ബെംഗളൂരു: സ്കൂളിലെത്താൻ മിനിറ്റുകൾ വൈകിയതിന് ആറുവയസ്സുകാരനോട് സ്കൂൾ അധികൃതരുടെ ക്രൂരത. ബെംഗളൂരുവിലെ യെലഹങ്ക അട്ടൂർ ലേഔട്ടിന് സമീപമുള്ള സ്വകാര്യ സ്കൂളിലാണ് ഒന്നാം ക്ലാസ് വിദ്യാർത്ഥിയെ രണ്ട് മണിക്കൂറോളം ചുട്ടുപൊള്ളുന്ന വെയിലത്ത് നിർത്തി ശിക്ഷിച്ചത്. സംഭവത്തിൽ വ്യാപക പ്രതിഷേധം ഉയർന്നതോടെ പൊലിസ് അന്വേഷണം ആരംഭിച്ചു.

സംഭവത്തിന്റെ പശ്ചാത്തലം

സ്കൂൾ സമയത്തേക്കാൾ വെറും രണ്ട് മിനിറ്റ് മാത്രം വൈകിയെത്തിയതിനാണ് കുട്ടിക്ക് ഈ കഠിനശിക്ഷ നൽകിയത്. സഹപാഠികൾ ക്ലാസിലിരിക്കുമ്പോൾ കൊടുംവെയിലത്ത് തളർന്നുനിൽക്കുന്ന കുട്ടിയുടെ ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെയാണ് സംഭവം പുറംലോകമറിഞ്ഞത്. വിവരമറിഞ്ഞ് സ്കൂളിലെത്തിയ മാതാപിതാക്കളോട് പ്രിൻസിപ്പൽ അടക്കമുള്ള അധികൃതർ അങ്ങേയറ്റം മോശമായി പെരുമാറിയതായും പരാതിയുണ്ട്.

നിയമനടപടി

സംഭവത്തിൽ യെലഹങ്ക ന്യൂ ടൗൺ പൊലിസ് നോൺ-കോഗ്‌നിസബിൾ റിപ്പോർട്ട് (NCR) രജിസ്റ്റർ ചെയ്തിട്ടുണ്ട്.2015-ലെ ജുവനൈൽ ജസ്റ്റിസ് (കുട്ടികളുടെ സംരക്ഷണവും പരിചരണവും) നിയമപ്രകാരം കുട്ടികളെ ശാരീരികമായോ മാനസികമായോ പീഡിപ്പിക്കുന്നത് കഠിനശിക്ഷ ലഭിക്കാവുന്ന കുറ്റമാണ്.

വിഷയം അതീവ ഗൗരവത്തോടെയാണ് കാണുന്നതെന്നും സ്കൂൾ അധികൃതർക്കെതിരെ കർശന നടപടി സ്വീകരിക്കുമെന്നും പൊലിസ് വ്യക്തമാക്കി.

പ്രതിഷേധം ശക്തം

കുട്ടിയുടെ ആരോഗ്യത്തെപ്പോലും വകവെക്കാതെയുള്ള സ്കൂൾ അധികൃതരുടെ പെരുമാറ്റത്തിനെതിരെ എക്സിൽ (X) വലിയ പ്രതിഷേധമാണ് നടക്കുന്നത്. വിദ്യാഭ്യാസ വകുപ്പും സംഭവത്തിൽ റിപ്പോർട്ട് തേടിയിട്ടുണ്ട്. കുട്ടികളുടെ സുരക്ഷയും മാനസികാരോഗ്യവും ഉറപ്പാക്കേണ്ട വിദ്യാഭ്യാസ സ്ഥാപനങ്ങൾ തന്നെ ഇത്തരം ക്രൂരതകൾക്ക് നേതൃത്വം നൽകുന്നത് അംഗീകരിക്കാനാവില്ലെന്ന് രക്ഷിതാക്കളുടെ സംഘടനകൾ പ്രതികരിച്ചു.