മേൻപുരി: ഉത്തർപ്രദേശിലെ മേൻപുരിയിൽ മിഠായി തൊണ്ടയിൽ കുടുങ്ങി മൂന്നരവയസുകാരൻ ശ്വാസംമുട്ടി മരിച്ചു. ബോഗോൻ കോട്വാലിയിലെ ചാഛാ ഗ്രാമത്തിൽ മനീഷിന്റെ മകൻ ആനന്ദ് ആണ് മരിച്ചത്. അച്ഛനോട് വാശിപിടിച്ച് വാങ്ങിയ മിഠായിയാണ് കുഞ്ഞിന്റെ ജീവനെടുത്തത്.

സംഭവം നടന്നത് ഇങ്ങനെ

ഏഴ് വയസ്സുള്ള സഹോദരി ഷഗുനൊപ്പം ഗ്രാമത്തിലെ പലചരക്ക് കടയിൽ എത്തിയതായിരുന്നു ആനന്ദ്. അവിടെ വെച്ച് അച്ഛൻ മനീഷിനെ കണ്ടപ്പോൾ കുട്ടി മിഠായി വേണമെന്ന് വാശിപിടിച്ചു.മകന്റെ നിർബന്ധത്തിന് വഴങ്ങി മനീഷ് മിഠായി വാങ്ങി നൽകി. മിഠായിയുമായി സന്തോഷത്തോടെ വീട്ടിലെത്തിയ ആനന്ദ് അത് കഴിക്കാൻ ശ്രമിക്കുന്നതിനിടെ അബദ്ധത്തിൽ തൊണ്ടയിൽ കുടുങ്ങുകയായിരുന്നു.

മിഠായി കുടുങ്ങിയ ഉടൻ കുട്ടിക്ക് കടുത്ത ശ്വാസതടസ്സം അനുഭവപ്പെടുകയും വേദനകൊണ്ട് പുളയുകയും ചെയ്തു. പരിഭ്രാന്തരായ വീട്ടുകാർ ഉടൻ തന്നെ കുട്ടിയെ ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിൽ എത്തുന്നതിന് മുൻപേ മരണം സംഭവിച്ചതായി ഡോക്ടർമാർ സ്ഥിരീകരിച്ചു.

കുടുംബത്തിന്റെ ഏക ആൺതരി

മനീഷിന്റെ മൂന്ന് മക്കളിൽ ഏറ്റവും ഇളയവനായിരുന്നു ആനന്ദ്. കുട്ടിയുടെ അപ്രതീക്ഷിത മരണം ഗ്രാമത്തെ ഒന്നടങ്കം ദുഃഖത്തിലാഴ്ത്തിയിരിക്കുകയാണ്. സംഭവത്തിന് പിന്നാലെ കുടുംബം കുട്ടിയുടെ സംസ്കാര ചടങ്ങുകൾ നടത്തി.