സുല്‍ത്താന്‍ ബത്തേരി: കുട്ടികളില്‍ വായനശീലം വളര്‍ത്തുന്നതിനും ആസ്വാദനക്കുറിപ്പ് തയ്യാറാക്കുന്നതിനും പരിശീലനം നല്‍കുന്നതിനായി സംസ്ഥാന ലൈബ്രറി കൗണ്‍സില്‍ തെരഞ്ഞെടുത്ത സ്‌കൂളുകളില്‍ 'എന്റെ പുസ്തകം, എന്റെ എഴുത്തുപെട്ടി' പദ്ധതി തുടങ്ങി. ജില്ലയിലെ മൂന്നു താലൂക്കുകളിലും ഓരോ സ്‌കൂളില്‍ വീതമാണ് പദ്ധതി നടപ്പാക്കുന്നത്. ഇതുപ്രകാരം കുട്ടികള്‍ തയ്യാറാക്കിയ ആസ്വാദനക്കുറിപ്പുകള്‍ സ്‌കൂളുകളില്‍ പ്രത്യേകമായി സ്ഥാപിച്ച എഴുത്തുപെട്ടികളില്‍ നിക്ഷേപിക്കുകയും സ്‌കൂളുകളിലെ അധ്യാപകര്‍ ഉള്‍പ്പെട്ട വിദഗ്ധ സമിതി ഓരോ മാസവും ഇതു പരിശോധിക്കുകയും ചെയ്യും. മികച്ച ആസ്വാദനക്കുറിപ്പ് തയ്യാറാക്കുന്ന വിദ്യാര്‍ഥിക്ക് പ്രത്യേക സമ്മാനം നല്‍കും. കൗണ്‍സില്‍ സെക്രട്ടറി പി.കെ. സത്താര്‍ ഉദ്ഘാടനം ചെയ്തു. പി.ടി.എ. പ്രസിഡന്റ് കെ. റഷീദ് അധ്യക്ഷനായി.