പത്തനംതിട്ട: കോണ്‍ഗ്രസ് ജില്ലാ പഞ്ചായത്ത് അംഗമായ ശ്രീനാദേവി കുഞ്ഞമ്മയുടെ പേര് ഉള്‍പ്പെട്ട റേഷന്‍കാര്‍ഡ് റദ്ദാക്കാന്‍ ഉത്തരവ്. കാര്‍ഡില്‍ പേരുചേര്‍ത്തത് തെറ്റായ വിവരങ്ങള്‍ ഉള്‍പ്പെടുത്തിയാണെന്ന പരാതിയുടെ അടിസ്ഥാനത്തിലാണ് നടപടി. കാര്‍ഡുടമയുടെ ഭര്‍തൃസഹോദരിയുടെ മകള്‍ എന്ന നിലയിലാണ് ശ്രീനാദേവിയുടെ പേര് ചേര്‍ത്തതെന്നും എന്നാല്‍ കാര്‍ഡുടമയ്ക്ക് ഭര്‍തൃസഹോദരിയോ മകളോ ഇല്ലെന്നും പരാതിയില്‍ പറയുന്നു. അടൂര്‍ താലൂക്ക് സപ്ലൈ ഓഫീസറാണ് കാര്‍ഡ് റദ്ദാക്കിയത്.

2020 ലെ തദ്ദേശ തെരഞ്ഞെടുപ്പില്‍ സി.പി.ഐ സ്ഥാനാര്‍ഥിയായാണ് പള്ളിക്കല്‍ ഡിവിഷനില്‍ നിന്ന് ശ്രീനാദേവി മത്സരിച്ച് വിജയിച്ചത്. അന്ന് ഈ വിഷയത്തില്‍ കോണ്‍ഗ്രസ് പരാതി നല്‍കിയെങ്കിലും തള്ളിപ്പോയി. പിന്നീട് സി.പി.ഐയുമായി ഇടഞ്ഞ ശ്രീനാദേവി കഴിഞ്ഞ തെരഞ്ഞെടുപ്പില്‍ പള്ളിക്കല്‍ ഡിവിഷനില്‍ നിന്ന് കോണ്‍ഗ്രസ് സ്ഥാനാര്‍ഥിയായാണ് മത്സരിച്ചത്. തുടര്‍ന്ന് സി.പി.ഐ നേതാക്കള്‍ റേഷന്‍ കാര്‍ഡ് വിഷയത്തില്‍ പരാതി നല്‍കി. 

ALSO READ: സുധാകരനെ അനുനയിപ്പിക്കാന്‍ ഹൈക്കമാന്‍ഡ് നീക്കം; ഡല്‍ഹിയിലേക്ക് വിളിപ്പിച്ച് രാഹുല്‍ഗാന്ധി

ഏറത്തു പഞ്ചായത്തിലെ യശോദയുടെ വീടിന്റെ പേരിലാണ് ശ്രീനാദേവി റേഷന്‍കാര്‍ഡ് എടുത്തത്. 2024 ല്‍ യശോദ മരിച്ചു. യശോദയുടെ ഭര്‍ത്താവും മക്കളുമാണ് പരാതി നല്‍കിയത്. പിന്നാലെ ഹിയറിങ് നടത്തിയപ്പോള്‍ വീട്ടില്‍ ആരും താമസിക്കുന്നില്ലെന്ന് മനസിലായതോടെ കാര്‍ഡ് റദ്ദാക്കുകയായിരുന്നു. 

റേഷന്‍ കാര്‍ഡ് റദ്ദാക്കിയത് ശ്രീനാദേവിയുടെ ജില്ലാ പഞ്ചായത്ത് അംഗത്വത്തെ ബാധിക്കാന്‍ സാധ്യതയുണ്ട്. കാര്‍ഡ് റദ്ദാക്കിയത് രാഷ്ട്രീയ നീക്കമാണെന്നും, ഇതിനു പിന്നില്‍ ഗൂഢാലോചനയുണ്ടെന്നും ശ്രീനാദേവി കുഞ്ഞമ്മ ആരോപിച്ചു.

A complaint has been filed against Sreenadevi Kunjamma for allegedly adding a name fraudulently to a ration card. Authorities have ordered the cancellation of the ration card following the allegations, and further action may be taken after investigation.