ലക്‌നൗ: ഫോണ്‍ എടുക്കാത്തതില്‍ ദേഷ്യപ്പെട്ട് ഭര്‍ത്താവ് ഭാര്യയെ തല്ലിക്കൊന്നു. ഉത്തര്‍പ്രദേശിലെ സുല്‍ത്താന്‍പൂരിലാണ് സംഭവം. സെവ്‌റ ചാര്‍ത്തായി ഗ്രാമത്തില്‍ താമസിക്കുന്ന കുസുമം (42) ആണ് ഭര്‍ത്താവ് നക്‌ചെയ്ദിന്റെ (45) മര്‍ദനത്തില്‍ മരിച്ചത്. പ്രതിയെ പൊലിസ് അറസ്റ്റ് ചെയ്തു. 

ഭര്‍ത്താവ് ഭാര്യയെ പകല്‍ മുഴുവന്‍ ഫോണില്‍ വിളിച്ചെങ്കിലും എടുത്തിരുന്നില്ല. ഇതിനെ തുടര്‍ന്നുണ്ടായ പ്രകോപനത്തിലാണ് ക്രൂരത. വൈകീട്ട് വീട്ടിലെത്തിയ ഭര്‍ത്താവ് ഭാര്യയെ ക്രൂരമായി മര്‍ദിച്ചെന്നാണ് കണ്ടെത്തല്‍. ഈ സമയം മക്കളായ എട്ടുവയസുകാരി ദീക്ഷയും, ഒന്‍പത് വയസുകാരന്‍ ഉദയഭാനും വീട്ടിലുണ്ടായിരുന്നു. രാത്രി മുഴുവന്‍ മര്‍ദനം തുടര്‍ന്നതായാണ് വിവരം. 

ALSO READ: ഹോർമൂസ് കടലിടുക്കിലെ സുരക്ഷ: ട്രംപുമായി ചർച്ച നടത്തി പ്രധാനമന്ത്രി: കപ്പൽപ്പാത തുറന്നിടണമെന്ന് മോദി 

പിതാവ് മര്‍ദനം നിര്‍ത്തുന്നില്ലെന്ന് കണ്ട മകള്‍ പരിക്കേറ്റ മാതാവിനെ ബന്ധു വീട്ടിലേക്ക് മാറ്റി. എന്നാല്‍ തൊട്ടടുത്ത ദിവസം രാവിലെ തിരികെ എത്തിയപ്പോള്‍ നക്‌ചെയ്ദ് വീണ്ടും കുസുമത്തെ ആക്രമിക്കുകയായിരുന്നു. ഗുരുതരമായി പരിക്കേറ്റ ഇവരെ ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.