കൊൽക്കത്ത: ഐപിഎൽ 2026 സീസൺ ആരംഭിക്കാൻ ദിവസങ്ങൾ മാത്രം ബാക്കിനിൽക്കെ കൊൽക്കത്ത നൈറ്റ് റൈഡേഴ്സ് തങ്ങളുടെ പേസ് നിരയിൽ നിർണ്ണായക മാറ്റം വരുത്തി. ബംഗ്ലാദേശ് താരം മുസ്തഫിസൂർ റഹ്മാന് പകരക്കാരനായി സിംബാബ്‌വെൻ സ്പീഡ് സ്റ്റാർ ബ്ലെസിംഗ് മുസറബാനി ടീമിലെത്തി. നിലവിൽ നടന്നുകൊണ്ടിരിക്കുന്ന പാകിസ്ഥാൻ സൂപ്പർ ലീഗിൽ (PSL) നിന്ന് പിന്മാറിയാണ് മുസറബാനി ഐപിഎല്ലിലേക്ക് എത്തുന്നത്.

കെകെആറിലേക്ക് മുസറബാനി എത്തുമ്പോൾ

മാർച്ച് 13 വെള്ളിയാഴ്ചയാണ് ഫ്രാഞ്ചൈസി ഔദ്യോഗിക പ്രഖ്യാപനം നടത്തിയത്. മാർച്ച് 17-ന് താരം ടീമിനൊപ്പം ചേരും.അടുത്തിടെ നടന്ന ടി20 ലോകകപ്പിൽ 13 വിക്കറ്റുകൾ വീഴ്ത്തി മികച്ച ഫോമിലായിരുന്നു മുസറബാനി. ആറടി എട്ടിഞ്ച് ഉയരമുള്ള താരത്തിന്റെ വേഗതയും ബൗൺസും കൊൽക്കത്തയുടെ ബൗളിംഗ് നിരയ്ക്ക് വലിയ മുതൽക്കൂട്ടാകും.ഹർഷിത് റാണ, മതീഷ പതിരാന എന്നിവരുടെ പരിക്ക് മൂലം വലഞ്ഞ കൊൽക്കത്തയ്ക്ക് മുസറബാനിയുടെ വരവ് വലിയ ആശ്വാസമാണ്.

മുസ്തഫിസൂറിന്റെ പുറത്തുപോക്കും വിവാദങ്ങളും

കൊൽക്കത്ത റിലീസ് ചെയ്തതിന് തൊട്ടുപിന്നാലെ മുസ്തഫിസൂർ റഹ്മാൻ പിഎസ്എല്ലിലെ ലാഹോർ ഖലന്ദേഴ്സുമായി കരാറൊപ്പിട്ടു.കഴിഞ്ഞ ലേലത്തിൽ 9.20 കോടി രൂപയ്ക്കാണ് കൊൽക്കത്ത താരത്തെ ടീമിലെത്തിച്ചത്. എന്നാൽ ബംഗ്ലാദേശിലെ രാഷ്ട്രീയ സാഹചര്യങ്ങളും ഹിന്ദു ന്യൂനപക്ഷങ്ങൾക്കെതിരെയുള്ള അക്രമങ്ങളും മുൻനിർത്തി താരത്തെ ഐപിഎല്ലിൽ കളിപ്പിക്കുന്നതിനെതിരെ ശക്തമായ പ്രതിഷേധങ്ങൾ ഉയർന്നിരുന്നു. ബിസിസിഐയുടെ നിർദ്ദേശപ്രകാരമാണ് ഫ്രാഞ്ചൈസി താരത്തെ ഒഴിവാക്കിയതെന്നാണ് റിപ്പോർട്ടുകൾ സൂചിപ്പിക്കുന്നത്.