കോഴിക്കോട്: കോഴിക്കോട് കുന്ദമംഗലം ചക്കാലക്കൽ ഹയർ സെക്കൻഡറി സ്കൂളിലെ എട്ടാം ക്ലാസ് വിദ്യാർഥിയെ സീനിയർ വിദ്യാർഥികൾ അക്രമിച്ചുവെന്ന് പരാതി. 14കാരനായ മുഹമ്മദ് അസ്ലഹിനാണ് മർദ്ദനമേറ്റത്. 

ഹെയർ സ്റ്റൈലും കാലിലെ ചെരിപ്പും ചോദ്യം ചെയ്തുമായിരുന്നു മർദ്ദനം ഉണ്ടായത്. പരീക്ഷ കഴിഞ്ഞ് പുറത്തിറങ്ങിയ 14കാരനെ 15ലധികം വിദ്യാർഥികൾ ചേർന്നുകൊണ്ട് മർദ്ധിക്കുകയായിരുന്നു. ഒമ്പതാം ക്ലാസ് വിദ്യാർഥികളാണ് ആക്രമിച്ചത് എന്ന് അസ്ലഹ് പറഞ്ഞു.

 മൂക്കിൽ നിന്നും രക്തം വരുന്നത് കണ്ടതോടെ രക്ഷിതാക്കൾ കുട്ടിയെ ആശുപത്രിയിൽ എത്തിക്കുകയായിരുന്നു. സ്കൂൾ ബസ്സിൽ കയറി പോകാൻ അനുവദിച്ചില്ലെന്നും അസ്ലഹ് പറഞ്ഞു. താമരശ്ശേരി താലൂക്ക് ആശുപത്രിയിൽ പ്രവേശിപ്പിച്ച കുട്ടിയെ പിന്നീട് ഓമശേരിയിലെ സ്വകാര്യ ആശുപത്രിയിലേക്ക് മാറ്റുകയും ചെയ്തു. സംഭവത്തിൽ പൊലിസിൽ പരാതി നൽകുമെന്ന് കുടുംബം വ്യക്തമാക്കി.