അബുദബി: മറ്റൊരു സ്ത്രീയുടെ സ്വകാര്യത ലംഘിച്ച് അവരുടെ ചിത്രം ഇൻസ്റ്റാഗ്രാമിൽ പ്രസിദ്ധീകരിച്ച യുവതിക്ക് 50,000 ദിർഹം (ഏകദേശം 11 ലക്ഷത്തിലധികം രൂപ) നഷ്ടപരിഹാരം വിധിച്ച് അബുദാബി കോടതി. അനുവാദമില്ലാതെ ചിത്രം പ്രചരിപ്പിച്ചതിലൂടെ പരാതിക്കാരിയുടെ സ്വകാര്യതയും വ്യക്തിസ്വാതന്ത്ര്യവും ലംഘിക്കപ്പെട്ടുവെന്ന് കണ്ടെത്തിയതിനെത്തുടർന്നാണ് അബുദാബി ഫാമിലി, സിവിൽ, അഡ്മിനിസ്‌ട്രേറ്റീവ് കോടതി ഉത്തരവിട്ടത്. വിവരസാങ്കേതിക വിദ്യ ദുരുപയോഗം ചെയ്ത് നിയമവിരുദ്ധമായി ചിത്രം പോസ്റ്റ് ചെയ്തത് വഴി പരാതിക്കാരിക്ക് മാനസിക ക്ലേശവും സാമൂഹികമായ നാണക്കേടും ഉണ്ടായതായി കോടതി നിരീക്ഷിച്ചു.

തന്റെ സമ്മതമില്ലാതെ ചിത്രം പങ്കുവെച്ചത് വഴി അന്തസ്സിനും പ്രശസ്തിക്കും കളങ്കമുണ്ടായെന്നും ഇതിന് നഷ്ടപരിഹാരമായി ഒരു ലക്ഷം ദിർഹം വേണമെന്നുമാവശ്യപ്പെട്ടാണ് പരാതിക്കാരി സിവിൽ കേസ് ഫയൽ ചെയ്തത്. നേരത്തെ ഇതേ സംഭവത്തിൽ ക്രിമിനൽ കോടതി യുവതിയെ കുറ്റക്കാരിയെന്ന് കണ്ടെത്തുകയും 50,000 ദിർഹം പിഴ ചുമത്തുകയും ചെയ്തിരുന്നു.

ALSO READ: ഫുജൈറയിൽ ഡ്രോൺ തകർത്തു; അവശിഷ്ടങ്ങൾ വീണുണ്ടായ തീപിടുത്തം നിയന്ത്രണവിധേയം

ഇതിനുപുറമെ മൂന്ന് മാസത്തേക്ക് സാമൂഹിക മാധ്യമങ്ങൾ ഉപയോഗിക്കുന്നതിൽ നിന്ന് യുവതിയെ വിലക്കിയ ക്രിമിനൽ കോടതി, വിവാദ ചിത്രങ്ങൾ ഉടനടി നീക്കം ചെയ്യാനും ഉത്തരവിട്ടിരുന്നു. ഈ ക്രിമിനൽ വിധിയുടെ തുടർച്ചയായാണ് ഇപ്പോൾ സിവിൽ കോടതി നഷ്ടപരിഹാരത്തുക നിശ്ചയിച്ചത്.

സോഷ്യൽ മീഡിയ പ്ലാറ്റ്‌ഫോമുകൾ വഴി ദൃശ്യങ്ങൾ അതിവേഗം പ്രചരിക്കാൻ സാധ്യതയുള്ളതിനാൽ ഇത്തരം പ്രവൃത്തികൾ വ്യക്തികൾക്ക് വലിയ തോതിലുള്ള മാനസിക ആഘാതം സൃഷ്ടിക്കുമെന്ന് കോടതി വിധിന്യായത്തിൽ ചൂണ്ടിക്കാട്ടി. ഭൗതികമല്ലാത്ത ഇത്തരം നാശനഷ്ടങ്ങളെ സാമ്പത്തികമായ അളവുകോലുകൾ കൊണ്ട് മാത്രം വിലയിരുത്താൻ കഴിയില്ലെങ്കിലും, പ്രവൃത്തിയുടെ ഗൗരവം കണക്കിലെടുത്ത് 50,000 ദിർഹം നഷ്ടപരിഹാരം നൽകുന്നത് നീതിയുക്തമാണെന്ന് കോടതി വ്യക്തമാക്കി. കേസ് നടത്തുന്നതിനായുള്ള നിയമപരമായ ചെലവുകളും നിയമപരമായ പലിശയും പ്രതി നൽകേണ്ടി വരും. യുഎഇയിലെ കർശനമായ സൈബർ നിയമങ്ങൾ പ്രകാരം മറ്റൊരാളുടെ അനുമതിയില്ലാതെ ദൃശ്യങ്ങൾ പ്രചരിപ്പിക്കുന്നത് കടുത്ത ശിക്ഷാർഹമായ കുറ്റമാണെന്ന് ഈ വിധിയിലൂടെ ഒരിക്കൽ കൂടി വ്യക്തമാക്കപ്പെട്ടിരിക്കുകയാണ്.

an abu dhabi court has fined a woman dh50,000 for posting another person’s photo on instagram without consent. authorities reiterated that sharing images without permission violates uae privacy laws and can lead to strict legal action.