ചണ്ഡീഗഢ്: 2027ലെ പഞ്ചാബ് നിയമസഭാ തെരഞ്ഞെടുപ്പില്‍ ഒറ്റക്ക് മത്സരിക്കാന്‍ ബിജെപി. പഞ്ചാബില്‍ ശിരോമണി അകാലിദളുമായി ഇനി സഖ്യമില്ലെന്ന് കേന്ദ്ര ആഭ്യന്തര മന്ത്രി അമിത് ഷാ പറഞ്ഞു. പഞ്ചാബ് 'രാഷ്ട്രീയത്തില്‍ ഛോട്ടാ ഭായ്' ആയി തുടരാന്‍ ബിജെപി ആഗ്രഹിക്കുന്നില്ലെന്നും, പഞ്ചാബില്‍ ഡബിള്‍ എഞ്ചിന്‍ സര്‍ക്കാര്‍ അധികാരത്തിലെത്തുമെന്നും അമിത് ഷാ പറഞ്ഞു. 

മോഗയിലെ കിള്ളി ചഹ്ലാനില്‍ നടന്ന ബദലാവ് റാലിയിലാണ് മുന്നണി ഊഹോപോഹങ്ങളെ തള്ളി അമിത് ഷാ രംഗത്തെത്തിയത്. പഞ്ചാബിനെ മയക്കുമരുന്ന് മാഫിയ, കടക്കെണി എന്നിവയില്‍ നിന്നും രക്ഷിക്കാന്‍ ഡബിള്‍ എഞ്ചിന്‍ സര്‍ക്കാര്‍ വേണമെന്ന് അമിത് ഷാ പറഞ്ഞു. ' പഞ്ചാബില്‍ ബിജെപി ഇനി രണ്ടാമതൊരു കക്ഷിയായി പ്രവര്‍ത്തിക്കില്ല. ഇതുവരെ ഞങ്ങള്‍ നിങ്ങളിലേക്ക് എത്തുമ്പോള്‍ പങ്കാളികളുണ്ടായിരുന്നു. ഇന്നുമുതല്‍ പഞ്ചാബില്‍ സ്വന്തം സര്‍ക്കാര്‍ രൂപീകരിക്കാനുള്ള പ്രചരണം ബിജെപി ആരംഭിക്കുകയാണ്. നിങ്ങള്‍ കോണ്‍ഗ്രസിനെയും, അകാലിദളിനെയും, ആംആദ്മി പാര്‍ട്ടിയെയും പരീക്ഷിച്ച് കഴിഞ്ഞു. ഇനി ഞങ്ങള്‍ക്ക് ഒരു അവസരം നല്‍കൂ,' അമിത് ഷാ സമ്മേളനത്തില്‍ പറഞ്ഞു. 

ALSO READ: 'ക്രമസമാധാനം പാലിക്കാനായില്ലെങ്കിൽ എസ്പിയും കളക്ടറും രാജിവയ്ക്കണം'; സാംബാൽ പള്ളിയിലെ നിസ്കാര നിയന്ത്രണത്തിനുള്ള യുപി ഭരണകൂടത്തിന്റെ തീരുമാനം തള്ളി അലഹബാദ് ഹൈക്കോടതി 

2024ലെ നിയമസഭാ തെരഞ്ഞെടുപ്പില്‍ പഞ്ചാബില്‍ ഒരു സീറ്റും നേടാന്‍ ബിജെപിക്കായിരുന്നില്ല. എന്നാല്‍ 19 ശതമാനം വോട്ട് വിഹിതവുമായി പാര്‍ട്ടി കരുത്തുകാട്ടിയിരുന്നു. ഇത് മുന്‍നിര്‍ത്തിയാണ് അമിത് ഷായുടെ പ്രഖ്യാപനം. അസം, ഹരിയാന, ഉത്തരാഖണ്ഡ്, മണിപ്പൂര്‍ തുടങ്ങിയ സംസ്ഥാനങ്ങളില്‍ 19 ശതമാനം വോട്ട് വിഹിതത്തില്‍ തുടങ്ങി പിന്നീട് അധികാരം പിടിച്ചെടുത്ത കാര്യം അമിത് ഷാ എടുത്ത് പറഞ്ഞിരുന്നു. തങ്ങള്‍ക്ക് സ്വാധീനമില്ലാത്ത സംസ്ഥാനങ്ങളില്‍ മുന്നണികളുമായി മത്സരിച്ച് പിന്നീട് കാലുവാരുന്ന തന്ത്രം തന്നെയാണ് ബിജെപി പഞ്ചാബിലും പയറ്റുന്നതെന്ന് ചുരുക്കം.

Union Home Minister Amit Shah said that the party will no longer have an alliance in Punjab with Shiromani Akali Dal, and will contest independently in the upcoming  Legislative Assembly election.