ബ്രിട്ടിഷ് മാധ്യമങ്ങളിൽ മുസ്‌ലിംകളെയും ഇസ്‌ലാം മതത്തെയും ചിത്രീകരിക്കുന്ന രീതിയെക്കുറിച്ച് ദീർഘകാലമായി നിലനിൽക്കുന്ന പരാതികൾ വെറും ആരോപണങ്ങളല്ലെന്ന് വ്യക്തമാക്കുകയാണ് പുതിയ കണക്കുകൾ. മുസ്‌ലിം കൗൺസിൽ ഓഫ് ബ്രിട്ടന്റെ (MCB) സെന്റർ ഫോർ മീഡിയ മോണിറ്ററിങ് പുറത്തുവിട്ട റിപ്പോർട്ടുകൾ പ്രകാരം, ബ്രിട്ടനിലെ മുൻനിര മാധ്യമങ്ങൾ നൽകുന്ന വാർത്തകളിൽ വലിയൊരു ശതമാനം മുസ്‌ലിം വിരുദ്ധ പക്ഷപാതം നിറഞ്ഞതാണ്. ഗ്രാഫുകളും, ചാർട്ടുകളും സഹിതം ഈ വിവേചനം അക്കമിട്ടു നിരത്തുമ്പോഴും, ഇത് തിരുത്താനോ ഉത്തരവാദിത്വം ഏറ്റെടുക്കാനോ ആരും തയാറാകുന്നില്ല എന്നത് ജനാധിപത്യപരമായ മാധ്യമപ്രവർത്തനത്തിന് വലിയ വെല്ലുവിളിയാണ് ഉയർത്തുന്നത്.

മാധ്യമങ്ങളിലെ നിഷേധാത്മക ചിത്രീകരണം  
ബ്രിട്ടിഷ് പത്രങ്ങളിൽ പ്രസിദ്ധീകരിക്കുന്ന വാർത്താ ലേഖനങ്ങൾ വിശകലനം ചെയ്യുമ്പോൾ ഞെട്ടിപ്പിക്കുന്ന വിവരങ്ങളാണ് പുറത്തുവരുന്നത്. മുസ്‌ലിംകളെക്കുറിച്ചുള്ള വാർത്തകളിൽ ഭൂരിഭാഗവും (ഏകദേശം 59 ശതമാനത്തോളം) നിഷേധാത്മകമായ രീതിയിലാണ് അവതരിപ്പിക്കപ്പെടുന്നത്. തീവ്രവാദം, കുറ്റകൃത്യങ്ങൾ, സാംസ്കാരികമായ പൊരുത്തക്കേടുകൾ എന്നിവയുമായി ബന്ധപ്പെടുത്തി മാത്രമേ പലപ്പോഴും മുസ്‌ലിം ജീവിതങ്ങൾ വാർത്തകളിൽ വരാറുള്ളൂ. മുസ്‌ലിംകൾ ചെയ്യുന്ന പോസിറ്റീവായ കാര്യങ്ങൾക്കോ അവരുടെ സാമൂഹിക സംഭാവനകൾക്കോ അർഹമായ പ്രാധാന്യം നൽകാൻ മാധ്യമങ്ങൾ തയാറാകുന്നില്ല. ഓരോ മുസ്‌ലിം വ്യക്തിയെയും സംശയത്തിന്റെ നിഴലിൽ നിർത്തുന്ന തരത്തിലുള്ള പദപ്രയോഗങ്ങളാണ് പലപ്പോഴും വാർത്താ തലക്കെട്ടുകളിൽ പോലും ഉപയോഗിക്കുന്നത്.

തെറ്റായ വാർത്തകളും തിരുത്താനുള്ള വിമുഖതയും    
മുസ്‌ലിം സമുദായത്തെ മോശമായി ചിത്രീകരിക്കുന്ന വാർത്തകൾ വലിയ പ്രാധാന്യത്തോടെ ഒന്നാം പേജുകളിൽ നൽകുന്ന മാധ്യമങ്ങൾ, പിന്നീട് ആ വാർത്തകൾ തെറ്റാണെന്ന് തെളിയുമ്പോൾ, അവ തിരുത്തി നൽകാൻ പലപ്പോഴും തയാറാകുന്നില്ല. തിരുത്തലുകൾ നൽകിയാൽ തന്നെയും അവ പത്രത്തിന്റെ ഉൾപ്പേജുകളിൽ ആരും ശ്രദ്ധിക്കാത്ത മൂലകളിൽ മാത്രമായി ഒതുങ്ങുന്നു. തെറ്റായ വാർത്തകൾ സൃഷ്ടിക്കുന്ന ആഘാതം സമൂഹത്തിൽ നിലനിൽക്കുകയും, എന്നാൽ അതിന്റെ തിരുത്തലുകൾ ആരും അറിയാതെ പോവുകയും ചെയ്യുന്ന സാഹചര്യം മുസ്‌ലിംവിരുദ്ധ മനോഭാവം വർധപ്പിക്കാൻ കാരണമാകുന്നുണ്ട്.

അധികാരികളുടെ മൗനവും നടപടികളിലെ വീഴ്ചയും  
ബ്രിട്ടനിലെ മാധ്യമങ്ങളുടെ നിലവാരം പരിശോധിക്കുന്ന 'ഇപ്‌സോ' (IPSO) പോലുള്ള റെഗുലേറ്ററി ബോഡികൾ ഈ വിഷയത്തിൽ വേണ്ടത്ര ഗൗരവം കാണിക്കുന്നില്ല എന്നതാണ് മറ്റൊരു പ്രധാന പ്രശ്നം. മുസ്‌ലിം വിരുദ്ധതയുമായി ബന്ധപ്പെട്ട് ആയിരക്കണക്കിന് പരാതികൾ ലഭിച്ചിട്ടും, മാധ്യമ സ്ഥാപനങ്ങൾക്കെതിരേ കർശനമായ നടപടികൾ സ്വീകരിക്കാൻ ഇവർ തയാറാകുന്നില്ല. പരാതികൾ കേവലം സാങ്കേതികത്വത്തിന്റെ പേരിൽ തള്ളിക്കളയുകയാണ് പതിവ്. മാധ്യമസ്വാതന്ത്ര്യം എന്ന പേരിൽ ഒരു ജനവിഭാഗത്തെയാകെ അപകീർത്തിപ്പെടുത്തുന്ന രീതി തുടരുന്നത് തടയാൻ ആരും മുന്നോട്ടുവരുന്നില്ല എന്നത് ബ്രിട്ടിഷ് മാധ്യമരംഗത്തെ വലിയൊരു പോരായ്മയാണ്.

(മിഡിൽ ഈസ്റ്റ് ഐയിൽ മാർച്ച്‌ 13ന് ഫൈസൽ ഹാനിഫ് രചിച്ച ലേഖനത്തെ ആസ്‌പദമാക്കി തയാറാക്കിയത്)