കൊടകര: ഇന്ന് തിരുവോണനാളില്‍ ആനന്ദപുരം വില്ലേജിലെ കലാ സാംസ്‌കാരിക സംഘടനകളും കുടുംബശ്രീ, പുരുഷ സ്വയംസഹായ സംഘങ്ങളും അയല്‍സഭകളും സംയുക്തമായി ഓണോല്‍സവം സംഘടിപ്പിക്കും. ഉച്ചക്ക് രണ്ടിന് ആനന്ദപുരം കപ്പേള പരിസരത്ത് നിന്നും ഓണം ഘോഷയാത്ര നടക്കും. കുമ്മാട്ടിക്കളി, പുലിക്കളി, നാടന്‍ കലകള്‍, നിശ്ചല ദൃശ്യങ്ങള്‍ എന്നിവയുണ്ടാകും. ആനന്ദപുരം ഇ.എം.എസ് ഹാളില്‍  വൈകുന്നേരം ആറിന് സാംസ്‌കാരിക സമ്മേളനം സംവിധായകന്‍ ജിജു അശോകന്‍ ഉദ്ഘാടനം ചെയ്യും. ജില്ലാ പഞ്ചായത്തംഗം ടി.ജി ശങ്കരനാരായണന്‍ അധ്യക്ഷനാകും. തുടര്‍ന്ന് വിവിധ കലാപരിപാടികള്‍, ഗാനമേള എന്നിവയുണ്ടാകും. വാര്‍ത്താ സമ്മേളനത്തില്‍ കണ്‍വീനര്‍ എ.എം ജോണ്‍സന്‍, എം.എന്‍ രമേഷ്, വി.മഹേഷ്, കെ.കെ സന്തോഷ് എന്നിവര്‍ പങ്കെടുത്തു.