച്ചു.

Amidst the Middle East conflict and rising fuel shortages, the Indian government has extended the LPG refill interval for rural areas to 45 days and boosted domestic production by 28% to ensure a steady supply.