ന്യൂഡല്‍ഹി: എ.എഫ്.സി ഏഷ്യന്‍ കപ്പ് 2027 യോഗ്യത മത്സരങ്ങള്‍ക്കുള്ള ഇന്ത്യന്‍ ടീമിനെ പ്രഖ്യാപിച്ചു. 23 അംഗ ടീമിനെ പരിശീലകന്‍ ഖാലിദ് ജമീലാണ് പ്രഖ്യാപിച്ചത്. ഹോങ്കോങ്, ചൈന, എന്നിവര്‍ക്കെതിരേയാണ് മത്സരങ്ങള്‍. മുന്‍പുള്ള പട്ടികയില്‍ നിന്ന് 14 മാറ്റങ്ങളാണ് ടീമിലുള്ളത്. മലയാളി താരങ്ങളും പട്ടികയിലുണ്ട്. ടീമിലെ സര്‍പ്രൈസ് താരങ്ങളിലൊരാളായി മലയാളി താരം ബിജോയ് വര്‍ഗീസ് ഇടംപിടിച്ചിട്ടുണ്ട്. പ്രതിരോധ താരമായ ബിജോയ് ഐ.എസ്.എല്ലില്‍ പഞ്ചാബിന് വേണ്ടിയാണ് കളിക്കുന്നത്. മുന്‍ കേരള ബ്ലാസ്‌റ്റേഴ്‌സ് താരമായിരുന്നു. ആല്‍ബിനോ ഗോമസും ടീമില്‍ ഇടംപിടിച്ചു. ഇതും സര്‍പ്രൈസാണ്. ഒരു ദശാബ്ദത്തിന് ശേഷമാണ് ആല്‍ബിനോ ദേശീയ ടീമില്‍ തിരികെയെത്തുന്നത്. എന്നാല്‍ ബിജോയ് ഇതുവരെ ടീമിനായി കളിച്ചിട്ടില്ല.

ALSO READ: മെസി മാജിക്‌ തുടരുന്നു: പെലെയുടെ റെക്കോർഡ് തകർത്തു; ഇനി മുന്നിൽ ജുനീഞ്ഞോ മാത്രം

അതേസമയം ഇന്ത്യക്ക് യോഗ്യത ലഭിക്കില്ലെന്ന് ഉറപ്പാണ്. ഇതുവരെ കളിച്ച മത്സരങ്ങളിലൊന്നും ജയം ടീമിന് നേടാനായിട്ടില്ല. മൂന്നു തോല്‍വികളും രണ്ട് സമനിലയുമാണ് ടീമിന്റെ സമ്പാദ്യം. എന്നാല്‍ ഭാവിയിലേക്കുള്ള ടീമിനെ വാര്‍ത്തെടുക്കാന്‍ ഇനിയുള്ള മത്സരങ്ങള്‍ സഹായകരമാകും. പ്രതീക്ഷയുള്ള ഒരുപാട് താരങ്ങള്‍ ടീമിലേക്ക് വരുന്നുണ്ട്. അധികവും അണ്ടര്‍ 20, 23 ടീമുകളില്‍ ഉള്ളവരാണെന്നും ഖാലിദ് ജമീല്‍ പറഞ്ഞു. യോഗ്യത മത്സരം കൊച്ചിയിലെ ജവഹര്‍ലാല്‍ നെഹ്‌റു സ്‌റ്റേഡിയത്തിലാണ് നടക്കുക. പത്ത് വര്‍ഷത്തിന് ശേഷമാണ് ദേശീയ ടീം ഫുട്‌ബോള്‍ മത്സരത്തിനായി കേരളത്തിലെത്തുന്നത്. ഇന്ത്യ-തുര്‍ക്‌മെനിസ്ഥാന്‍ ലോകകപ്പ് യോഗ്യത മത്സരമാണ് ഇവിടെ അവസാനമായി നടന്ന ഫുട്‌ബോള്‍ മത്സരം.