പത്തനംതിട്ട: കുടുംബവഴക്കിനിടെ മധ്യസ്ഥതയ്ക്ക് എത്തിയ അയൽവാസി തലയ്ക്കടിയേറ്റ് കൊല്ലപ്പെട്ടു. കോന്നി എലിയറക്കൽ സ്വദേശി വഹാബ് (52) ആണ് മരിച്ചത്. സംഭവവുമായി ബന്ധപ്പെട്ട് വഹാബിന്റെ ബന്ധുകൂടിയായ അയൽവാസി നിയാസിനെ പൊലിസ് കസ്റ്റഡിയിലെടുത്തു.

പ്രതിയായ നിയാസും ഭാര്യയും തമ്മിൽ വീട്ടിൽ പതിവായി വഴക്കുണ്ടാകാറുണ്ടായിരുന്നു. കഴിഞ്ഞ ദിവസവും മദ്യലഹരിയിൽ എത്തി നിയാസ് ഭാര്യയെ ക്രൂരമായി ഉപദ്രവിക്കുന്നത് കണ്ടാണ് അയൽവാസിയായ വഹാബ് ഇടപെട്ടത്. മർദ്ദനം തടയാൻ ശ്രമിക്കുന്നതിനിടെ പ്രകോപിതനായ നിയാസ് കയ്യിലുണ്ടായിരുന്ന ചുറ്റിക കൊണ്ട് വഹാബിന്റെ തലയ്ക്കടിക്കുകയായിരുന്നു.

പരുക്കേറ്റ വഹാബിനെ ഉടൻ തന്നെ സ്വകാര്യ ആശുപത്രിയിൽ പ്രവേശിപ്പിച്ചുവെങ്കിലും ഇന്ന് രാവിലെ ചികിത്സയിലിരിക്കെ മരണം സംഭവിക്കുകയായിരുന്നു. ആക്രമണത്തിന് പിന്നാലെ ഒളിവിൽ പോകാൻ ശ്രമിച്ച നിയാസിനെ പൊലിസ് പിടികൂടി. ഇയാൾക്കെതിരെ കൊലക്കുറ്റം ചുമത്തി കേസെടുത്തിട്ടുണ്ട്.

മൃതദേഹം പോസ്റ്റ്‌മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും. സംഭവത്തിൽ കൂടുതൽ അന്വേഷണം നടന്നുവരികയാണെന്ന് കോന്നി പൊലിസ് അറിയിച്ചു.

A 52-year-old man, identified as Vahab, was killed in Konni, Pathanamthitta, while attempting to stop his neighbor from assaulting his wife. The incident occurred in Eliyarakkal, where the accused, Niyas, was reportedly physically abusing his wife in an intoxicated state.