2026 ഐപിഎൽ സീസൺ ആരംഭിക്കാൻ ഇനി ദിവസങ്ങൾ മാത്രമേ ബാക്കിയുള്ളൂ. മാർച്ച് 28ണ് ആരംഭിക്കുന്ന ഇന്ത്യൻ ക്രിക്കറ്റ് മാമാങ്കത്തിൽ ആദ്യ മത്സരത്തിൽ നിലവിലെ ചാമ്പ്യന്മാരായ റോയൽ ചലഞ്ചേഴ്‌സ് ബെംഗളൂരുവും സൺറൈസേഴ്‌സ് ഹൈദരാബാദുമാണ് നേർക്കുനേർ എത്തുന്നത്. 

കഴിഞ്ഞ സീസണിൽ കണ്മുന്നിൽ നഷ്ടമായ കിരീടം കൈപ്പിടിയിലാക്കാനാവും ശ്രേയസ് അയ്യരും സംഘവും ലക്ഷ്യം വെക്കുക. പഞ്ചാബിന്റെ ആദ്യ മത്സരം മാർച്ച് 31ന് ഗുജറാത്ത് ടൈറ്റൻസിനെതിരെയാണ്. പുതിയ സീസണിൽ പഞ്ചാബ് കളത്തിൽ ഇറങ്ങുന്നത് മറ്റൊരു ടീമിനുമില്ലാത്ത ചരിത്രനേട്ടവുമായാണ്. ഐപിഎല്ലിന്റെ ചരിത്രത്തിൽ ഒരു സീസണിൽ 3000 റൺസ് നേടുന്ന ആദ്യ ടീമെന്ന നേട്ടത്തിന്റെ തലയെടുപ്പുമായാണ് അയ്യരും സംഘവും പോരാട്ടത്തിനിറങ്ങുന്നത്.

കഴിഞ്ഞ സീസണിലാണ് പഞ്ചാബ് കിങ്‌സ് താരങ്ങൾ ഒരു സീസണിൽ ആദ്യമായി 3000 റൺസ് നേടി കരുത്തുകാട്ടിയത്. 2023ൽ ഗുജറാത്തും 2024ൽ ഹൈദരാബാദും 2906 റൺസ് നേടിയെങ്കിലും 3000 എന്ന റൺസിലെത്താൻ 94 റൺസിന്റെ കുറവ് ഉണ്ടായിരുന്നു. എന്നാൽ കഴിഞ്ഞ സീസണിൽ ഈ നേട്ടം കൈപ്പിടിയിലാക്കിയാണ് പഞ്ചാബ് സീസൺ അവസാനിപ്പിച്ചത്. 

അതേസമയം നീണ്ട 11 വർഷങ്ങൾക്ക് ശേഷം പഞ്ചാബിനെ ഐപിഎൽ കലാശപോരാട്ടത്തിലേക്ക് യോഗ്യത നേടിക്കൊടുത്തതിനാൽ അയ്യർ ഐപിഎല്ലിൽ മറ്റൊരു ക്യാപ്റ്റനും സ്വന്തമാക്കാൻ സാധിക്കാത്ത ഒരു റെക്കോർഡും സ്വന്തമാക്കിയിരുന്നു. ഐപിഎല്ലിൽ മൂന്ന് വ്യത്യസ്ത ടീമിനെ ഫൈനലിൽ എത്തിക്കുന്ന ആദ്യ ക്യാപ്റ്റൻ ആവനാണ് അയ്യരിന് സാധിച്ചത്. ഇതിന് മുമ്പ് കൊൽക്കത്ത നൈറ്റ്‌ റൈഡഴ്സ്, ഡൽഹി ക്യാപ്പിറ്റൽസ് എന്നീ ടീമുകളെയാണ് അയ്യർ ഫൈനലിലേക്ക് കൈപിടിച്ചുയർത്തിയത്.