പാലക്കാട്: പിണറായി സർക്കാർ വീണ്ടും അധികാരത്തിൽ വരുന്നത് വലിയ ആപത്താണെന്ന തിരിച്ചറിവിലാണ് ജി. സുധാകരൻ സി.പി.എം. വിട്ടതെന്ന് ഷാഫി പറമ്പിൽ എം.പി. നിയമസഭാ തിരഞ്ഞെടുപ്പിന് മുന്നോടിയായി പാലക്കാട് ജില്ലയിലെ വിവിധ യു.ഡി.എഫ്. മണ്ഡലം കൺവെൻഷനുകൾ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ജി. സുധാകരൻ നൽകിയ സന്ദേശം ഉൾക്കൊണ്ടാവണം ഇത്തവണ വോട്ടർമാർ പോളിങ് ബൂത്തിലേക്ക് എത്തേണ്ടതെന്നും അദ്ദേഹം കൂട്ടിച്ചേർത്തു.

എൽ.ഡി.എഫ്. സർക്കാരിന്റെ ജനദ്രോഹ നടപടികൾക്കെതിരെ റോഡിലിറങ്ങി പ്രതിഷേധിക്കുന്നവർക്ക് കിട്ടുന്ന അടി സർക്കാരിനെ താഴെയിറക്കിക്കൊണ്ട് തിരിച്ചു കൊടുക്കണമെന്ന് ഷാഫി ഓർമ്മിപ്പിച്ചു. കൂടാതെ, മുഖ്യമന്ത്രി പിണറായി വിജയന്റെ ഇരട്ടത്താപ്പിനെയും അദ്ദേഹം വിമർശിച്ചു.

ALSO READ: അക്ബര്‍ റോഡിലെ ആസ്ഥാനം ഒഴിയണം; കോണ്‍ഗ്രസിന് കുടിയൊഴിപ്പിക്കല്‍ നോട്ടിസ്

എൽഡിഎഫിൽ നിന്ന് ബി.ജെ.പി.യിലേക്ക് ചേക്കേറുന്നവരെ വിമർശിക്കാൻ തയ്യാറാവാത്ത മുഖ്യമന്ത്രി, യു.ഡി.എഫിലേക്ക് വരുന്നവരെ മാത്രം ലക്ഷ്യം വയ്ക്കുന്നത് എന്തിനാണെന്ന് ജനങ്ങൾക്കറിയാം. കേന്ദ്രത്തിലോ കേരളത്തിലോ ഭരണമില്ലാത്ത പാർട്ടിയായിട്ടും ആളുകൾ വരുന്നുണ്ടെങ്കിൽ, യു.ഡി.എഫ് അധികാരത്തിൽ വരണമെന്ന ആഗ്രഹം കൊണ്ടാണത്.

അതേസമയം, പൊതുപ്രവർത്തകരെ കോമാളിയെന്ന് വിളിക്കുന്നവരോടും ചോദ്യം ചോദിക്കുന്നവരോട് വീട്ടിൽ പോയി ചോദിക്കാൻ പറയുന്നവരോടും ജനങ്ങൾ കണക്കുചോദിക്കുമെന്നും ഷാഫി വ്യക്തമാക്കി.