തെഹ്‌റാന്‍: ചില രാജ്യങ്ങളുടെ കപ്പലുകള്‍ക്ക് ഹോര്‍മുസ് കടലിടുക്ക് വഴി അനുമതി നല്‍കിയതായി ഇറാന്‍. ഇറാന്‍ അനുമതി നല്‍കിയിട്ടുണ്ടെന്ന് ഡെപ്യൂട്ടി വിദേശകാര്യ മന്ത്രി മജീദ് തഖ്ത്-റവാഞ്ചിയാണ് ഇക്കാര്യം അറിയിച്ചത്. 

'ചില രാജ്യങ്ങള്‍ കടലിടുക്ക് കടക്കുന്നതിനെക്കുറിച്ച് ഞങ്ങളോട് ഇതിനകം സംസാരിച്ചിട്ടുണ്ട്, ഞങ്ങള്‍ അവരുമായി സഹകരിച്ചിട്ടുണ്ട്,' ടെഹ്റാനില്‍ എഎഫ്പിക്ക് നല്‍കിയ അഭിമുഖത്തില്‍ തഖ്ത്-റവാഞ്ചി പറഞ്ഞു.

'ആക്രമണത്തില്‍ പങ്കുചേര്‍ന്ന രാജ്യങ്ങള്‍ക്ക് ഹോര്‍മുസ് കടലിടുക്ക് വഴി സുരക്ഷിതമായി കടന്നുപോകാന്‍ ഇത് പ്രയോജനപ്പെടരുതെന്ന് ഞങ്ങള്‍ കരുതുന്നു.'- അദ്ദേഹം വ്യക്തമാക്കി. 

ALSO READ: ഇറാന്റെ വൈദ്യുതി സംവിധാനങ്ങൾ തകർക്കുമെന്ന് ട്രംപിന്റെ ഭീഷണി; ഈ 'കണക്കുകൂട്ടലുകൾക്ക്' ഗുരുതരമായ വില നൽകേണ്ടി വരും, ശക്തമായ മറുപടിയുമായി ഇറാൻ 

പേര്‍ഷ്യന്‍ ഗള്‍ഫിനെ ഒമാന്‍ ഉള്‍ക്കടലുമായും വിശാലമായ ഇന്ത്യന്‍ മഹാസമുദ്രവുമായും ബന്ധിപ്പിക്കുന്ന ഇടുങ്ങിയ സമുദ്ര പാതയാണ് ഹോര്‍മുസ് കടലിടുക്ക്. ആഗോള ഊര്‍ജ്ജ ഗതാഗതത്തിനുള്ള ഏറ്റവും പ്രധാനപ്പെട്ട പാതകളില്‍ ഒന്നാണിത്. ലോകത്തിലെ സമുദ്രമാര്‍ഗ്ഗമുള്ള എണ്ണ കയറ്റുമതിയുടെ ഒരു പ്രധാന പങ്ക് എല്ലാ ദിവസവും ഈ ചാനലിലൂടെയാണ് നീങ്ങുന്നത്.

ലോകത്തിലെ അസംസ്‌കൃത എണ്ണയുടെ 20 ശതമാനത്തിലധികം കടന്നുപോകുന്ന നിര്‍ണായക ജല ഇടനാഴിയാണ് ഇത്. തന്ത്രപരമായ പ്രാധാന്യം കാരണം, കടലിടുക്കിലെ ഗതാഗതത്തിനുണ്ടാകുന്ന ഏതൊരു തടസ്സവും ആഗോള ഊര്‍ജ്ജ വിപണികളെയും ഷിപ്പിംഗ് റൂട്ടുകളെയും പെട്ടെന്ന് ബാധിക്കും.  യുദ്ധം ആരംഭിച്ചശേഷം ആക്രമണങ്ങളും കപ്പലുകള്‍ക്കെതിരായ ഭീഷണികളും കാരണം എണ്ണ കടത്ത് 10 ശതമാനത്തില്‍ താഴെയായി കുറഞ്ഞിട്ടുണ്ട്.

അതിനിടെ, ഹോര്‍മുസ് കടലിടുക്കിന് ചുറ്റുമുള്ള കപ്പലുകള്‍ക്ക് നേരിടുന്ന ഭീഷണികളെക്കുറിച്ച് ചര്‍ച്ച ചെയ്യാന്‍ ഇന്റര്‍നാഷനല്‍ മാരിടൈം ഓര്‍ഗനൈസേഷന്‍ മാര്‍ച്ച് 18 നും മാര്‍ച്ച് 19 നും ഇടയില്‍ യോഗം നടത്താന്‍ തീരുമാനിച്ചതായി റിപ്പോര്‍ട്ടുണ്ട്. യു.കെ, ഈജിപ്ത്, ഫ്രാന്‍സ്, മൊറോക്കോ, ഖത്തര്‍, യു.എ.ഇ എന്നിവ അടിയന്തര ചര്‍ച്ചകള്‍ അഭ്യര്‍ഥിച്ചതിനെത്തുടര്‍ന്നാണ് ലണ്ടനില്‍ യോഗം നടത്താന്‍ തീരുമാനിച്ചത്.

ALSO READ: ഇറാൻ യുദ്ധം: തെക്കുകിഴക്കൻ ഏഷ്യയിൽ ഇന്ധനപ്രതിസന്ധി രൂക്ഷം; ഫിലിപ്പീൻസിൽ പ്രവൃത്തിദിനം നാലാക്കി ചുരുക്കി, വിയറ്റ്‌നാമിലും തായ്‌ലന്റിലും വർക്ക് ഫ്രം ഹോം

യു.എസുമായുള്ള സംഘര്‍ഷത്തെ തുടര്‍ന്നാണ് ഹോര്‍മുസ് കടലിടുക്കിലൂടെയുള്ള ഗതാഗതത്തിന് ഇറാന്‍ നിയന്ത്രണമേര്‍പ്പെടുത്തിയത്.  ആവശ്യമെങ്കില്‍ യു.എസ് നാവികസേന കപ്പലുകള്‍ക്ക് അകമ്പടി നല്‍കുമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ് പറഞ്ഞിരുന്നു. എന്നാല്‍ പിന്നീട് അവര്‍ ഈ നിലപാടില്‍ നിന്ന് പിന്മാറി. നിലവില്‍ എണ്ണ ടാങ്കറുകള്‍ക്ക് അകമ്പടി നല്‍കാന്‍ യു.എസ് നാവിക സേന സജ്ജമല്ലെന്ന് പിന്നീട് ഊര്‍ജ സെക്രട്ടറി ക്രിസ് റൈറ്റ് അറിയിക്കുകയായിരുന്നു.

iran says it has allowed ships from certain countries to pass through the strategic strait of hormuz, while warning that nations involved in attacks should not benefit from safe passage. the key oil shipping route remains under global attention.