ഐപിഎല്ലിന് മുന്നോടിയായി രാജസ്ഥാൻ റോയൽസ് യുവതാരം വൈഭവ് സൂര്യവംശിയെ പ്രശംസിച്ച് മുൻ ഇന്ത്യൻ താരം റോബിൻ ഉത്തപ്പ. ഐപിഎല്ലിൽ വൈഭവ് അതിവേഗത്തിൽ സെഞ്ച്വറിയോ അർദ്ധ സെഞ്ച്വറിയോ നേടുമെന്നാണ് ഉത്തപ്പയുടെ പ്രവചനം. ഏത് ടൂർണമെന്റായാലും റൺസ് നേടുന്നതിലുള്ള സൂര്യവംശിയുടെ സ്ഥിരതയെക്കുറിച്ചും ഉത്തപ്പ സംസാരിച്ചു. 

''ഐപിഎല്ലിനും അതിനു ശേഷവും അവൻ എവിടെ കളിച്ചാലും അതേ റൺസ് തന്നെ നിലനിർത്തുന്നുണ്ട്. ഈ കാര്യത്തിലാണ് എനിക്ക് അവനിൽ വളരെയധികം ആത്മവിശ്വാസം ഉള്ളത്. റൺസ് നേടുന്നത് മുകളിലേക്കോ അല്ലെങ്കിൽ താഴേക്കോ ആണെങ്കിൽ പോലും ഞാൻ ആശങ്കപ്പെടും. അവൻ മറ്റൊരു വേഗത്തിൽ അർദ്ധ സെഞ്ച്വറി നേടുമെന്ന് ഞാൻ കരുതുന്നു. അല്ലെങ്കിൽ ഒരു സെഞ്ച്വറി പോലും അവൻ നേടും'' റോബിൻ ഉത്തപ്പ സ്റ്റാർ സ്പോർട്സിലൂടെ പറഞ്ഞു. 

 2025 ഐപിഎല്ലിൽ  രാജസ്ഥാൻ റോയൽസിനായി നടത്തിയ മിന്നും പ്രകടനങ്ങൾക്ക് പിന്നാലെയാണ്  വൈഭവ് എന്ന പേര് ക്രിക്കറ്റ് ലോകത്തിൽ ചർച്ചയായത്. 2025 ഐപിഎല്ലിലെ സൂപ്പർ സ്ട്രൈക്കർ അവാർഡ് സ്വന്തമാക്കിയത് വൈഭവ് സൂര്യവംശിയായിരുന്നു. രാജസ്ഥനായി ഏഴ് മത്സരങ്ങളിൽ നിന്നും ഒരു സെഞ്ച്വറിയും ഒരു അർദ്ധ സെഞ്ച്വറിയും ഉൾപ്പെടെ 252 റൺസാണ് നേടിയത്.

ഐപിഎല്ലിൽ നേരത്തെ വൈഭവ് സെഞ്ച്വറി നേടിയിട്ടുണ്ട്. ഗുജറാത്ത് ടൈറ്റൻസിനെതിരെയുള്ള മത്സരത്തിലാണ് വൈഭവ് സെഞ്ച്വറി നേടിയത്. മത്സരത്തിൽ 35 പന്തിൽ സെഞ്ച്വറി നേടിയാണ് താരം തിളങ്ങിയത്. മറ്റൊരു സീസൺ കൂടി അടുത്തെത്തി നിൽക്കുമ്പോൾ വീണ്ടും വൈഭവിന്റെ ബാറ്റിൽ നിന്നും സെഞ്ച്വറികൾ പിറക്കുമോയെന്ന് കണ്ടുതന്നെ അറിയണം. 

അതേസമയം 2026 അണ്ടർ 19 ലോകകപ്പിൽ ഇന്ത്യയെ കിരീടത്തിലേക്ക് നയിക്കുന്നതിൽ വൈഭവ് വഹിച്ച പങ്ക് വളരെ വലുതായിരിക്കുന്നു. ഫൈനലിൽ ഇംഗ്ലണ്ടിനെതിരെ സെഞ്ച്വറി നേടിയാണ് വൈഭവ് തിളങ്ങിയത്. മത്സരത്തിൽ വെറും 55 പന്തിൽ നിന്ന് സെഞ്ച്വറി തികച്ച വൈഭവ്, അണ്ടർ-19 ലോകകപ്പ് ചരിത്രത്തിൽ ഒരു ഇന്ത്യൻ താരം നേടുന്ന ഏറ്റവും വേഗതയേറിയ സെഞ്ച്വറിയെന്ന റെക്കോർഡും സ്വന്തമാക്കി. 80 പന്തിൽ 175 റൺസെടുത്ത താരത്തിന്റെ ഇന്നിംഗ്സിൽ 15 ഫോറുകളും 15 സിക്സറുകളും ഉൾപ്പെടുന്നു.

ഫൈനലിലെ ഈ മിന്നും പ്രകടനങ്ങൾക്ക് പിന്നാലെ ഒന്നിലധികം റെക്കോർഡുകളാണ് വൈഭവ് സൂര്യവംശി സ്വന്തമാക്കിയത്. അണ്ടർ 19 ലോകകപ്പിലെ താരത്തിന്റെ ആദ്യ സെഞ്ച്വറി ആയിരുന്നു ഇത്. ആദ്യ സെഞ്ച്വറിയിൽ തന്നെ അണ്ടർ 19 ലോകകപ്പിൽ സെഞ്ച്വറി നേടുന്ന ഏറ്റവും പ്രായം കുറഞ്ഞ താരമായും വൈഭവ് റെക്കോർഡിട്ടു. 14 വയസ്സും 316 ദിവസവും പ്രായമുള്ളപ്പോൾ ആയിരുന്നു താരത്തിന്റെ സെഞ്ച്വറി നേട്ടം.

പാകിസ്ഥാൻ താരം ബാബർ അസമിന്റെ റെക്കോർഡ് തകർത്താണ് വൈഭവിന്റെ കുതിപ്പ്. 2012 അണ്ടർ 19 ലോകകപ്പിൽ വെസ്റ്റ് ഇൻഡീസിനെതിരെ 15 വയസ്സും 92 ദിവസവും പ്രായമുള്ളപ്പോൾ ആയിരുന്നു ബാബർ സെഞ്ച്വറി നേടിയത്. അണ്ടർ 19 ലോകകപ്പ് ഫൈനലിൽ ഒരു താരം നേടുന്ന ഏറ്റവും ഉയർന്ന സ്കോറും ഇത് തന്നെയാണ്. 2014 അണ്ടർ 19 ലോകകപ്പിൽ ഓസ്ട്രേലിയക്കെതിരെ വിൻഡീസ് താരം നിക്കോളാസ് പൂരൻ നേടിയ 142 റൺസ് തകർത്താണ് വൈഭവ് ഒന്നാമനായത്.